Jeremías 24:1-10
24 Judá nacionpa mandaqnin rey Joacimpa tsurin Jeconíasta, Judá nación autoridäkunata, *artesänukunata y herrërukunata Babilonia nacionpa mandaqnin rey Nabucodonosor nacionninman apakuptinmi* TAYTA DIOS revelamarqan templu punkucho ishkay canastawan hïgus kaykaqta.
2 Jukaq canastachöqa punta poquq hïgus maypis mikukuypaqmi karqan. Jukaq canastachönami pasaypa melanaypaq ismushqa hïguskuna karqan.
3 Tsaymi TAYTA DIOS kayno tapumarqan: “Jeremías, ¿imatataq rikaykanki?”
Tsawraqa kayno nirqä: “Hïgustami rikaykä. Juk canastachömi kaykan maypis mikukuypaq ali hïgus. Jukaq canastachönami kaykan melanaypaq pasaypa ismushqa hïgus”.
4 Tsaymi TAYTA DIOS kayno nimarqan:
5 “Israel runakunata kuyaq TAYTA DIOS kaynömi nin: ‘Babilonia* runakunapa nacionninman prësu apatsishqä Judá runakunata ali hïgustanömi rikashaq.
6 Ima desgraciapitapis tsapashpämi Judá nacionman shuntamur ali kawananpaq yanapashaq. Yapayqa manami ushakätsishaqnatsu ni qarqushaqnatsu.
7 TAYTA DIOSNIN kashqäta tantiyananpaqmi paykunata shumaq tantiyatsishaq. Paykunami kuyashqä runakuna kanqa. Noqanami paykunapa Diosnin kashaq. Lapan shonqunwan yapay yärakamaptinmi tsayno kanqa.
8 “ ‘Judá nacionpa mandaqnin rey Sedequíasta, yanapaqninkunata, Jerusaléncho quëdaq runakunata y Egiptuman qeshpiq runakunatami itsanqa ismushqa hïgusno kananpaq churashaq. Noqa TAYTA DIOSMI tsayno nï.
9 Tsay runakunata castigashqäta musyarmi maytsay nacioncho taq runakunapis mantsakanqa. Maymanpis qarqushqäman chayaptin pïmaypis manakaqman churar jamurpanqa y asipanqa. Pasaypa maldicionädumi kanqapaq.
10 Nacionnincho chipyaq ushakashqanyaqmi wakinkuna guërracho wanunqa, wakinkuna yarqaypita wanunqa y wakinkunanami pesti qeshyawan wanunqa. Tsayno ushakanqa unay aylunkunata y kikinkunata tsay nacionta qoykushqa kaptïpis’ ”.
Ichic wilacuycuna
^ artesänu Artesänukunaqa kaykan carpintërukuna, suëlapita obrakunata ruraqkuna, awaqkuna, mankata ruraqkuna y mas imatapis shumaq yachaq runakunapis.
^ 24.1 2Rey. 24.12-16; 2Crón. 36.10.
^ 24.5 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
