Jeremías 27:1-22
27 Josíaspa tsurin Sedequías* Judá nacionpa mandaqnin rey kayta qalaykunan witsanmi Jeremíasta TAYTA DIOS kayno nirqan:
2 “Yüguta rurarkur matankaykiman läzuwan watakuy.
3 Musyashqaykinöpis Edompita, Moabpita, Amónpita, Tirupita y Sidónpitami autoridäkuna Jerusalénman shamushqa rey Sedequíaswan wilanakunanpaq.* Yüguta watakurkur tsay juntakaq runakunata nishqäta wilay.
4 Tsay runakunata ninki nacionninkunaman kutiykur mandaqnin reykunata kayno wilananpaq:
“ ‘Israel runakunata kuyaq y lapanta mandaq TAYTA DIOSMI kayno nin:
5 Munayniyuq karmi kay patsata, runakunata y lapan casta uywakunatapis kamashqä. Pitapis destinashqä runapa makinmanmi tsaykunata churaykä.
6 Kananqa noqami nacionnikikunata Babiloniapa mandaqnin rey Nabucodonosorpa makinman churashqä. Nacionnikicho kaykaq jirka uywakunatapis paypa makinmanmi churashqä.
7 Tsaynölami lapan nación runakuna Nabucodonosorpa munaynincho, tsurinpa munaynincho y wilkanpa munaynincho kanqa. Tsaypitanami atska nacionkuna y munayniyuq reykuna Babilonia soldädukunata vincishpan munayninman churapäkunqa.
8 “ ‘Mayqan nación runakunapis Babiloniapa mandaqnin rey Nabucodonosorpa munaynincho kawayta mana munaptinqa noqami castigashaq. Tsayno castigaptï wakin runakuna guërracho wanunqa, wakinkuna yarqaypita wanunqa y wakinkunanami pesti qeshyawan wanunqa. Tsaynöpami tsay nación runakuna lapan ushakanqa. Noqa TAYTA DIOSMI tsayno nï.
9 “ ‘Tsayno kaykaptinqa Babilonia nacionpa mandaqnin reyta mana sirvipäkunaykipaq pipis shimita jatipäshuptiki ama chaskipäkuytsu. Shimita jatipäkuqkunaqa profëta kashqanta niptinpis, adivinakuq kaptinpis, chäpa suëñu kaptinpis o brüju kaptinpis ama cäsupäkuytsu.
10 Tsayno nishushpayki lulapaykäshunkimi. Paykunata cäsukäriptikiqa markaykikunapita maytsaypa aywakärinaykipaqmi qarqushayki. Tsaychömi wanur ushakankipaq.
11 “ ‘Mayqan nación runakunapis Babiloniapa mandaqnin reyta cäsukur payta sirviq kaqqa jinan nacionninchömi chakrankunata murur kawapäkunqa. Noqa TAYTA DIOSMI tsayno nï’ ”.
12 Judá nacionpa mandaqnin rey Sedequíastapis kaynömi nirqä: “Babilonia nacionpa mandaqnin reypa munaynincho kawapäkuy. Pay mandashqanta y autoridäninkuna mandashqanta imatapis rurapäkuy. Tsayno cäsukurqa jawkami kawapäkunkipaq.
13 Payta mana cäsukurmi itsanqa wanupäkunkipaq. TAYTA DIOS nishqannölami wakinniki guërracho wanupäkunkipaq, wakinniki yarqaypita wanupäkunkipaq y wakinnikinami pesti qeshyawan wanupäkunkipaq.
14 Tsayno kananpaq kaykaptinqa mayqan profëtapis Babiloniapa mandaqnin reyta mana sirvinaykipaq nishuptiki ama cäsupaytsu. Paykunaqa lulapaykäshunkimi.
15 Tsaymi TAYTA DIOS kayno nin: ‘Tsay profëtakunataqa manami kachamushqätsu. Paykunaqa lulakurmi jutïta joqarir rimarkaykan. Tsay profëtakuna nishqanta cäsukäriptikiqa nacionnikipita qarqushaykimi. Tsaynöpami maytsaychöpis wanupäkunkipaq qamkuna y lutanta yätsishuqniki profëtakunapis’ ”.
16 Tsaynölami cürakunata y lapan runakunatapis wilarqä kayno nir: “TAYTA DIOSMI kayno nin: ‘Templupita Babiloniaman apashqan manëjukunata kutitsimunanpaqna kashqanta nishuptiki ama criyipäkuytsu.* Tsayno rimashqanqa manami rasunpatsu kaykan.
17 Tsayno nishushqaykita cäsukärinaykipa trukanqa Babilonia nación reypa makincho kawapäkuy. Paypa makincho kaptikiqa manami wanutsipäkushunkipaqtsu. ¿Imanirtaq markaykikuna ushakanman?
18 Tsay runakuna rasunpa profëta karqa templupita apashqan manëjukunata kutitsimunanpaqna kashqanta manami nishunkimantsu. Tsaypa trukanqa templucho, palaciucho y Jerusaléncho quëdaq kaq manëjukunata Babiloniaman mana apakärinanpaqmi manakamanman’.
19 “Israel runakunata kuyaq y lapanta mandaq TAYTA DIOSMI mastapis kayno nin: ‘Babiloniapa mandaqnin rey Nabucodonosormi nawpata shamur Judá nacionpa mandaqnin rey Jeconíasta* * prësu apakurqan. Tsaynölami prësu apakurqan Judácho y Jerusaléncho kaq respitädu runakunatapis. Itsanqa manami aparqantsu templucho kaykaq broncipita rurashqa ishkay jatunkaray columnakunata, jatunkaray lavatoriuta, carrëtakunata*, Jerusaléncho quëdaq manëjukunata y reypa palaciuncho quëdaq manëjukunatapis.
20 -
21 -
22 Kananmi itsanqa kutimur tsaykunata lapantami Babiloniaman apanqa. Tsaychömi tsararanqa imaypis kayman kutitsimunäyaq. Noqa TAYTA DIOSMI tsayno nï’ ”.
Ichic wilacuycuna
^ 27.1 2Rey. 24.18-20; 2Crón. 36.11-13.
^ 27.3 Tsay runakuna Jerusalénman shamur wilanakurqan Babilonia nacionpa munayninpita yarqupäkunanpaq o mana yarqupäkunanpaqpis.
^ 27.16 Sedequías manaraq rey kaptin templupita wakin manëjukunata Nabucodonosor apakurqan wata 605 a. C. y wata 597 a. C. Tsaypita masta musyanaykipaq liyinki 2Rey. 24.10-13; Dan. 1.1-2.
^ 27.19-21 Jeconíaspa jukaq jutinmi kaykan Joaquín.
^ 27.19-21a 2Rey. 24.8-17; 2Crón. 36.9-10.
^ 27.19-21b 1Rey. 7.13-37.
