Jeremías 23:1-40
23 TAYTA DIOSMI kayno nin: “¡Judá nacionpa mandaqnin rey y yanapaqninkuna! ¡Qamkunataqa mana kuyapaypami castigashayki! Qamkunaqa mana ali mitsikuqno karmi uyshäno kaykaq kuyashqä runakunata ushakaykätsinki y matsipa matsishqanki”.
2 Tsawraqa Israelta kuyaq TAYTA DIOS kaynömi nin: “Kuyashqä runakunata rikaqkuna, qamkunaqa uyshäkunata mantsakätsirmi wakpa kaypami qarqushqanki. Shumaq mana mitsishqaykipitami qamkunata castigashayki. Noqa TAYTA DIOSMI tsayno nï.
3 “Maytsaypa qarqushqäpitapis uyshäkunataqa kikïmi shuntamushaq. Markankunaman shuntamuptïmi tsaytsikaman miranqa.
4 Nirkur paykunata shumaq rikananpaqmi ali mitsikuqkunata churashaq. Ali rikaptinmi mana mantsakunqanatsu ni oqrakanqanatsu.* Noqa TAYTA DIOSMI tsayno nï”.*
5 TAYTA DIOSMI kayno nin:“Tiempu chayamuptinmi David aylupita Renuevo nishqan runa yurinqa.Paytami churashaq rey kananpaq.Munashqäno mandarmi kay nacioncho pïmaytapis ali rikanqa.
6 Paypa jutinmi kanqa Salvamaqnintsi TAYTA DIOS.*Mandaq kashqan witsanmi Judá runakuna y Israel runakuna jawka kawapäkunqa”.*
7 TAYTA DIOSMI kayno nin: “Tsay witsanqa manami pipis kayno ninqanatsu: ‘Israel runakunata Egiptupita jorqamuq Tayta Diospa jutinchömi jurä’.
8 Tsaypa trukanqa kayno nirmi jurapäkunqa: ‘Israel runakunata norti kaq lädu nacionman y intëru nacionkunaman qarqushqanpita kutitsimuq TAYTA DIOSPA jutinchömi jurä’.* Shuntamuptïmi kikinkunapa nacionninchöna tanqapaq”.
Lulakuq profëtakunata castigananpaq nishqan
9 Kaychömi qelqaraykan profëta tukuqkunapaq Jeremías wilakushqan.*Pasaypami lakikuykä.Tulükunapis pasaypami siksikyan.TAYTA DIOS nishqanta musyarmi pasaypa mantsakar shinkashqano rikakü.
10 Kay nacionchömi tsaytsika runakuna adulteriu jutsata rurarkaykan.*Jutsa ruraykunataqa ashak ashakmi rurapäkun.Mana kuyapaypami runa mayinta nakatsipäkun.Tsaymi kay naciontapis Tayta Dios maldicionashqa.Maldicionaptinmi patsapis tsakishqa.Jirkakunacho qewakunapis qawshushqami kaykan.
11 TAYTA DIOSMI kayno nin:“Lula profëtakunanölami cürakunapis jutsata rurarkaykan.Templüchöpis jutsata ruraykaqtami taripashqä.
12 Jutsata rurashqanpitami paykunata castigashaq.Tsakaypa lutska nänipa puriqnömi kanqa.Tanqariykuptin kuchpakaqnömi kanqa.Noqa TAYTA DIOSMI tsayno nï.
13 “Samariachöpis profëtakuna lutantami wilakärirqan.Paykunaqa *Baalpa jutincho wilakurmi kuyashqä Israel runakunata lutanta criyitsirqan.*
14 Tsay profëtakunapita peormi Jerusaléncho kaykaq profëtakunaqa kaykan.Paykunaqa runayuq warmiwanmi kakun, lulakärin y fiyu runakunata shakyätsin lutanta rurananpaq.Sodoma y Gomorra markakunacho taqkunanömi tsay profëtakuna jutsata rurarkaykan.Paykunata rikakurmi wakin runakunapis jutsa rurayta mana kacharintsu”.*
15 Tsayno kashqanpitami lapanta mandaq TAYTA DIOS tsay profëta tukuqkunapaq kayno nin:“Jerusaléncho kaq profëtakuna lutanta ruraptinmi intëru nacionchöpis mana ali rurayta yachakärishqa.Tsayno kashqanpitami fiyupa asqaq mikuyta mikatsiqno y venenashqa yakuta uputsiqno kay runakunata castigashaq”.*
16 Lapanta mandaq TAYTA DIOS kaynömi nin:“Tsay lula profëtakuna wilakushqanta ama chaskipäkuytsu.Paykunaqa lutantami criyiykatsishunki.Tsaynöpis wilakuynïta wilakunanpa trukanqa kikinkunapa shonqun yarpashqantami wilakärin.
17 Mana cäsukamaqkunata corriginanpa trukanqa kaynömi nipäkun:‘Jawka kawapäkunaykipaqmi TAYTA DIOS nin’.Shonqun munashqanno jutsata ruraqkunatapis kaynömi nipäkun:‘Qamkunataqa manami ima desgraciapis pasashunkipaqtsu’.*
18 “Tsay lula profëtakunaqa manami mayqanpis nawpäman shapäkamushqatsu imata nishqätapis mayapäkunanpaq.Manami mayqanpis nishqäta wilakunanpaq chaskikushqatsu.
