Jeremías 4:1-31
4 Tsayno nir manakäriptinmi TAYTA DIOS kayno ninqa: “Israel runakuna, noqaman kutimuyta munarqa jutsa ruraykunata kachariy. Ïduluykikunata jitarir noqa munashqäno kawapäkuy.
2 Sirvimänaykipaq lapan shonquykiwan promitimaptikiqa maytsay nacionkunapaqmi bendición kapäkunkipaq. Tsaynöpami maytsaychöpis runakuna noqata alabapäkamanqa”.
3 Jerusalén runakunata y Judá runakunatami TAYTA DIOS kayno nin:“Purun chakrata kichaqno shonquykita kichapämay.*Mana kichapämarqa kasha chakralaman muruqnömi karkaykanki.
4 *Pactu rurashqantsita cumplinaykipaq shonquykita señalakäriy.* *Tsayno mana ruraptikiqa fiyupami rabyakushaq.Rabyakuptïqa manami imanöpapis pasatsiyta kamäpakunkipaqtsu”.
Judá nación runakunata castigananpaq Tayta Dios nishqan
5 “Jerusaléncho y Judácho taqkunata kayno wilay:‘¡Atacashunaykipaq shamuptin *cornëtata tukapäkuy!*¡Corralashqa markaykikunaman jukla amparakunaykipaq qayakäriy!
6 Noqaqa norti lädupitami soldädukunata kachamushaq atacashunaykipaq.¡Runakuna *Siónman qeshpir amparakärinanpaq bandërata ichitsipäkuy!¡Jukla qeshpipäkuy!
7 “ ‘Maytsay nacionkunata ushakätsiqmi atska soldädukuna aywaykämun.Mikanashqa león muntipita yarqamuqnömi yarqaykämun.Wanutsishuptikimi markaykikunapis raqälana rikakunqa.
8 Tsayno pasashunaykipaq kaykaptinqa lakikushpayki qachqa röpakunata jatikäriy.Pasaypa waqashpayki qaparpay.Fiyupa rabyashqätaqa manami imanöpapis pasatsinkipaqtsu’ ”.
9 TAYTA DIOSMI kayno nin:“Tsay junaq chayamuptinqa reypis autoridäkunapis mantsakurmi siksikyanqapaq.Tsaynölami cürakunapis y lula profëtakunapis fiyupa mantsakur ukakashqa rikakunqapaq”.
10 Tayta Dios tsayno nimaptinmi kayno nirqä: “¡Ay TAYTA DIOS! ¿Imanirtaq Jerusalén runakunata lulapashqanki? ¿Imanirtaq profëtakunata kacharqayki Jerusalén runakunata imapis mana pasananpaq kashqanta wilakärinanpaq? Tsayno wilakäriptinpis kananqa kunkanman cuchillun churashqanömi karkaykan”.
11 Tayta Dios kaynömi nimarqan: “Tsay witsanmi Jerusalén runakunata wilapäkunqa chunyaq tsaki jirkapita akaq wayrata wayraykätsimushqäta. Tsay wayraqa manami trïguta wayrananpaqnötsu kanqa,
12 sinöqa pasaypa löcu wayrami kanqa. Tsay wayrataqa kikïmi wayrätsimushaq. Tsaywanmi Jerusalén runakunata fiyupa castigashaqpaq”.*
13 Tsayta rikarmi Jerusalén runakuna kayno nipäkunqa:“¡Chikimaqnintsikunaqa yanawyaykaq pukutaynöraqmi aywarkaykämun!¡Guërra carrëtankunapis löcu wayranöraqmi aywaykämun!¡Cawallunkunapis anka aywashqanpitapis masmi cörriykämun!¡Kananchi kananlaqa!¡Manami imanöpa qeshpiytapis kamäpakushuntsu!”
14 Jerusalén runakuna, salvakärinaykipaq jutsa rurashqaykita kacharir shonquykita maylapäkuy.¡Imayyaqraq jutsa ruraylapaq yarpachakurkaykanki!
15 Dan markapita patsa y Efraín jalqakunapita patsami desgracia chayamunanpaq kaqta wilakarkaykämun.
16 Tsayno kaptinqa Jerusaléncho taqkunata y cercan nacioncho taqkunatapis wilapäkuy karu nacionpita contrankuna aywaykämushqanta.Tsay contrankunaqa Judá nacionman yaykur atacananpaqmi qapararraq aywarkaykämun.
17 Jerusalénman chayaykurmi tumariq corralapäkunqa.Chakrata shumaq tsaparaq qenchanömi tsaparpanqa.Akrashqä runakunata tsayno pasanqa conträ rikakärishqanpitami.Noqa TAYTA DIOSMI tsayno nï.
18 Judá runakuna, mana cäsukuypa lutanta rurapäkushqaykipitami tsayno pasashunkipaq.Tsayno pasashuptiki fiyupa lakikur shonquykikunapis nananqaraqmi.
