Jeremías 22:1-30
22 TAYTA DIOSMI kayno nimarqan: “Ayway Judá nacionpa mandaqnin reypa palaciunman. Chayaykur wilakunki kayno nir:
2 Davidpa trönuncho jamaraykaq Judá nacionpa mandaqnin rey, TAYTA DIOS nishushqaykita cäsukuy. Tsaynöpis autoridäkuna y kay markacho taq lapan runakunapis payta cäsukäritsun.
3 TAYTA DIOSMI kayno nin: ‘Shumaq juzgashpayki jutsaynaq runakunapa favornin sharkapäkuy. Jukpa makincho nakaykaqkunata jorqapäkuy. Jäpa runakunata, waktsakunata ni viüdakunatapis ama nakatsipäkuytsu. Ali runakunata ama wanutsipäkuytsu.
4 “ ‘Kanan niykashqäta cäsukamaptikiqa Davidpa trönunman jamaykur mandananpaq imaypis rey kanqami. Tsaymi palaciu punkupapis yaykamunqa carrëtankunawan y cawallunkuna muntashqa. Paykunawanmi mandäshiqninkunapis y marka runakunapis yaykamunqa.
5 Kanan niykashqäta mana cäsukamaptikimi itsanqa kikïpa jutïcho jurä kay palaciu raqälana rikakunanpaq kashqanta. Noqa TAYTA DIOSMI tsayno nï’ ”.
Rey tashqan palaciuta ushakätsinanpaq Tayta Dios nishqan
6 Judá runakunapa mandaqnin rey tashqan palaciupaq TAYTA DIOS kaynömi nin:“Noqapaqqa Galaad jirkano y atska muntiyuq Líbanunömi kay palaciu kuyaylapaq kaykan.Tsayno kaptinpis pasaypa chunyaqman tikraratsiptïmi pipis tsaycho mana tanqanatsu.
7 Ushakätsinanpaqmi armayuq runakunata kachamushaq.Paykunami palaciucho kaykaq kuyaylapaq jatusaq cedru qerukunatapis muturir rupatsinqa.
8 “Tsayno ushakätsiptinmi kay marka nawpanpa pasaq runakuna kikinpura kayno nipäkunqa: ‘Kay jatunkaray markata ¿imanirraq TAYTA DIOS ushakätsishqa?’
9 Tsawraqa kayno nipäkunqa: ‘TAYTA DIOSNINWAN *pactu rurashqanta manami cumplishqatsu, sinöqa jäpa runakuna adorashqan dioskunatami adorashqa. Tsaymi paykunata tsayno castigashqa’ ”.
Rey Salum imano kananpaqpis Jeremías wilakushqan
10 Judá runakuna, rey Josías wanushqanpita ama waqapäkuytsu.Tsaypa trukanqa tsurin Salumpaq* waqapäkuy.Paytami prësu apakärishqa imaypis manana kutimunanpaq.Yurishqan markatapis manami rikanqanatsu.
11 Judá nacionpa mandaqnin rey Josíaspa tsurin Salumtami taytanpa trukan rey kaptin prësu apakärirqan. Paypaqmi TAYTA DIOS kayno nin: “Manami imaypis kutimunqapaqnatsu.
12 Payqa wanunqa prësu apashqan nacionlachönami. Kay naciontaqa manami imaypis rikanqanatsu”.
Rey Joacim imano kananpaqpis Jeremías wilakushqan
13 “¡Ay, imanöraq kanki, rey Joacim!Qamqa palaciuykita arutsir runakunata mana pägaypami arutsishqanki.
14 Jatusaq sälayuq y ventänayuq palaciuta ruratsinaykipaqmi yarpachakushqanki.Tsay palaciu cedru tablakunawan entablashqa y pukawan pintashqa kananpaqmi yarpachakushqanki.
15 “¿Cedru tablawan entablashqa wayiki kashqalanpitaku ali rey kashqaykita yarpanki?Papänikiqa ali reymi kashqa.Payqa mikushqanwan y upushqanwanmi contentakushqa.Pïmaytapis ali rikarmi bendicionta chaskishqa.
16 Waktsakunapapis y nakaqkunapapis favornin kaptinmi lapan rurashqanpis ali kashqa.Tsayno kawaqkunaqa noqata *reqimanmi.Noqa TAYTA DIOSMI tsayno nï.
