Jeremías 26:1-24
26 Josíaspa tsurin Joacim* Judácho rey kayta qalaykushqan witsanmi Jeremíasta TAYTA DIOS kayno nirqan:
2 “Noqa TAYTA DIOSMI kayno nï: Templu patiuman aywaykur wilanaykipaq lapan nishqäkunata wilakunki. Judácho kaykaq markakunapita templuman adoramaq aywaq runakunata lapanta wilapanki.
3 Tsay runakuna capazchari cäsukushushpayki jutsa ruraykunata kacharinmanpis. Jutsa rurayta kachariptinqa castiganäpaq kaykarpis manami castigashaqnatsu.
4 “Templucho wilakur kayno ninki: ‘TAYTA DIOSMI kayno nin: Qamkunaqa leynïkunata musyaykarpis manami cumpliykankitsu.
5 Sirvimaqnï profëtakuna wilakushqantapis manami cäsukuykankitsu. Wilakärinanpaq paykunata unaypita patsa yaparir yaparirmi kachamushqä.
6 Mana cäsukäriptikiqa Silo markata ushakätsishqänömi* kay templutapis ushakätsishaq. Tsaymi maytsay nacionkunacho taqkuna rikakärinanpaq pasaypa maldicionädu kankipaq’ ”.
7 TAYTA DIOSPA wayincho Jeremías tsayno nishqantaqa cürakuna, profëtakuna y lapan runakunami mayarqan.
8 Tsaymi Jeremíasta prësu tsarirkur kayno nipäkurqan: “¡Kananmi itsanqa wanutsishayki!
9 ¿Imanirtaq TAYTA DIOSPA jutincho niykanki Silo markata ushakätsishqanno kay templutapis ushakätsinanpaq kashqanta? ¿Imanirtaq niykanki kay markatapis ushakätsiptin pipis mana tänanpaq kashqanta?”
Tsayno nishpanmi lapan runakuna Jeremíaspa contran templucho sharkapäkurqan.
10 Tsayno kaykashqanta mayarmi Judá nacionpa autoridäninkuna reypa palaciuncho kaykashqanpita TAYTA DIOSPA wayinman aywapäkurqan. Chayaykurmi runakunata upälatsishpan Mushuq Punku nishqancho jamakärirqan arreglapäkunanpaq.
11 Tsaychömi cürakuna y profëtakuna kayno nipäkurqan: “Tayta autoridäkuna y mayamaqkuna, markantsi ushakänanpaq kashqantami kay runa parlashqa. Nishqantaqa kikikikunapis mayashqankimi. Tsayno parlashqanpita wanutsishun”.
12 Tsayno nipäkuptinmi autoridäkunata y lapan runakunata Jeremías kayno nirqan: “Noqataqa kikin TAYTA DIOSMI kachamashqa kay templuta y kay markata ima pasananpaq kashqantapis qamkunata wilanäpaq. Pay nimashqalantami wilapaykä.
13 Jutsa rurayta kacharir TAYTA DIOSNINTSITA cäsukäriy. Cäsukäriptikiqa castigashunaykipaq nirkurpis manami castigashunkipaqnatsu.
14 “Noqaqa qamkunapa makikichömi kaykä. Munashqaykino imatapis rurapäkamay.
15 Itsanqa tantiyakäriy wilanäpaq kikin TAYTA DIOS kachamashqanta. TAYTA DIOS nimashqanta wilakushqäpita wanutsimarqa jutsayuqmi kapäkunkipaq. Tsaynölami jutsayuq kanqa kay markacho taq lapan runakunapis”.
16 Tsaymi lapan runakuna y mandaqkunaqa cürakunata y profëtakunata kayno nipäkurqan: “Kay runata wanutsinantsipaq manami ima jutsanpis kantsu. Payqa TAYTA DIOSNINTSI nishqalantami wilamashqantsi”.
17 Tsayno niptinmi wakin mayor runakuna ichirkur runakunata kayno nirqan:
18 “Nacionnintsipa mandaqnin rey Ezequías kawashqan witsanpis Moreset markapita kaq profëta Miqueas Judá runakunata wilapar kaynömi nirqan: ‘Lapanta mandaq TAYTA DIOS kaynömi nin:“ ‘*Sión jirkan* barbichashqa chakranömi quëdanqapaq.Jerusalén markata ushakätsiptin raqälanami quëdanqapaq.Templuta juchutsipäkuptin jachakunalanami tsaycho winanqapaq*’.
19 “Tsayno wilakushqanpita rey Ezequías y Judá runakuna manami Miqueasta wanutsirqantsu. Tsaypa trukanqa TAYTA DIOSTA *mantsakushpanmi payta manakärirqan kuyapänanpaq. Tsaynöpami TAYTA DIOS castigananpaq kaykarpis mana castigarqannatsu. Jeremíasta wanutsirqa jutsayuqmi kashunpaq”.
Tsayno niptinmi Jeremíasta mana wanutsipäkurqannatsu.
20 Tsay witsanmi Semaíaspa tsurin Urías TAYTA DIOSPA wilakuqnin profëta karqan. Payqa karqan Quiriat-Jearim markapitami. Jeremías nishqannölami paypis wilakurqan Judá nación y Jerusalén marka ushakänanpaq kashqanta.
21 Pay wilakushqanta rey Joacim y autoridäkuna mayaykurmi wanutsiyta munapäkurqan.
Tsayta musyaykurmi Uríasqa mantsakushpan Egiptupa qeshpir aywakurqan.
22 Uríasta ashimunanpaqmi rey Joacim Egiptuman kacharqan Acborpa tsurin Elnatánta y wakin runakunatapis.
23 Uríasta tariykur apamuptinmi rey Joacim nirqan espädawan wanutsinanpaq y wanurkatsir waktsakuna pampakunan uchkuman ayanta jitaykärinanpaq.
24 Jeremíasta mana wanutsinanpaqmi Safánpa tsurin Ahicam* favornin sharkurqan.
Ichic wilacuycuna
^ 26.1 2Rey. 23.36—24.6; 2Crón. 36.5-7.
^ 26.6 Jerusaléncho templuta manaraq sharkatsiptin puntataqa Tayta Diosta adorananpaq Silo markachömi Tinkuna Tolduta sharkatsirqan (Jos. 18.1). Tsay markatami filisteo runakuna ushakätsirqan (1Sam. 4.1-11).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 26.18 Sión jirkanchöqa templumi karqan.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 26.24 2Rey. 22.8-13.
