Jeremías 16:1-21
16 TAYTA DIOSMI kayno nimarqan:
2 “Ama warmiwan taytsu. Olqupis ni warmipis tsurikikuna ama katsuntsu.
3 Kay nacioncho yuriq wamrakunapis y maman y taytanpis
4 pesti qeshyawanmi wanupäkunqa. Tsaymi waqapänanpaqpis ni pampananpaqpis pipis mana kanqatsu. Uywakunapa ismayninnömi maytsaychöpis wanushqa jitarpäkunqa. Wakinkunaqa guërrachömi wanunqa y wakinkunanami yarqaypita ushakanqa. Ayankunatapis wiskulkuna, condorkuna y jirka uywakunami mikupäkunqa”.
Judá runakunata castigananpaq Tayta Dios nishqan
5 TAYTA DIOS mastapis kayno nimarqan: “Kay runakunataqa mananami yanapashaqtsu ni kuyapäshaqtsu. Tsayno kaptinqa wanuqkunapaqpis ama waqaytsu ni lakikuytsu ni täpaymanpis ama aywaynatsu.
6 Kay nación runakunata castigaptï rïcupis waktsapis wanuptin manami pipis kanqatsu pampananpaq ni waqananpaq. Manami lakikur aqtsanta rutukunanpaq ni qaranta pishtaypa pishtar kutsukunanpaq pipis kanqatsu.
7 Wanuptin täpaqkuna mikunanpaq yanukuqkunapis manami kanqatsu. Maman y taytan wanuptinpis manami pipis kanqatsu vïnuta jichapänanpaq.
8 “Tsaynöpis runakuna mikur upur jamarashqan wayiman ama yaykuytsu.
9 Israel runakunata kuyaq y lapanta mandaq TAYTA DIOS karmi kayno nï: Noqami kamakätsishaq kay nacioncho pipis manana kushikunanpaq ni casaray fiestatapis manana rurapäkunanpaq.* Tsaytaqa kikikimi rikankipaq.
10 “Tsayno nishqäta wilakuptikimi runakunaqa tapushunkipaq kayno nir: ‘¿Imanirtaq TAYTA DIOS tsayno fiyupa mantsariypaq lakikuywan castigamäshun? ¿Imatataq mana alita rurapäkushqä? ¿Ima jutsatataq rurapäkushqä TAYTA DIOSNINTSITA pasaypa rabyatsinäpaqqa?’
11 “Tsayno tapushuptiki kayno ninki: ‘TAYTA DIOSMI kayno nin: Tsayno pasashunki unay ayluykikuna qonqaykamar juk dioskunata adorar sirvishqanpitami. Noqata mana cäsumarmi leynïkunatapis cumplirqantsu.
12 Qamkunaqa paykunapitapis mas peormi shonquyki munashqanta rurashpayki mana cäsukamankitsu.
13 “ ‘Tsayno kashqaykipitami kay nacionpita qarqushayki unay ayluykikuna mana reqishqan ni qamkunapis mana reqishqayki nacionman. Qamkunata manana kuyapaptïmi tsay nacioncho paqasta junaqta juk dioskunatana adorapäkunkipaq.
14 “ ‘Tsayno kaptinpis wara warantinkunaqa tsay nacionpita kutitsipäkamushaykimi. Tsaypitaqa manami pipis kayno ninqanatsu: “Israel runakunata Egiptupita jorqamuq Tayta Diospa jutinchömi jurä”.
15 Tsaypa trukanqa kayno nirmi jurapäkunqa: “Israel runakunata norti kaq lädu nacionman y intëru nacionkunaman qarqushqanpita kutitsimuq TAYTA DIOSPA jutinchömi jurä”.* Unay ayluykikunata qoykushqä nacionmanmi kutitsipäkamushayki’ ”.
16 TAYTA DIOSMI kayno nin: “Puntatami itsanqa atska contraykikunata kachamushaq pescäduta tsariqno prësu tsarishunaykipaq. Tsaypitanami yapay atskaqta kachamushaq quëdaq runakunata tsaripäkunanpaq. Paykunami jirka uywata tsariq runano qatikachäshunki maytsay jirkankunaman, raqrakunaman y machaykunaman pakakuptikipis.*
17 “Noqaqa qamkuna imano kawashqaykitapis lapantami rikaykä. Pakaylapa jutsata rurashqaykitapis rikaykämi.
18 Qamkunata rikashqämi mana väliq ïduluykikunata adorar qoykushqä nacionta *impüruyätsishqaykita. Tsayno rurapäkushqanki intëru kay nacionnïchömi. Tsayno kashqaykipitami qamkunaqa makïta apankipaq”.
Tayta Diosta Jeremías manakushqan
19 TAYTA DIOS, qammi valorta qomanki.Ima peligrupitapis qammi tsapämanki.Qamta adorashunaykipaqmi maytsay nacionkunapitapis shamur kayno nipäkunqa:“Unay aylükuna adorashqan ïdulukunaqa imapaqpis mana välintsu.
20 Runaqa ¿dioskunata ruranmantsuraq?Ruraptinpis tsay dioskunaqa manami rasunpa Diostsu kaykan”.
21 Tayta Dios kaynömi nin:“Maytsaycho taq runakunatami musyatsishaq munayniyuq kashqäta.Paykunami musyapäkunqa noqa TAYTA DIOS kashqäta”.
Ichic wilacuycuna
^ 16.9 Jer. 7.34; 25.10; Apoc. 18.23.
^ 16.14-15 Jer. 23.7-8.
^ 16.16 Hab. 1.14-15.
