Jeremías 37:1-21
37 Josíaspa tsurin Sedequíasnami Joacimpa tsurin Coníaspa* trukan Judá nacioncho rey karqan. Rey kananpaqmi Babiloniapa mandaqnin rey Nabucodonosor churarqan.
2 Manami rey Sedequíaspis, yanapaqninkunapis ni Judá runakunapis cäsukurqantsu profëta Jeremíaswan TAYTA DIOS wilakatsishqanta.
3 Juk junaqmi rey Sedequías Selemíaspa tsurin Jucalta y Maasíaspa tsurin cüra Sofoníasta kacharqan profëta Jeremíasta ruwakur kayno ninanpaq: “TAYTA DIOSNINTSITASHI manakuykulanki noqakunata yanapamänanpaq”.
4 Tsay witsan manaraq prësu tsariptinmi Jeremías libri puriykarqan.
5 Tsaynöpis tsay witsanmi Babilonia* soldädukuna mayapäkurqan Jerusalén runakunata yanapananpaq Faraónpa soldädunkuna Egiptupita aywarkaykämushqanta. Tsayta mayaykurmi Jerusalénta jiruruypa tsaparpaykashqanpita Babilonia soldädukuna aywapäkurqan paykunawan pelyananpaq.
6 Tsaymi profëta Jeremíasta TAYTA DIOS kayno nirqan:
7 “Israel runakunata kuyaq y lapanta mandaq TAYTA DIOS karmi kayno nï: Manakamänaykipaq tsayno ruwakushuptiki Judá nacionpa mandaqnin reyta kayno ninki: ‘Qamkunata yanapashunaykipaq shamurpis Faraónpa soldädunkuna manami yanapashunkipaqtsu, sinöqa nacionninmanmi kutikärinqa.
8 Tsayta rikarmi Babilonia soldädukuna kutimur Jerusalénta atacar munayninman churanqa. Nirkurnami wayikunatapis chipyaq rupatsir ushanqa.
9 “ ‘Noqa TAYTA DIOSMI kayno nï: Babilonia soldädukuna mana kutimunanpaq kashqanta ama yarpapäkuytsu. Atacashunaykipaq paykuna kutipäkamunqami.
10 Tsay soldädukunata wanutsipäkuptikipis juk ishkay quëdaqkuna wanunaykarpis toldunkunacho jitaraykashqanpita sharkurkurmi kay markata rupatsipäkunqa’ ”.
Jeremíasta carcilman wichqashqan
11 Faraónpa soldädunkuna aywaykämushqanta musyar Babilonia soldädukuna aywakushqana kaptinmi
12 Jerusalénpita Jeremías yarquykarqan Benjamín particho aylunkunawan herenciata rakipänakunanpaq.
13 Benjamín Punku nishqanpa Jerusalénpita yarquykaqtami punku täpaqkunapa capitannin Irías prësu tsariykur kayno nirqan: “¡Qamqa Babilonia soldädukunaman qelikuqmi aywaykanki!”
(Iríasqa Selemíaspa tsurin y Hananíaspa wilkanmi karqan.)
14 Tsayno niptinmi Jeremías kayno nirqan: “¡Manami Babilonia soldädukunamantsu aywaykä!”
Niykaptinpis mana mayaq tukushpanmi Jeremíasta prësu tsarirkur mandaqninkunaman Irías aparqan.
15 Chayaykatsiptinmi mandaqkuna pasaypa rabyakushpan Jeremíasta maqarkatsir carcilman wichqatsirqan. Tsay carcilqa nawpata secretariu Jonatánpa wayinmi karqan.
16 Tsay wayi rurincho kaykaq pözuchömi atska junaq Jeremíasta winarätsirqan.
17 Tsaypitami rey Sedequías palaciunman qayaykatsir Jeremíasta pakaylapa kayno tapurqan: “¿Imalataqa TAYTA DIOS wilashushqankiku?”
Tsayno tapuptinmi Jeremías kayno nirqan: “Wilamashqami, tayta. Babilonia reypa munayninchöshi qam kankipaq”.
18 Nirkurnami rey Sedequíasta Jeremías kayno tapurqan: “Tayta rey, ¿imatataq qampa contrayki rurashqä carcilman wichqatsimänaykipaq? Tsaynöpis yanapashuqnikikunapa contran y Judá runakunapa contran ¿imatataq rurashqä?
19 Babiloniapa mandaqnin rey mana atacamänantsipaq kashqanta niq profëtaykikuna ¿maytaq?
20 Imano kaptinpis secretariu Jonatánpa wayincho kaykaq carcilman amana yapay kutitsimaytsu, tayta rey. Tsayman wichqatsimaptikiqa wanushaqchari. Ruwakushqäta awniykalämay, tayta rey”.
21 Tsayno ruwakuptinmi rey Sedequías awnir nirqan palaciu sawanlancho prësu wichqarätsinanpaq. Tsaynöpami Jeremías prësu wichqararqan palaciu sawancho. Nirkurmi Sedequías ordenarqan kayno nir: “Jerusaléncho tanta ushakashqanyaq Tanta Ruraqkuna nishqan cällipita waran waran juk tantata Jeremíaspaq apapay”.
Ichic wilacuycuna
^ 37.1 Coníaspa jukaq jutin Joaquínmi karqan. Joaquínpita masta musyanaykipaq liyinki 2Rey. 24.8-17; 2Crón. 36.9-10.
^ 37.5 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. Tsaynölami kaykan Jer. 37.8-9, 11, 13 versïculukunachöpis.
