Jeremías 30:1-24
30 TAYTA DIOSMI Jeremíasta kayno nirqan:
2 “Israel runakunata kuyaq TAYTA DIOS karmi kayno nï: Lapan nishqäkunata juk rölluman qelqay.
3 Babiloniapita Israel runakunata y Judá runakunata shuntamunäpaq kaq junaqkuna chayamunqanami. Shuntamuptïmi paykunaqa unay aylunkunata qoykushqä nacioncho kushishqa täpäkunqa. Noqa TAYTA DIOSMI tsayno nï”.
4 Israel runakunapaq y Judá runakunapaqmi TAYTA DIOS kayno nin:
5 “¡Fiyupa mantsakar qaparashqanmi mayakämunqa!¡Manami pipis jawkala kawanqatsu!
6 ¿Olqu runa wachanmantsuraq?Tsayno kaptinpis wachay nanaywan warmi tseqlan tsarishqa unchuykachashqannömi paykunapis unchuykachanqa.Lapanpis pasaypa almatakashqami rikakärinqa.
7 Tsay junaqkunanöqa fiyupa mantsakuypaqqa manami imaypis kashqaraqtsu.Tsay witsanqa Jacobpita miraqkuna fiyupami nakanqapaq.Tsayno kaptinpis paykunata salvashaqmi.
8 “Lapanta mandaq TAYTA DIOS karmi kayno nï:Tsay junaq chayamuptinqa fiyupa nakar yüguta apaykaqno y wataraykaqnömi runakuna kanqapaq.Tsayno kaptinmi yüguta pakiqno paykunata salvashaq.Waskata rachiqnömi paykunata libri kacharishaq.Tsayno ruraptïmi juk lädu nación runakunapa munaynincho imaypis yapayqa mana kanqanatsu.
9 Paykunata mandananpaqmi David aylu reyta churashaq.Tsaymi payta cäsukur noqatapis cäsukärimanqa.
10 “Noqa TAYTA DIOSMI kayno nï:Jacobpita miraq sirvimaq runakuna, ama mantsakäriytsu.Karu nacionman apashushqaykipitami qamkunata y qamkunapita lapan miraqkunata jorqamushayki.*Pipis manana mantsakätsishuptikimi nacionnikicho jawkalana kawapäkunkipaq.
11 “Noqa qamkunawanmi kaykä imapitapis salvanäpaq.Tsaymi nacionnikipita qamkunata qarqushqa karpis munaynincho tsararäshuqniki nacionkunata ushakätsishaq.Tsay nacionkunata ushakätsirpis qamkunataqa manami ushakätsishaykitsu.Itsanqa jutsa rurashqayki tupumi castigashayki.Mana castigaypaqa manami kachaykushaykitsu.Noqa TAYTA DIOSMI tsayno nï”.
12 Mastapis TAYTA DIOS kaynömi nin:“Imaypis mana sänaq qerino y imaypis mana aliyaq qeshyanömi nakashqayki kaykan.
13 Manami pipis kantsu qamkunata yanapashunaykipaq ni qerikita jampipäshunaykipaq.Aliyätsishunaykipaq ima jampipis manami kantsu.*
14 “Pasaypa jutsata rurashqaykipitami mana kuyapaypa qamkunata castigashqä.Juk runa contranta mana kuyapaypa maqaqnömi castigashqä.Lapan yanapashuqnikikunapis manami yanapashunkinatsu.Nakaptikipis paykunataqa manami imapis qokuntsu.
15 ¿Imanirtaq nakaykashqaykipita aläpa lakishqa karkaykanki?Nakaykashqaykiqa imaypis mana aliyaq qeshyanömi kaykan.Tsayno qamkunata castigashqä jutsa rurashqaykipita y aläpa mana alikunata rurashqaykipitami.*
16 “Qamkunata castigashqänölami nakatsishuqnikikunatapis castigar ushakätsishaq.Paykunatapis nacionninpita lapantami prësu apapäkunqa.Imaykaykita qechushushqaykinölami kikinkunapatapis qechunqa.Suwapäshushqaykinölami paykunatapis suwapanqa.
17 “Qamkunata manakaqman churashushpaykimi kacharishqäta nipäkushushqanki.Tsayno nishuptikipis kananpitaqa yanapashaykimi.Mana aliyaq qeriwanno nakashqaykipitapis aliyätsishaykimi.Noqa TAYTA DIOSMI tsayno nï”.
18 TAYTA DIOSMI kayno nin:“Jacobpita miraq runakunata aylunpa aylunpa kuyaparmi nacionninman shuntamushaq.Shuntamuptïmi Jerusaléncho juchushqa kaykaq wayikunata yapay sharkatsipäkunqa.Rey tänan palaciutapis kashqalanchömi sharkatsipäkunqa.
19 Tsaymi runakuna agradëcikushpan kushishqa alabamanqa.Atskaman mirananpaq y ali kawananpaq kamakätsiptïmi paykunata pipis manakaqman mana churanqanatsu.
20 Unay kawashqanno ali kawananpaq y nacionnincho yapay alabamänanpaqmi yanapashaq.Paykunata nakatsiq kaqtami itsanqa lapanta castigashaq”.
21 TAYTA DIOSMI kayno nin:“Kuyashqä runakunapa mandaqnin kananpaqmi marka mayinta churashaq.Nawpäman shamunanpaq kikïmi qayashaq.(Mana qayaptïqa manami pipis nawpäman witimuntsu.)
22 Qamkunami kuyashqä runakuna kankipaq.Noqanami qamkunapa Diosniki kashaq”.
23 Löcu tamyano y löcu wayranömi jutsata ruraq runakunata TAYTA DIOS fiyupa rabyar ushakätsinqa.
24 Rabyashqanqa manami pasanqatsu lapan yarpashqankunata manaraq rurayta ushaptinqa.Tiempu pasarkuptinmi tsaytaqa tantiyakärinkipaq.*
Ichic wilacuycuna
^ 30.10 Isa. 49.25.
^ 30.13 Kay textuchömi nakashqankunata qeriman tinkutsin. Jampi mana kantsu ninanqa nakaypita jorqunanpaq pipis mana kantsu ninanmi.
^ 30.12-15 Isa. 1.5-6.
^ 30.23-24 Jer. 23.19-20.
