Jeremías 2:1-37
2 TAYTA DIOS kaynömi nimarqan:
2 “Jerusaléncho taq runakunaman aywaykur kayno nishqäta wilanki:Jipash* kar cäsukamashqaykita yarparaykämi.*Tsay witsanmi chunyaq jirkapa y mikuy mana wayunan chakrapa purir qatirämarqayki.Tsayraq casarashqa jipash runanta kuyaqnömi kuyamarqayki.*
3 Tsay witsanqa munashqänömi kawarqayki.Punta poquq mikuy noqapaq kashqannömi qampis noqapaq karqayki.Mayqan nacionpis nakatsishuptikiqa tsay nacionta cadalami castigaq kä.Noqa TAYTA DIOSMI tsayno nï”.
Israel runakunapa unay aylunkuna jutsata rurashqan
4 Jacobpita miraq Israel runakuna, mayqan aylu karpis TAYTA DIOS nishqanta lapayki shumaq mayapäkamay.
5 TAYTA DIOSMI kayno nin:“¿Imatataq mana alita rurashqä unay ayluykikuna mana cäsukamänanpaq?Mana väliq dioskunata adorarmi kikinkunapis mana väliq rikakärirqan.
6 Egiptupita jorqaykämuptïpis y chunyaq tsaki jirkapa pushaykämuptïpis paykunaqa manami munashqänötsu kawapäkurqan.
7 Paykunatami kuyaylapaq nacionman pushamurqä wayushqankunata mikur kushishqa kawapäkunanpaq.Tsayno kaptinpis jutsata rurapäkurmi nacionnïta *impüruyätsirqan.Tsaynöpami nacionnï pasaypa melanaypaq rikakurqan.
8 “Cürakunapis noqa munashqänöqa manami rurapäkuntsu.Leyta yachatsiqkunapis manami cäsukärimantsu.Reykunapis conträmi rikakärin.Profëtakunapis mana väliq dioskunalaman yärakur *Baalpa jutinchömi wilakärin.
9 Tsaymi kananqa qamkunatapis, tsurikikunatapis y wilkaykikunatapis castigashayki.Noqa TAYTA DIOSMI tsayno nï”.
Ïduluta adorar Israel runakuna imano kashqanpis
10 “Qamkuna kashqaykino ¿maylachöqa runakuna kantsuraq?Inti jeqanan läducho kaq islakunaman aywapäkuy tsaycho taqkunata shumaq rikamunaykipaq.Cedar lädumanpis pilatapis kachay tsaycho taq runakuna imano kashqantapis musyamunanpaq.
11 Paykuna adorashqan dioskuna mana rasunpa dios kaptinpis ¿mayqan nacionlachöqa diosninkunata trukatsishqatsuraq juk dioskunata adorananpaq?*Kuyashqä runakunami itsanqa munayniyuq Diosnin kaykaptïpis mana väliq dioskunatana adorarkaykan”.
12 TAYTA DIOSMI kayno nin:“Qamkuna tsayno kapäkuptikimi ciëlupis mantsarin.Mana alikunata rurapäkushqaykita rikarmi siksikyan.
13 Kuyashqä runakuna kapäkuptikipis jutsaykikuna ishkaymi kaykan.Juk jutsayki kaykan noqata qonqaykamashqayki.Jukaqnami kaykan juk dioskunaman yärakärishqayki.Tsaynöpami mana tsakiq pukyuta kacharir shalacho pözuta ruraqno karkaykanki.*
14 “Israel runa kaykarqa manami ashmaytsu karkaykanki ni ashmay kanaykipaqtsu yuripäkushqanki.Tsayno kaptinpis ¿imanirtaq juk lädu runakuna shamur imaykaykikunatapis apakur nakatsipäkushunki?
