Jeremías 19:1-15
19 TAYTA DIOSMI kayno nimarqan: “Puyñu rantiq ayway. Nirkur juk ishkay mayor runakunata y mayor cürakunata qayaykatsir
2 Ben-Hinom raqraman pushay. Markapita yarqunki Manka Ruraq nishqan punkupa. Noqa nishqäta paykunata tsaycho wilanki.
3 “Wilapar kayno ninki: ‘Judá nacionpa mandaqnin rey y Jerusaléncho taq runakuna, lapayki mayapäkamay. Israel runakunata kuyaq y lapanta mandaq TAYTA DIOS kaynömi nin: Kay nación runakunata castigaptï fiyupami nakapäkunqa. Tsayno nakashqanta mayaq kaqqa pasaypami mantsakanqa.
4 Tsayno castigashayki noqata adoramänaykipa trukan juk dioskunata adorar inciensuwan qoshtatsishqaykipitami. Tsay dioskunataqa unay ayluykikunapis ni mandaqniki reykunapis manami imaypis adorarqantsu. Juk dioskunata adorapäkurmi kay raqrata pasaypa manakaqman churashqanki.
“ ‘Tsay jananmanpis jutsaynaq kaqkunatami kaycho wanutsipäkushqanki.
5 *Baalta adorar tsurikikunata rupatsinaykipaqmi *altarkunatapis kaycho perqapäkushqanki. Tsayno ruranaykipaqqa manami mandashqätsu ni nishqätsu ni yarpaylapis yarpashqätsu.
6 “ ‘Mastapis TAYTA DIOS kaynömi nin: Castiganä junaq chayamuptin kay raqrata manami Tofet jutiwantsu ni Ben-Hinom jutiwantsu reqipäkunqa, sinöqa Wanutsinakuy Raqra jutiwanmi reqipäkunqa.*
7 “ ‘Noqami Judá runakuna y Jerusalén runakuna yarpapäkushqantapis pantakätsishaq. Contrankunapa makinmanmi kachapärishaq vincipäkunanpaq. Tsaymi ayankunatapis wiskulkuna y jirka uywakuna mikunqapaq.
8 Kay marka ushakashqanqa pasaypa mantsariypaqmi kanqa. Imano castigashqäta rikashpanmi lapan pasaqkuna äyakashqa rikapanqa.
9 “ ‘Contraykikuna tumariq tsapäshuptiki mikuypis pasaypami ushakanqa. Tsayno castigaptïmi runa mayikita y tsurikikunata olqutapis warmitapis mikupäkunkipaq*’.
10 “Jeremías, tsayno wilapayta usharkur pushashqayki runakunapa nawpancho rantishqayki puyñuta pakinki.
11 Nirkur kayno ninki: ‘Lapanta mandaq TAYTA DIOS kaynömi nin: Tsay puyñutanömi Judá runakunata y Jerusalén runakunata ushakätsishaq. Shalushqa puyñuta pipis altsayta mana kamäpakushqannömi paykunatapis nawpata kashqanno kananpaq mana pipis kutitsiyta kamäpakunqatsu. Wanuqkunata pampananpaq mana jäkuptinmi Tofetmanna pampapäkunqa.
12 Ayakunala Tofetcho jitarashqannömi kay markachöpis ayakunala jitarpanqapaq.
“ ‘Tsaynömi kay markata y kay markacho taykaqkunatapis ushakätsishaq.
13 Jerusaléncho kaykaq wayikunacho y Judá nacionpa mandaqnin reykunapa palaciunkunachöpis ayakuna jitaraptinmi Tofetno qanra rikakunqa. Paykunata tsayno castigashaq tsay wayikuna janancho* y tsay palaciukuna janancho qoylarkunata adorashqanpita y inciensukunawan tsaycho qoshtatsir juk dioskunapaq vïnuta jichapashqanpitami’ ”.
14 TAYTA DIOSPA jutincho wilakurirmi Tofetpita templuman Jeremías kutirqan. Templu patiuman ichiykurmi runakunata kayno nirqan:
15 “Israel runakunata kuyaq y lapanta mandaq TAYTA DIOSMI kayno nin: ‘Qamkunaqa nishqäkunata cäsukuyta mana munaptikimi wilakatsishqänöla kay markacho y nawpancho kaykaq markakunacho taqkunatapis castigashaq’ ”.
Ichic wilacuycuna
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 19.5-6 Lev. 18.21; Isa. 57.5; Jer. 7.31-32; 32.35.
^ 19.9 Deut. 28.53-57; Eze. 5.10.
^ 19.13 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
