Jeremías 38:1-28
38 Matánpa tsurin Sefatías, Pasurpa tsurin Gedalías, Selemíaspa tsurin Jucal y Malquíaspa tsurin Pasur mayarqan lapan runakunapa nawpancho Jeremías kayno wilakushqanta:
2 “TAYTA DIOSMI kayno nin: ‘Kay markacho quëdaqkunaqa wakinkuna guërracho wanunqa, wakinkuna yarqaypita wanunqa y wakinkunanami pesti qeshyawan wanunqa. Kaypita qeshpir Babilonia* runakunaman qelikuqkunami itsanqa kawaykanqaraq’.*
3 “Mastapis TAYTA DIOS kaynömi nin: ‘Babiloniapa mandaqnin reymi soldädunkunawan kay markata vincirkur munaynincho tsararanqapaq’ ”.
4 Jeremías tsayno wilakushqanta mayaykurmi tsay autoridäkuna reyman aywaykur kayno nirqan: “Kay runataqa wanutsishun. Tsayno rimarmi kaycho kaykaq soldädukunata y lapan runakunatapis mantsariykätsin. Nacionnintsi salvakunanta kay runa manami munantsu, sinöqa desgracia pasanantami munaykan”.
5 Niptinmi rey Sedequías kayno nirqan: “Makikichömi kaykan. Imatapis yarpashqaykita rurapäkuy. Wanutsiyta munaptikipis qamkunataqa manami michämantsu”.
6 Tsayno niptinmi reypa tsurin Malquíaspa mitu pözunman waskawan watarkur Jeremíasta winarqan. Tsay pözuqa karqan carcilpa sawanninchömi. Tsaycho mitu atska kaptinmi Jeremías ruriyaq jatikarqan.
7 Etiopía runa Ebed-melecmi mayarqan Jeremíasta pözuman winashqanta. Pay karqan palaciucho autoridämi. Tsay hörami Benjamín Punku kaqcho reyqa sesionta ruraykarqan.
8 Palaciupita rey kaqman aywaykurmi Ebed-melec kayno nirqan:
9 “Tayta rey, profëta Jeremíasta mitu pözuman winashpan tsay runakuna pasaypa mana alitami rurashqa. Tsaychöqa yarqaypitachari wanunqapaq. Mikuypis markacho manami kannatsu”.
10 Tsayno niptinmi Ebed-melecta rey kayno nirqan: “Kimsa chunka (30) runakunata pushakurkur ayway profëta Jeremías manaraq wanuptin jorqapäkamunaykipaq”.
11 Tsaymi runakunata pushakurkur Ebed-melec aywarqan reypa palaciuncho kaq makwa röpakuna churaräkunanman. Tsaypita latsapakunata apakurkur aywarmi Jeremíasta waskawan tsay latsapata jitaparqan.
12 Jitaparmi Ebed-melec Jeremíasta kayno nirqan: “Waska mana nanätsishunaykipaq tsay latsapakunata chiklaskuykiman* churakuy”.
Nishqannölami Jeremías watakurqan.
13 Shumaq watakurkuptinnami waskawan tsutaypa pözupita jorqapäkamurqan. Tsaypitanami carcilpa sawannincho Jeremíasta prësu wichqatsirqan.
Jeremíasta rey Sedequías qayatsishqan
14 Tsaypita juk junaqmi templuman yaykuna kimsa kaq punkuman rey Sedequías profëta Jeremíasta qayatsirqan. Tsaychömi kayno nirqan: “Imatapis mana pakaypa rasun kaqta wilamay”.
15 Tsawraqa Jeremías kayno nirqan: “Tayta rey, rasun kaqta wilaptïqa wanutsimankichari. Yätsiptïpis manami chaskimankitsu”.
16 Tsayno niptinmi rey Sedequías jurashpan kayno nirqan: “Manami wanutsishaykitsu ni wanutsiyta munashuqniki runakunapa makinmanpis kachapäshaykitsu. Tsay nishqäta cumplinäpaqmi kawayta qomaqnintsi TAYTA DIOSPA jutincho jurä”.
Rey Sedequías shapshapyaylapa tsayno jurarqan wakinkuna mana mayananpaqmi.
17 Tsaymi Sedequíasta Jeremías kayno nirqan: “Israel runakunata kuyaq y lapanta mandaq TAYTA DIOS kaynömi nin: ‘Babiloniapa mandaqnin rey kachamushqan capitankunaman jukla rindikuptikiqa manami qamta ni ayluykikunatapis wanutsishunkipaqtsu. Tsayno ruraptiki kay markatapis manami rupatsinqatsu.
18 Paykunaman mana rindikuptikimi itsanqa Babilonia soldädukuna yaykamur kay markata rupatsir ushanqa. Tsayno ruraptin qampis manami qeshpinkipaqtsu’ ”.
19 Tsawraqa Sedequías kayno nirqan: “Babilonia soldädukunaman aywarqa paykunapa makincho kaykaq Judá mayintsikuna maqamänantami mantsakü”.
20 Tsayno niptinmi Jeremías kayno nirqan: “TAYTA DIOS niykäshuptikiqa cäsukuy, tayta. Cäsukurqa paykunapa makinman manami chayankipaqtsu, sinöqa alimi kawankipaq.
21 Mana aywaptikiqa kay markata ushakätsinanpaq kashqantami TAYTA DIOS musyatsimashqa.
22 Palaciuykicho quëdaq warmikunata lapantami Babiloniapa mandaqnin rey kachamushqan capitankuna apakärinqa. Salvayta mana kamäpakuptikimi tsay warmikuna kayno nishunkipaq:“ ‘Pasaypa alimi amïguykikunaqa ¿aw?¡Lulapäshushpaykimi traicionashushqanki!¡Mituman jatikashqano kaptiki manami mayqanpis yanapashunkitsu!’ ”
23 Rey Sedequíasta mastapis Jeremías kayno nirqan: “Tayta rey, warmikikuna y tsurikikuna lapanmi Babilonia soldädukunapa makincho kanqa. Qampis qeshpiyta mana kamäpakurmi Babiloniapa mandaqnin reypa munaynincho prësu kankipaq. Paymi soldädunkunata mandanqa kay markata rupatsir ushananpaq”.
24 Tsayno niptinmi Jeremíasta Sedequías kayno nirqan: “Autoridäkuna wanutsishunaykita mana munarqa nimashqaykita ama pitapis wilapaytsu.
25 Parlashqantsita mayaykurqa autoridäkuna tapushunkipaqmi. Tsaynöpis nipäkushunki lapan nimashqaykita mana wilaptikiqa wanutsishunaykipaq kashqantami.
26 Tsayno nishuptiki parlashqantsita imatapis ama wilaytsu. Tsaypa trukanqa ninki Jonatánpa wayinman prësu mana kutitsinäpaq y tsaycho mana wanunaykipaq ruwakamashqaykita”.
27 Rey nishqannölami lapan autoridäkuna Jeremías kaqman aywaykur tapurqan. Tapuptinpis rey yachatsishqannölami Jeremías nirqan. Jeremíaswan rey parlashqanta mayqanpis mana mayashqa karmi mas imatapis mana rimakuypa yarqukurqan.
28 Jerusalénman Babilonia soldädukuna yaykushqan junaqyaqmi carcilpa sawannincho Jeremías prësu wichqararqan.
Ichic wilacuycuna
^ 38.2 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. Tsaynölami kaykan Jer. 38.18-19, 23 versïculukunachöpis.
^ 38.12 Wakin runakunaqa chiklawshuykiman nipäkun.