15 Qamkunamanqa leonnöraq qaparparmi chikishuqnikikuna yaykamushqa.Intëru nacionnikicho markaykikunatapis raqälatanami kachaykärishqa.Markaykikunata rupatsiptin manami pipis tsaycho tannatsu.*
16 Menfis soldädukuna y Tafnes soldädukunapis Egiptupita shamurmi pasaypa vincishushqanki.
17 Qamkunata tsayno pasashushqanki pusharaykaptï noqa TAYTA DIOSNIKITA qonqaykamashqaykipitami.
18 “Kananqa ¿imatataq jorqupäkunki Egiptuman aywar Nilo mayupita yakuta upupäkushpayki?*¿Imatataq jorqupäkunki Asiriaman aywar Éufrates mayu yakuta upupäkushpayki?*
19 Qamkunaqa jutsata rurapäkushqaykipita y mana cäsukamashqaykipitami castïguta chaskipäkunkipaq.Tsay hörami tantiyapäkunkipaq noqata qonqaykamar mana *mantsakamashqaykipita desgracia pasashushqaykita.Lapanta mandaq TAYTA DIOS karmi tsayno nï.
20 “Unaypita patsami qamkunaqa makïpita yarqukur munashqaykita rurar kawarkaykanki.Adoramaytapis manami munapäkunkinatsu.Tsayno karmi maytsay jirkankunacho y copösu yörakunapa sikinkunachöpis jukwan jukwan kakuq warmino qamkunapis juk dioskunata adorarkaykanki.
21 “Qamkunataqa alinnin kaq üvata akraykur plantaqnömi plantashqä.*Tsayno ruraykaptïqa ¿imanirtaq mana ali üvano tikrapäkushqanki?
22 Lijyawan mayjina maylakurpis y maytsika jabonwan armakurpis jutsaykikunata manami maylapäkunkitsu.Noqa TAYTA DIOSMI tsayno nï.
23 “*Baal dioskunata adoraykarqa ¿imanötaq nipäkunkiman jutsaynaq karkaykashqaykita?Tsayno nir lutanta nishqaykita tantiyapäkunaykipaq raqracho ïdulukunata adorashqaykita yarpapäkuy.*Ïdulukunata adorapäkunaykipaqqa calintashqa camëllu cörrikachaqnömi karkaykanki.
24 Chunyaq jirkalacho täkuq china bürru orqu bürrupa asyayninta mayar calintashqa cörrikachaqnömi karkaykanki.Tsay bürruta ¿piraq tsapanman?Calintaykaq bürruta orqu bürru tarishqannömi qamkunatapis pipis tarishunki juk dioskunata adoraykaqta.*
25 ¡Imayyaqraq lanqikipis ushakashqa tsay dioskunapa qepanta warakayla aywarkaykanki!¡Imayyaqraq kunkaykipis tsakishqa tsay dioskunata qatirpaykanki!Tsayno tapuptïpis qamkunaqa kaynömi nipäkamanki:‘Alfin imanäshaqtaq.Noqakunaqa jäpa dioskunatami pasaypa kuyapäkü.Imano kaptinpis paykunatachari sirvipäkushaq’.
26 “Taripaykuptin suwa runa penqakushqannömi qamkunapis mana cäsukuq kashqaykipita penqakärinkipaq.Tsaynölami penqakärinqa mandaqniki reykunapis, autoridänikikunapis, cürakunapis y lula profëtakunapis.
27 Qamkunaqa qerupita rurashqa ïdulukunatami taytayki kashqanta nipäkunki.Tsaynölami rumipita rurashqa ïdulukunatapis mamayki kashqanta nipäkunki.Noqataqa qonqaykamashqankimi.Ima nakaychöpis karmi itsanqa ‘¡salvaykalämay, Tayta!’ nipäkamanki.