17 “Qamqa imapaqpis codiciösumi kaykanki.Jutsaynaq runakunatami wanuykätsinki.Marka mayikikunatapis fiyupami nakaykätsinki”.
18 Tsaymi Judá nacionpa mandaqnin rey Josíaspa tsurin Joacimpaq* TAYTA DIOS kayno nin: “Joacim wanuptinqa manami pipis kayno nir waqanqatsu: ‘¡Ay wawqilaw wawqi! ¡Ay taytalaw tayta! ¡Ay mandaqnilä mandaq!’
19 Jerusalénpita qarachaypa apaykurmi bürrutano pampaykärinqa”.
Jerusalén runakunata desgracia pasananpaq nishqan
20 Jerusalén runakuna, yanapashunaykipaq minkakushqayki nacionkuna lapanmi ushakashqa.*Tsayno kaykaptinqa lakikushpayki Líbanucho kaykaq puntakunaman witsarkur waqapäkuy.Basán jirkakunaman aywaykur ataypa atar waqapäkuy.Abarim jirkakunachöpis iktsuypa iktsur waqapäkuy.
21 Imapis manaraq kaptinmi desgracia pasashunaykipaq kashqanta wilarqä.Wilaptïmi nipäkamarqayki mana cäsukamänaykipaq kashqanta.Unaypita patsami mana cäsukamashqankitsu.
22 Tsawraqa castigaptïmi mandaqnikikunatapis shukukuy wayra apaqno prësu apakärinqa.Yanapashunaykipaq minkakushqayki nacionkunapa mandaqninkunatapis prësumi apakärinqa.Tsayraqmi mana cäsukamaypa jutsata rurashqaykipita penqakärinkipaq.
23 Líbanucho kaykaq jatusaq cedru yöracho qeshwanta ruraq pishquno karmi imapis mana pasashunaykipaq kashqanta yarparkaykanki.
Tsayno kaptinpis desgracia chayamuptin wachay nanaywan qaparaq warminömi qaparpankipaq.
Rey Coníaspaq wilakushqan
24 TAYTA DIOSMI kayno nin: “Judá nacionpa mandaqnin Joacimpa tsurin rey Conías,* alawqa kaq makïcho jatirashqä sëllakunä sortëjäno kaptikipis kaypita qarqushaykimi. Noqa TAYTA DIOSMI tsayno qarqunäpaq jurä.
25 Wanutsishunaykipaqmi pasaypa mantsashqayki Babilonia nacionpa mandaqnin rey Nabucodonosorpa makinman y soldädunkunapa makinmanmi kachaykushayki.
26 Qamta y mamaykitami mana yurishqayki nacionman prësu apatsishayki. Tsaychömi wanunkipaq.
27 Yurishqayki nacionman mayjina kutimuyta munarpis manami kutimunkipaqnatsu”.
28 Coníasqa manami pakishqa kanalanötsu kaykan.Manami pakishqa mankanötsu imapaqpis mana väliq kaykan.Ali runa kaykaptinqa ¿imanirtaq mana väliqtano Tayta Dios rikanqa?¿Imanirtaq lapan tsurinkunatawan jäpa nacionman qarqunqa?
29 ¡Wawalaw, kay patsacho kaykaq runakuna!¡TAYTA DIOS nishqanta mayakäriy!
30 TAYTA DIOSMI kayno nin: “Coníastaqa desgracialami pasanqa. Paypita miraq kaqqa manami mayqanpis David jamarashqan trönuncho jamaranqapaqtsu ni Judácho rey kanqapaqtsu. Tsaymi tsuriynaqnöla wanunqa. Tsay nishqänömi rasunpa kanqa”.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 22.10-11 Salumpa jukaq jutin Joacazmi karqan. Joacazpita masta musyanaykipaq liyinki 2Rey. 23.31-34; 2Crón. 36.2-4.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 22.13-19 2Rey. 23.36—24.6; 2Crón. 36.5-7; Jer. 36.30-31.
^ 22.20 Manaraq ushakaptinpis Tayta Dios parlarqan mayna ushakashqa kaptinnömi.
^ 22.24 Coníaspa jukaq jutin Joaquínmi karqan. Joaquínpita masta musyanaykipaq liyinki 2Rey. 24.8-15; 2Crón. 36.9-10.
