Jeremías 35:1-19
35 Josíaspa tsurin Joacim* Judá nacionpa mandaqnin rey kaykashqan witsanmi TAYTA DIOS kayno nimarqan:
2 “Recab aylu runakunata templucho kaykaq juk cuartuman pushaykur vïnuta makyanki upunanpaq”.
3 Tsayno nimaptinmi Recab aylu runakunaman aywar tarirqä tocäyü Jeremíaspa tsurin Jaazaníasta, wawqinkunata, tsurinkunata y Recab aylu lapan runakunatapis. Jaazaníasqa Habasiníaspa wilkanmi kaykan.
4 Paykunatami pusharqä Igdalíaspa tsurin profëta Hanánpa discïpulunkuna juntakashqan cuartuman. Tsay cuartuqa altuschömi karqan. Mandaqkunapa cuartun nawpancho y Salumpa tsurin Maasíaspa cuartun jananchömi karqan. Maasíasqa templupa punkun täpaq runami kaykan.
5 Chayaykatsirmi tinäja y väsukuna junta vïnuta apaykur Recab aylu runakunata kayno nir churaparqä: “Kay vïnuta upurkulay, taytakuna”.
6 Tsayno sirviptïmi kayno nipäkamarqan: “Noqakunaqa manami vïnuta upupäkütsu. Unay aylükuna Recabpa tsurin Jonadabmi* yätsirqan paypita miraqkuna vïnuta imaypis mana upupäkunanpaq.
7 Tsaynöpis yätsirqan wayinkunata mana rurapäkunanpaq, mana murukärinanpaq y üvata mana plantapäkunanpaqmi. Tsaynöpis yätsirqan puritsina toldukunalacho tänanpaqmi. Yätsishqanta cäsukur atska wata kay patsacho kawapäkunanpaqmi nishqa.
8 “Tsaymi kikïkunapis, warmïkunapis ni tsurïkunapis unay aylükuna Jonadab lapan nishqanta cäsukur vïnuta mana upupäkütsu.
9 Tsaynölami wayikunatapis mana rurapäkütsu, chakrayuq kaytapis mana munapäkütsu, üvatapis mana plantapäkütsu ni murukärïtsu.
10 Toldukunalachömi tarkaykä. Unay aylükuna Jonadab nishqannölami lapanta rurapäkü.
11 “Itsanqa Babiloniapa mandaqnin rey Nabucodonosor kay nacionta atacaptinmi Jerusalénman shapäkamushqä. Babilonia* y Siria nación soldädukunapita qeshpimurmi kanan Jerusaléncho tarkaykä”.
12 Recab aylu runakuna tsayno niptinmi Jeremíasta TAYTA DIOS kayno nirqan:
13 “Judácho y Jerusaléncho kaykaq runakunata kayno wilay: ‘Israel runakunata kuyaq y lapanta mandaq TAYTA DIOS kaynömi nin: Tantiyakärinaykipaq kanan nishqäta shumaq mayapäkamay.
14 Vïnuta mana upunanpaq tsurinkunata Jonadab yätsishqanta cäsukärishpanmi kananyaqpis paypita miraqkuna mana upupäkuntsu. Qamkunaqa unaypita patsa yaparir yaparir wilapaykaptïpis manami cäsukamankitsu.
15 “ ‘Wilapäshunaykipaqmi sirvimaqnï profëtakunata unaypita patsa yaparir yaparir kachamushqä. Nishqäta wilashushpaykimi nipäkushushqanki mana alikunata mana rurapäkunaykipaq y juk dioskunata mana adorapäkunaykipaq. Tsaynöpis nishushqanki jutsa ruraykunata kacharir unay ayluykikunata y qamkunata qoykushqä nacioncho kawapäkunaykipaq kashqanta. Profëtakunawan tsayno wilaykätsiptïpis manami cäsukamashqankitsu.
16 Recabpa tsurin Jonadabpita miraqkunaqa unay aylun yätsishqankunata cäsukärinmi. Kuyashqä runakunami itsanqa nishqäkunata mana cäsukamantsu.
17 “ ‘Israel runakunata kuyaq y lapanta mandaq TAYTA DIOS karmi kayno nï: Judá runakunaqa y Jerusaléncho taq runakunaqa yätsiptïpis manami cäsukamantsu. Ni tantiyatsiptïpis manami mayakamantsu. Mana cäsukamaptinmi castiganäpaq nishqänöla fiyupa castigashaq’ ”.
18 Recab aylu runakunata Jeremías kayno nirqan: “Kuyamaqnintsi y lapanta mandaq TAYTA DIOS kaynömi nin: ‘Unay ayluyki Jonadab nishqanta cäsukushqaykipitami
19 Jonadabpita miraqkunacho kanqa imaypis sirvimänanpaq. Israel runakunata kuyaq y lapanta mandaq TAYTA DIOS karmi tsayno nï’ ”.
Ichic wilacuycuna
^ 35.1 2Rey. 23.36—24.6; 2Crón. 36.5-7.
^ 35.6 Jonadab kawarqan ishkay pachak (200) watano Jeremías manaraq kawaptin. Jonadabpita masta musyanaykipaq liyinki 2Rey. 10.15-16.
^ 35.11 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