19 Löcu tamya y löcu wayra imatapis ushakätsishqannömi noqapis pasaypa rabyakur tsay runakunata ushakätsishaq.
20 Rabyaynïqa manami pasanqatsu lapan yarpashqäkunata manaraq rurayta ushaptïqa.Tiempu pasarkuptinmi tsaytaqa tantiyakärinkipaq.*
21 “Tsay lula profëtakunataqa manami kachamushqätsu.Wilakunanpaqpis manami minkakushqätsu.Tsayno kaptinpis paykunaqa maytsaypa aywarmi noqapa jutïcho wilakurkaykan.
22 Nawpächo rasunpa mayashqa karqa nishqätami kuyashqä runakunata wilapanman karqan.Nishqäta wilakuptinqa jutsa rurayta kacharir alitanami rurapäkunman karqan”.
23 TAYTA DIOSMI kayno nin:“Noqaqa maytsaychöpis kaykämi.Tsaymi Jerusalénpita karucho kaptinpis o cercacho kaptinpis noqaqa tsaycho kaykä.
24 Noqapita ¿piraq pakakunman?Jana patsachöpis kay patsachöpis kaykämi.Noqa TAYTA DIOSMI tsayno nï.*
25 “Noqaqa mayashqämi tsay profëtakuna lulakur jutïcho manakaqkunata wilakärishqanta. Mana revelaykaptïpis paykunaqa nirkaykan sueñuynincho revelashqätami.
26 ¡Imayyaqraq tsay profëtakuna lulakushpan kikinpa yarpaynilanpita wilakärinqa!
27 Paykunaqa sueñushqalanta pitapis wilapaptinmi kuyashqä runakuna qonqaykaman. Tsaynölami unay aylunkunapis Baalta adorashpan qonqaykamarqan.
28 “Tsay lula profëtakuna sueñushqalanta wilakuyta munarqa wilakäritsun.Rasunpa kaq profëtakunaqa revelashqä wilakuynïta wilakäritsun.Punshanpita trïgu mas välishqannömi wilakuynïqa ima suëñupitapis mas välin.
29 Noqapa wilakuynïqa ninanömi y rumita pakiq combunömi kaykan.Noqa TAYTA DIOSMI tsayno nï”.
30 TAYTA DIOSMI kayno nin: “Lulakuq profëtakunataqa manami rikaytapis munätsu. Paykunaqa lula profëta mayinkuna parlashqalantami jutïcho wilakärin.
31 Paykunaqa mana revelaykaptïpis shiminta mishkitsirmi manakaqkunata rimapäkun.
32 Tsaynöpis ‘sueñuynïchömi parlapämashqa’ nirmi kuyashqä runakunata pantakaykätsin. Tsayno kaptinmi paykunataqa rikaytapis mana munätsu. Tsay profëtakunata manami kachashqätsu ni wilakunanpaqpis nishqätsu. Tsaymi imano wilakuptinpis kuyashqä runakunapaq mana välintsu. Noqa TAYTA DIOSMI tsayno nï.
33 “Jeremías, pï runapis, profëtapis o cürapis imata nishqäta tapushuptiki wilanki paykunata manana cäsupänäpaq kashqanta.
34 Cüra karpis, profëta karpis o mayqan runa karpis ‘TAYTA DIOSMI revelamashqa’ nir lulakuptinqa ayluntintami castigashaq.
35 Lulakur wilakunanpa trukanqa reqinakushqantapis o aylunkunatapis tapukunman rasunpa kaq profëta imata nishqantapis.
36 “Mana musyarqa pipis ama nitsuntsu noqa revelashqäta. Pipis lulakur tsayno niptinqa castigashaqmi. Mana revelaykaptï tsayno niqkunaqa wilakuynïtami manakaqman churarkaykan. Noqaqa imayyaqpis kawaq y lapanta mandaq TAYTA DIOSNIKI karmi tsayno nï.
37 “Tsayno kaptinqa imata nishqätapis musyayta munarqa rasunpa kaq profëtata tapukäriy.
38 Mana revelaykaptïqa ama nipäkuytsu qamkunata revelashqäta. Tsaymi rasunpa kaq profëtata tapukunaykipa trukan ‘revelamashqami’ nir lulakuptikiqa
39 castigashayki. Unay ayluykikunata qoykushqä markapitapis karumanmi qarqushayki.
40 Tsayno qarquptïmi qamkuna imaypis penqaycho kankipaq. Qamkunata castigashqätaqa manami imaypis qonqankipaqtsu”.
Ichic wilacuycuna
^ 23.1-4 Eze. 34.1-10; Juan 10.
^ 23.6 Hebreo idiömachömi jutin kanqa Yahweh Tsidkenu.
^ 23.5-6 Jer. 33.14-16; Zac. 3.8; 6.12.
^ 23.7-8 Jer. 16.14-15.
^ 23.9-32 Eze. 13.1-16.
^ 23.10 Kay textucho adulteriupaq parlarqa majayuq kaykar jukwan purikushqanpitami parlaykan y tsaynölami adulteriu jutsata ruraqno Tayta Diosta kacharir juk dioskunata adorashqanpitapis parlaykan.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 23.13 1Rey. 18.20-46; 2Rey. 17.7-18.
^ 23.14 Gén. 18.20.
^ 23.16-17 Jer. 14.13-15; 27.9-10, 16-17.
^ 23.19-20 Jer. 30.23-24.
^ 23.24 Sal. 139.7-12.