Jeremías pasaypa lakikushqan
19 ¡Ay shonqulaw shonqu!¡Lakikuptï shonqü tsapakayparaqmi nanan!¡Manami upälakuytapis kamäpakütsu!Pelyapaq *cornëta waqamuqtami mayashqä.*Soldädukuna qaparar shamurkaykaqtami mayashqä.
20 Yaparir yaparir desgracia pasaptinmi intëru nacionnintsi ushakaykan.Patsakunantsipaq tolduntsikunatapis wayintsikunatapis elaqpitami ushakätsishqa.
21 Guërracho cornëta waqamuqta ¡imayyaqraq mayaykäshaq!Atacamaqnintsi soldädukuna bandëran aptashqa aywaykämuqta ¡imayyaqraq rikaykäshaq!
22 TAYTA DIOSMI kayno nin:“Akrashqä runakunaqa mana tantiyakuq karmi nishqäta mana tantiyapäkuntsu.Paykunaqa upa y toqshun tsakishqa wamranömi karkaykan.Ali ruraytaqa manami yachantsu.Mana alita rurananpaqmi itsanqa juiciunpis kan”.
Desgracia pasananpaq kashqanta revelacioncho Jeremías rikashqan
23 Pasaypa ushakashqa kaykaqta y chunyaraykaqtami kay nacionta revelacioncho rikashqä.Jana patsachöpis manami ima atsikyaypis kashqatsu.
24 Jirkakunatapis siksikyaykaqtami rikashqä.Jirkankunapis sinigano marmaryaykaqtami rikashqä.
25 Rikachakur manami pï runatapis rikashqätsu.Pishqukunapis lapanmi aywakärishqa.
26 Tsaynölami rikashqä ali wayuq chakracho polvulana sharkuykaqta.Lapan markakunatapis chunyaraykaqtami rikashqä.TAYTA DIOS pasaypa rabyakurmi lapantapis tsayno ushakätsishqa.
27 TAYTA DIOSMI kayno nin:“Intëru kay nacioncho kaqta ushakätsirpis wakintaqa katuykushaqraqmi.
28 Ushakätsinäpaq nishqätaqa cumplishaqmi.Ushakätsiptïqa kay patsapis fiyupami lakikunqa.Jana patsapis pasaypami tsakakäkunqa.
29 “Cawallun muntashqa soldädukuna patatarraq aywaykämuqta mayar lapanmi qeshpipäkunqa.Flëchan aptashqa aywaykämuqta rikar lapanmi markapita qeshpir aywakärinqa.Muntikuna rurinmanmi pakakärinqa.Qaqa chawpinkunamanmi qeshpir witsäpäkunqa.Lapan markakuna ushakashqa kaptinmi mana pipis tsaycho tanqanatsu.
30 “Tsayno kananpaq kaykaptinqa ¿imatataq ruraykanki, Jerusalén?*¿Imapaqnataq puka röpatapis jatikunki?¿Imapaqnataq qori alhäjatapis churakunki?¿Imapaqnataq nawikitapis pintakunki?Kuyaylapaq kashqaykipis manakaqlapaqmi kaykan.Kuyashqayki runakunaqa* lapanmi melanäshunki.Paykunaqa wanunaykitami munarkaykan.
31 “Qechpa wawanta wachakushpan qaparaqno qaparaykaqtami mayaykä.*Siónmi tsayno qaparaykan.Makilan choqpashqa qapararmi kayno nin:‘¡Kaychi kaylaqa! ¡Kananlapaqnachari karqä!¡Wanutsikuqkunami wanutsimanqa!’ ””
Ichic wilacuycuna
^ 4.3 Ose. 10.12.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 4.4 Cuerpunta señalar chiwlakunanpa punta qaranta kutsurir jorqushqannömi shonqunta señalar jutsa rurayta kacharin.
^ 4.4 Deut. 10.16; 30.6; Rom. 2.25-29.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 4.5 Tsay witsan atacananpaq soldädukuna shamuptin cornëtata tukapäkurqan. Tsaynöpami runakuna musyapäkurqan amparakuq qeshpinanpaq o pelyaq aywananpaqpis.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 4.12 Kay versïculuchöqa akaq wayrapaq parlar atacananpaq shamuq soldädukunapaqmi parlaykan.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 4.19 Kay versïculukunacho Jeremías wilakun revelacioncho rikashqantami.
^ 4.30a Kay versïculuchöqa Jerusalén runakunata tinkutsin wayrapakuq warmiman.
^ 4.30b Kuyashqan runakunaqa Egipto runakunami karqan. Paykunawanmi Jerusalén runakuna pactuta rurarqan guërra kaptin soldädunkuna shamur pelyäshinanpaq. Tsaypita masta musyanaykipaq liyinki Jer. 2.36-37.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
