Jeremías 34:1-22
34 Jerusalén markata y intëru Judá nacioncho kaykaq markakunata Babilonia nacionpa mandaqnin rey Nabucodonosor soldädunkunawan y munaynincho kaq nacionkunapa soldädunkunawan atacaykaptinmi* Jeremíasta TAYTA DIOS kayno nirqan:
2 “Israel runakunata kuyaq TAYTA DIOS karmi kayno nï: Judá nacionpa mandaqnin rey Sedequíasta kayno ninki: ‘TAYTA DIOSMI kayno nin: Kay markata Babilonia nacionpa mandaqnin reypa munayninman entregaptïmi lapanta rupatsinqa.
3 Qamqa manami imanöpapis qeshpinkipaqtsu. Tsaypa trukanqa prësu tsarirkur paypa makinman entregashuptikimi juzgashunkipaq. Nirkurmi Babiloniaman prësu apashunkipaq.
4 “ ‘Judá nacionpa mandaqnin rey Sedequías, tsayno kananpaq kaptinpis noqa TAYTA DIOS niykä guërracho mana wanunaykipaq kashqantami.
5 Tsaypa trukanqa awkinyar ali wanuypa wanuptikimi unay ayluyki reykunata pampashqanno qamtapis inciensuwan qoshtatsir pampashunkipaq. Waqashpanmi kayno nipäkunqa: “¡Ay taytalay tayta Sedequías!” Tsayno kananpaq kashqanta noqa TAYTA DIOSMI nï’ ”.
6 Tayta Dios nishqannölami Judá nacionpa mandaqnin rey Sedequíasta profëta Jeremías Jerusaléncho wilarqan.
7 Tsay hörami Babilonia nacionpa mandaqnin rey soldädunkunawan Jerusalénta atacaykarqan. Tsaynölami atacaykarqan Laquis markata y Azeca markatapis. Judá nacioncho wakin corralashqa markakunataqa maynami vincishqa karqan. Jerusalén, Laquis y Azeca markakunatami itsanqa mana vincirqanraqtsu.
Hebreo mayinkunata ashmay kashqanpita kacharishqan
8 Kaychömi qelqaraykan profëta Jeremíasta Tayta Dios wilapashqan. Tsay witsanmi Jerusaléncho taq runakunawan rey Sedequías wilanakärirqan hebreo mayinkunata olqutapis warmitapis ashmay kashqanpita kacharinanpaq.
9 Tsaymi nipäkurqan pipis ashmayninpaq manana tsararänanpaq kashqanta.
10 Tsayno wilanakurmi lapan autoridäkuna y lapan runakuna ashmayninkunata kacharirqan.
11 Tsaypita tiempu pasarkuptinnami kacharishqanpita lakikur ashmayninkunata olqutapis warmitapis yapay shuntapäkurqan.
12 Tsaymi Jeremíasta TAYTA DIOS kayno nirqan:
13 “Israel runakunata kuyaq TAYTA DIOS karmi kayno nï: Unay ayluykikunata Egiptucho ashmay karkaykaqta jorqamurmi paykunawan *pactuta rurarqä. Pactuta rurarmi nirqä
14 ashmaynin kananpaq rantishqan hebreo mayinkunata soqta wata tsarararkur cada qanchis watachöqa kacharinanpaq.* Tsayno niykaptïpis unay ayluykikuna manami cäsukamashqatsu.
15 “Qamkunaqa nishqäta cäsukurmi hebreo mayiki kaq ashmaynikikunata kacharishqanki. Tsayno kacharinaykipaqmi adoramänayki templuman yaykur nawpächo wilanakurqayki.
16 Tsayno wilanakuykarpis qamkunaqa yapaymi ashmayniki kananpaq olquta y warmitapis shuntapäkushqanki. Kacharinaykipaq nawpächo promitirpis yapay shuntashpayki manakaqmanmi churamashqanki.
17 “Noqa TAYTA DIOSMI kayno nï: Qamkunaqa marka mayikikunata libri kacharinaykipaq nishqäta manami cäsukamashqankitsu. Tsaymi kananqa qamkunata mana yanapashaykinatsu. Mana yanapaptïmi wakinniki guërracho wanupäkunkipaq, wakinniki yarqaypita wanupäkunkipaq y wakinnikinami pesti qeshyawan wanupäkunkipaq. Tsayta mayarmi maytsay nacioncho taq runakuna mantsakanqapaq. Noqa TAYTA DIOSMI tsayno nï.
18 “Marka mayikikunata libri kacharinaykipaq nawpächömi pactuta rurapäkushqanki. Tsay pactuta rurar turituta pulanpa cuartutsaykur aytsanta frenti frenti churapäkushqanki. Nirkur tsay churashqayki aytsakunapa chawpinpa pasarqayki kayno nir: ‘Noqakunatapis ishkayman kutsuqno castigamätsun promitishqäta mana cumpliptïqa’. Tsayno nirkurpis mana cumplishqaykipitami kanan castigashayki.
19 “Aytsakunapa chawpinpa pasar promitimarpis mana cumplipäkushqaykipitami castigashayki Judá nacionpa autoridäninkuna kaptikipis, Jerusalén markapa autoridäninkuna kaptikipis, reypa yanapaqninkuna kaptikipis, cürakuna kaptikipis y pï kaptikipis.*
20 Castigarmi kamakätsishaq contraykikuna wanutsishunaykipaq. Ayaykikuna jitarpaptinmi wiskulkuna y jirka uywakuna mikupäkushunkipaq.
21 “Qamkunata castigashqänölami Judá nacionpa mandaqnin rey Sedequíasta y yanapaqninkunatapis castigashaq. Castigarmi kamakätsishaq Babilonia nacionpa mandaqnin reypa y soldädunkunapa munaynincho kapäkunanpaq. Tsay rey atacarkaykäshushqaykicho witikushqana kaptinpis*
22 yapay atacashunaykipaqmi kutitsimushaq. Vincishushpaykimi wayikikunatapis rupatsir ushapäkunqa. Intëru Judácho kaq markakunatapis ushakätsiptinmi chunyaq rikakunqa. Noqa TAYTA DIOSMI tsayno nï”.
Ichic wilacuycuna
^ 34.1 2Rey. 25.1-11; 2Crón. 36.17-21.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 34.13-14 Éxo. 21.2; Deut. 15.12.
^ 34.18-19 Gén. 15.9-17.
