Jeremías 33:1-26
33 Palaciupa sawannincho Jeremías jinalaraq prësu kaykaptinmi TAYTA DIOS yapay kayno nirqan:
2 “Patsata kamaq y shumaq kananpaq kamakätsiq TAYTA DIOS karmi kayno nï:
3 Manakamay. Manakamaptikiqa mana tantiyashqaykita y mana musyashqaykitami tantiyatsishayki.
4 “Israel runakunata kuyaq TAYTA DIOS karmi kayno nï: Jerusalén runakunaqa wayikunata juchutsir rumikunata y qerukunata murälla nawpanman qotushqa. Tsaynölami reypa wakin wayinkunata juchutsir murälla nawpanman qotushqa. Tsayno rurapäkushqa Babilonia soldädukuna marka murällata mana juchutsinanpaqmi.
5 Murällata tsayno sigurar Babilonia* soldädukunata ichipaptinpis paykunapita pasaypa rabyashqa kar manami defiendikärinanpaq yanapashaqtsu. Tsaymi tsay soldädukuna markaman yaykamur runakunata tsaytsikata wanutsipäkunqa. Wanutsiptinmi maytsaychöpis ayakuna jitarpanqa. Tsayno kanqa jutsata rurashqanpita castigaptïmi.
6 “Tsayno ushakätsiptinpis watakuna pasarkuptinqa qeshyaykaqta jampir aliyätsiqnömi imaypis jawkana kawananpaq yanapashaq.
7 Tsaymi juk lädu nacionkunacho tashqanpita Judá runakunata y Israel runakunata nacionninman shuntamushaq. Unay kawashqanno tsaycho yapay jawkana kawananpaqmi yanapashaq.
8 Mana cäsukamar conträ sharkushqanpita y jutsata rurashqanpitami perdonashaq. Jutsaynaq kananpaqmi lapan jutsankunata maylashaq.
9 Jerusalén runakunata yanapashqäta musyashpanmi lapan nación runakuna mantsakashqa rikakärinqa. Jawka kawapäkunanpaq yanapaptïmi intëru munducho taqkuna kushikushpan alabamanqa”.
10 TAYTA DIOSMI kayno nin: “Qamkunaqa nirkaykanki kay particho runapis y uywapis walkalana kaptin chunyaq jirkanöna kashqanta. Nishqaykinölami Judá markakunachöpis y Jerusalén cällikunachöpis runakuna ni uywakunapis mana kannatsu.
11 Tsayno kaptinpis yapaymi kaycho runakuna kushikärinqa. Casaray fiesta kaptinmi mözupis y jipashpis kuyanakärishpan cantapänakunqa. Runakunapis yapaymi kayno ninqa:“ ‘¡Alilata ruraq kashqanpita lapanta mandaq TAYTA DIOSTA agradëcikushun!¡Kuyapäkuyninqa manami imaypis ushakantsu!’*
“Agradëcikamar templüman ofrendata yapaymi apapäkamunqa. Puntata kashqanno yapay kananpaqmi kuyashqä runakunata juk lädu nacionkunacho tashqanpita nacionninman shuntamushaq. Noqa TAYTA DIOSMI tsayno nï”.
12 Lapanta mandaq TAYTA DIOS kaynömi nin: “Intëru kay nación markakunacho runa mana kaptinpis y uywakuna mana kaptinpis yapaymi uywakunata mitsikärinqa.
13 Jalqakunacho kaykaq markakunachöpis, *Sefelacho kaykaq markakunachöpis, *Neguevcho kaykaq markakunachöpis, Benjamín partichöpis, Jerusalén nawpankunachöpis y intëru Judá nacionchöpis yapaymi rikapäkunkipaq uyshankunata yuparkaykaqta. Noqa TAYTA DIOSMI tsayno nï”.
David aylu reykuna imaypis kananpaq nishqan
14 TAYTA DIOSMI kayno nin: “Tiempu chayamunqanami Israel runakunata y Judá runakunata promitishqänöla yanapanäpaq.
15 Tsay witsanmi David aylupita Renuevo nishqan runata churashaq rey kananpaq. Munashqäno mandarmi kay nacioncho pïmaytapis ali rikanqa.
16 Tsay witsanmi Jerusaléncho y intëru Judácho jawka kawapäkunqa. Tsaymi Jerusalén markapa jutin kanqa TAYTA DIOSMI Salvamaqnintsi*”.*
17 TAYTA DIOSMI kayno nin: “Davidpita miraq runami imaypis Israel runakunapa mandaqnin rey kanqa.*
18 Cürakuna y *levitakuna imaypis kanqami *altarnïcho rupatsina sacrificiuta, tsaki mikuy ofrendata y wakin sacrificiutapis waran waran rupatsipäkunanpaq”.*
19 Jeremíasta TAYTA DIOS mastapis kayno nirqan:
20 “Noqa TAYTA DIOSMI kayno nï: Tsakaywan y junaqwan *pactu rurashqäta cumplirmi intita imaypis jeqatsimü y jeqatsï. Tsay pactuta imaypis cumplishqänömi
21 sirvimaqnï Davidwan pactu rurashqätapis* cumplishaq. Cumpliptïmi paypita miraqkuna imaypis rey kanqa. Tsaynölami imaypis cumplishaq levitakunawan y cürakunawan pactuta rurashqäta. Paykunawanmi pactuta rurarqä imaypis sirvimänanpaq.*
22 Qoylarkuna yupaytapis mana atipaypaq kashqanno y lamar kuchuncho aquyshapis yupayta mana atipaypaq kashqannömi sirvimaqnï Davidpita miraqkuna y sirvimaqnï levitakunapis kanqa”.
23 Jeremíasta TAYTA DIOS mastapis kayno nirqan:
24 “¿Tantiyankiku akrashqä Israel y Judá runakunata manana yanapaykashqäta runakuna rimarkaykashqanta? Tsayno rimarmi manakaqman churar naciontanönatsu rikarkaykan.
25 Tsakaywanpis junaqwanpis pactuta ruraq TAYTA DIOS kar y jana patsapaqpis kay patsapaqpis leyta churaq TAYTA DIOS karmi kayno nï:
26 Jacobpita y sirvimaqnï Davidpita miraqkunata imaypis yanapashaq. Davidwan pactuta rurashqäta cumpliptïmi paypita miraqkuna imaypis rey kanqa. Tsaymi Abrahampita, Isaacpita y Jacobpita miraq runakunapa mandaqnin rey imaypis kanqa. Paykunata kuyaparmi juk lädu nacioncho tashqanpita nacionninman shuntamushaq”.
Ichic wilacuycuna
^ 33.5 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 33.16 Hebreo idiömachömi jutin kanqa Yahweh Tsidkenu.
^ 33.14-16 Jer. 23.5-6; Zac. 3.8; 6.12.
^ 33.17 2Sam. 7.12-16; 1Rey. 2.4; 1Crón. 17.11-14.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 33.18 Núm. 3.5-10.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 33.21a 2Sam. 7.8-16.
^ 33.21b Núm. 25.10-13.
