Jeremías 20:1-18
20 Imerpa tsurin Pasurqa cürami karqan. Paymi templuta täpaqkunapa mandaqnin karqan. Jerusalén runakunata y Judá runakunata Tayta Dios castigananpaq kashqanta Jeremías wilakushqanta mayarmi Pasurqa fiyupa rabyakurqan.
2 Tsaymi profëta Jeremíasta maqarkatsir Benjamín jutiyuq punku waqtancho cëpuman* sigurarqan. Tsay punku karqan templu yaykunachömi.
3 Cëpucho juk junaq prësu wichqararkatsirmi Jeremíasta Pasur jorqutsirqan.
Tsawraqa Jeremías kayno nirqan: “Pasur, TAYTA DIOSMI jutikita trukatsishqa Magor-misabib* kananpaq.
4 TAYTA DIOSMI kayno nin: ‘Kikikita y amïguykitapis fiyupami castigashayki. Rikaykaptikimi amïguykikunata contraykikuna espädawan wanutsipäkunqa. Tsaynöpis Judácho taqkunata lapantami entregashaq Babilonia nacionpa mandaqnin reypa makinman. Paymi wakinta Babiloniaman prësu apanqa y wakintana espädawan wanutsinqa.
5 Kay markacho kaykaq riquëzakunata y Judá nacionpa mandaqnin reykunapa tesörunkunatapis tsay reytami entregashaq. Tsaymi imaykankunatapis väliq kaqtaqa soldädunkunawan Babiloniaman apakunqa.
6 “ ‘Pasur, qamtapis y wayikicho taqkunatapis Babiloniamanmi prësu apashunkipaq. Wanuptikimi tsaycho pampashunki qamta y profëta tukur criyitsishqayki amïguykikunatapis’ ”.
Jeremías lakikur Tayta Diosta manakushqan
7 TAYTA DIOS, ¡mana munaykaptïmi profëta kanäpaq churamashqanki!¡Lapanpaq munayniyuq karmi obligamashqanki!Wilakuptïmi runakuna imaypis asipämashpan manakaqman churapäkaman.
8 Wilakurmi imaypis kayno nï:“¡Fiyupa nakaykunami kanqa!¡Lapanmi ushakanqa!”Tsayno wilakushqäta mana criyirmi runakuna tukuyta qayapäman.Waran waranmi manakaqman churapäkaman.
9 Tsawraqa kaynömi nirqä:“Tayta Diospa wilakuyninta manami wilakushaqnatsu.Paypa jutinchöpis manami parlashaqnatsu”.Tsayno niptïpis wilakuyniki shonqücho nina rupaykaqnömi rikakushqa.Tulüyaqmi tsay rupashqan chayaykushqa.Upälakuyta munarpis manami kamäpakütsu.*
10 Runakunaqa manakaqman churamarmi asipämänanpaq shapshapyaylapa rimar kayno nipäkun:“¡Magor-misabib!”*Tsaynöpis lapan juntakaykurmi wilanakärin manakaqkunata jitapämänanpaq.Amïgükunapis munarkaykan penqaycho kanätami.Paykunaqa wilanakurkaykan imalatapis criyitsimar lutanta parlatsimänan kashqami.
11 Tsayno kaptinpis pïmayta vinciq jatun soldädunömi TAYTA DIOS yanapaykäman.Conträ sharkuqkunaqa vincimayta manami kamäpakunqatsu.Kikinkuna mana ali rikashqa karmi fiyupa penqakärinqa.Tsaytami imayyaqpis runakuna yarparanqa.
12 Lapanta mandaq TAYTA DIOS, ali runakunata probankimi.Runakuna imata yarpaykashqantapis musyankimi.Conträkuna mana alita yarpapäkushqanta musyaykarqa castigaykulay.Noqaqa qampa makikimanmi lapanta kachaykü.*
13 ¡TAYTA DIOSTA alabar cantashun!¡Paymi fiyu runakunapa makinpita waktsakunata salvan!
14 ¡Yurishqä junaqpis maldicionashqa katsun!¡Imapaqraq mamäpis wachamarqan!*
15 ¡Papänïta kushikatsir yurishqäta wilaq runapis maldicionashqa katsun!
16 Tsay wilaq runaqa katsun TAYTA DIOS mana kuyapaypa ushakätsishqan markakunano.*Tutapapis mayatsun nanaywan qaparpaykaqta.Pulan junaqpapis mayatsun guërra kaptin qaparpaykaqta.
17 ¡Alimi kanman karqan mamäpa pachalancho kaykaptï wanutsimaptin!Mamäpa pachalan panteonnïpis kanman karqan.Tsayno kaptin manami imaypis yurïmantsu karqan.
18 Tsayjinanpa nakar lakishqala kawanäpaq kaptinqa ¡imapaqraq yurirqäpis!Jamurpashqa kanaläpaq kaptinqa ¡imapaqraq atsikyay patsatapis rikarqä!
Ichic wilacuycuna
^ 20.2 Cëpuqa rakta tablapita rurashqami karqan runata chakipita karpis makipita karpis y kunkapita karpis prësu tsararänanpaq. Cëpuchöqa prësukuna pasaypami nakarqan.
^ 20.3 Hebreo idiömacho Magor-misabib ninanqa maytsaychöpis mantsakuy ninanmi.
^ 20.9 Amós 3.8; 1Cor. 9.16.
^ 20.10 Hebreo idiömacho Magor-misabib ninanqa maytsaychöpis mantsakuy ninanmi. Tsaymi: “Jutiki Magor-misabibmi kanqa” nir Pasurta Jeremías nishqanno runakuna asipar Jeremíastapis “¡Magor-misabib!” nipäkurqan.
^ 20.10-12 Sal. 6.9-10; 31.13-18; 109.30-31; Jer. 11.20.
^ 20.14-18 Job 3.1-19.
^ 20.16 Tsay markakunaqa Sodoma y Gomorrami karqan (Gén. 19.24-28).
