Jeremías 18:1-23
18 Jeremíastami TAYTA DIOS kayno nirqan:
2 “Ayway manka ruraqpa wayinman. Tsaychömi nishayki runakunata imata wilanaykipaqpis”.
3 Manka ruraqman aywarmi tarirqä tornuwan mankata ruraykaqta.
4 Ruraykashqan manka munashqanno mana yarquptinmi yapay tsay mitulapita juk mankatana munashqanno rurarqan.
5 Tsawraqa TAYTA DIOS revelamar kayno nimarqan:
6 “Israel runakuna, manka ruraq runa rurashqanno ¿manatsuraq noqapis qamkunata ruräman? Manka ruraqpa makincho mitu kaykashqannömi qamkunapis makïcho karkaykanki.*
7 “Noqaqa nacionkunapa contranmi wilakatsï munashqä höra castigar ushakätsinäpaq.
8 Tsayno kaptinpis tsay nación runakuna jutsa rurayta kacharir alitana ruraptinqa castiganäpa kaykashqächöpis manami castigashaqnatsu.
9 “Wakin nacionkunatami noqaqa yanapä mas munayniyuq kananpaq. Yanapanäpaq wilakatsiptïpis
10 tsay nacioncho taq runakuna nishqäta mana cäsukuypa jutsata ruraptinmi itsanqa yanapanäpaq kaykashqächöpis castigashaqpaq”.
11 “Jeremías, Judá runakunata y Jerusaléncho taq runakunata kayno wilanki: ‘TAYTA DIOSMI kayno nin: Qamkunata castiganäpaqmi kamarikuykä. Manaraq castigaptï jutsa ruraykunata kacharir alilatana rurapäkuy’.
12 “Tsayno wilakuptikimi paykuna kayno nishunkipaq: ‘¡Manakaqlapaqmi parlapaykämanki! Noqakunaqa munashqänömi kawapäkushaq. Shonqü yarpashqankunatami mana alitapis rurapäkushaq’ ”.
Kuyashqan runakuna mana yärakuypaq kashqan
13 Tsaymi TAYTA DIOS kayno nin:“¡Israel runakunaqa mantsariypaq mana alitami rurapäkun!Juk lädu nacionkunacho mä tapukäriy.Manami mayqan nacionchöpis kay runakuna mana alita rurashqannöqa rurashqatsu.
14 Líbano puntakunapita raju ¿imaylaqa elqantsuraq?Tsay jirkapita urämuq yaku ¿imaylaqa tsakintsuraq?Tsaykuna yärakuypaq kaptinpis kuyashqä runakunaqa manami yärakuypaqtsu kaykan.
15 Paykunaqa qonqaykamashpanmi mana väliq ïdulukunata inciensuwan qoshtaykätsin.Noqa nishqäno kawananpa trukanqa fiyu nänipa purirmi pantakashqano lutankunata rurarkaykan.
16 “Tsayno kashqanpitami paykunata fiyupa castigashaq.Nacionninpis chunyaq rikakuptinmi imaypis runakuna mantsakanqa.Tsay lädupa lapan pasaqkunaqa espantashqami umanta awipäkunqa.
17 Shukukuy wayra shamuqnömi Israel runakunata mashtakätsishaq.Contrankuna ushakätsinanpaqmi kacharishaq.Tsay junaqqa paykunata manami yanapashaqtsu”.
Jeremíaspa contran wilanakushqan
18 Tsayno nir wilakuptïmi chikimaqnïkuna kikinpura kayno nipäkurqan: “Mandamientukunata yachatsimänantsipaqqa cürakuna kaykanmi. Imata yätsimänantsipaqpis tantiyaqkuna kaykanmi. Tayta Diospa wilakuyninta wilapämänantsipaqpis profëtakuna kaykanmi. Jeremíastaqa manami imaypis nistantsitsu. Payta wanutsinanpaq imatapis manakaqta jitapäshun. Pay nishqantaqa ama chaskipäkushuntsu”.
19 ¡TAYTA DIOS, yanapaykalämay!¡Manakaqta jitapämänanpaq wilanakushqanpita conträkunata castigaykulay!
20 Paykunapaqqa imaypis alilatami rurashqä.Paykunapita rabyashqa kaptikipis favorninmi qamta manakushqä.Kananqa lutanta ruraptïnöpis conträmi sharkapäkushqa.
21 Tsayno kashqanpita wakin wamrankuna guërracho wanutsun y wakinna yarqaypita wanutsun.Paykunapa warminpis viüdayar wawaynaq kakutsun.Olqu kaqkunaqa qeshyawan wanutsun.Mözukunapis guërracho wanutsun.
22 Asaltantikuna elaqpita yaykuptin wayinkunachöpis qaparashqan mayakätsun.Conträ sharkur trampata churapämaqno kashqanpita paykunatapis trampata churapaykulay.
23 TAYTA DIOS, qam musyaykankimi wanutsimänanpaq wilanakushqanta.Fiyu runa kashqanpita ama perdonaytsu ni jutsata rurashqantapis ama qonqaytsu.Fiyupa rabyakushpayki paykunataqa jutsanman tupu castigaykulay.
Ichic wilacuycuna
^ 18.1-6 Isa. 64.8; Rom. 9.20-21.