28 Desgracia pasashuptiki ¿imanirtaq rurashqayki diosnikikunata mana manakunkitsu?¿Imanirtaq tsaykuna mana yanapashunkitsu?Judá runakuna, markaykikuna atska kashqannömi rurapäkushqayki diosnikikunapis atska karkaykan.*
29 “Noqa TAYTA DIOSMI kayno nï:Manami noqatsu qamkunapa contrayki sharkushqä, sinöqa qamkunami noqapa conträ sharkushqanki.Tsayno kaykaptinqa ¿imanirtaq conträ parlarkaykanki?
30 Tsurikikunata castigaptïpis manami tantiyakärintsu.Kachamushqä profëtakunatapis fiyu leonno atacarmi espädawan wanutsipäkushqanki.*
31 “¡Israel runakuna, shumaq tantiyakäriy noqa TAYTA DIOS imata nishqätapis!Qamkunapaqqa ¿chunyaq jirkanöku kashqä?¿Yanawyaykaq tsakaynöku kashqä?Lapancho yanapaykaptïqa ¿imanirtaq witikurkaykanki?¿Imanirtaq nipäkamanki manana yärakamänaykipaq kashqanta?
32 Adornunkunata ¿jipash qonqaykunmantsuraq?Casarashqan höra jatikushqan röpanta ¿qonqaykunmantsuraq?Qamkunami itsanqa qonqaykamashqanki.
33 “Waynata taripäkunaykipaqqa shumaqmi yarpachakärinki.**Wayrapakuq warmikunapis qamkunapitami yachakärishqa.
34 Jutsaynaq waktsakunata wanutsipäkuptikimi röpaykikunapis yawarlana kaykan.Ima jutsatapis mana ruraykaptinmi tsay runakunataqa wanutsipäkushqanki.
35 Tsayno ruraykarpis kaynömi nirkaykanki:‘Noqakunaqa jutsaynaqmi karkaykä.Tayta Diospis noqakunapita manami rabyashqatsu kaykan’.Tsayno nipäkuptikipis lapan jutsa rurashqaykipitami juzgashaykipaq.
36 “¿Imanirtaq mana yarpachakuypa jäpa nacionkunaman jukla laqakaykanki?Tsay nacionkunamanqa manakaqlapaqmi yärakurkaykanki.Asiria nacionman puntata yärakuptikipis mana yanapashushqaykinölami Egipto nacionman yärakuptikipis mana yanapashunkitsu.
37 Egiptuman yärakärishqaykipitami pasaypa lakikärinkipaq.Yärakärishqayki nacionkunata kachariykushqa kaptïmi tsay nacionkunaman yärakushqaykipis manakaqlapaq kaykan”.
Ichic wilacuycuna
^ 2.2a Ose. 2.15-16.
^ 2.2b Éxo. 13.17-18; Núm. 14.33-34; 32.13.
^ 2.2 Kay versïculukunachöqa Israel nacionta warmimanmi tinkutsin. Tsaymi mushuq nación kashqan witsanpaq yarpar jipash kashqanta nin. Egiptupita jorqur chunyaq jirkapa Tayta Dios pusharqan pusaq pachak (800) watano Jeremías manaraq yuriptinmi.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 2.11 Sal. 106.20; Rom. 1.23.
^ 2.13 Juan 4.10-14; 7.37-38.
^ 2.15 2Rey. 15.29; 17.5-6; Jer. 4.7.
^ 2.18 Isa. 30.1-3.
^ 2.18 Nilo mayupita yakuta upupäkushpayki nishqanqa Egipto runakunaman yärakärishpayki ninanmi. Éufrates mayu yakuta upupäkushpayki nishqanqa Asiria runakunaman yärakärishpayki ninanmi.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 2.21 Isa. 5.1-7; Luc. 13.6-9.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 2.23 Jer. 7.31; 19.2-6; 32.35.
^ 2.28 Deut. 32.37-38.
^ 2.30 1Rey. 19.10; Mat. 23.37.
^ 2.33 Waynata taripäkunaykipaq nishqanqa juk dioskunaman yärakunaykipaq ninanmi.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
