Jeremías 40:1-16
40 Kaychömi qelqaraykan Jeremíasta TAYTA DIOS nishqan. Jerusalén runakunata y Judá runakunata cadinawan liyarkurmi Ramá markaman soldädukuna shuntarqan tsaypita Babiloniaman prësu apapäkunanpaq. Jeremíastapis tsaycho wataraykaqta tariykurmi wardiakunapa capitannin Nabuzaradán
2 kayno nirqan: “Kay markata desgracia pasananpaq TAYTA DIOSNIKI nishqannölami
3 cumpliykan. Marka mayikikunata tsayno castigaykan pay nishqanta mana cäsukur jutsata rurapäkushqanpitami.
4 “Cadinawan makipita liyaraykaqta paskariptï manami prësunatsu kankipaq. Babiloniaman aywayta munaptikiqa aku aywakushun. Tsaycho ali kawanaykipaq noqami yanapashayki. Aywayta mana munarqa kaycho quëdakuy. Kay nacioncho maylachöpis gustashqaykicho täkuy.
5 “Kay nacionlacho quëdakuyta munarqa Ahicampa tsurin y Safánpa wilkan Gedalías kaqman aywakuy Judá mayikikunawan tsaycho juntu tänaykipaq. Gedalíastaqa Judá runakunapa gobernadornin kananpaqmi Babiloniapa mandaqnin rey churashqa. Kaycho quëdanaykipaq o noqawan aywanantsipaq qampitami kaykan”.
Tsayno nirmi mikuyta y qellayta kamariparkur Jeremíasta kachaykurqan.
6 Tsaypitami Ahicampa tsurin Gedalías kaqman Jeremías aywakurqan. Paypa makinchömi Judácho quëdaq runakunawan juntu tarqan.
Gedalías gobernador kashqan
7 Judá runakunapa wakin soldädunkuna y capitanninkuna karucho taptinmi Babilonia soldädukuna prësu mana tsaripäkurqantsu. Paykunami mayapäkurqan Ahicampa tsurin Gedalíasta gobernador kananpaq Babiloniapa mandaqnin rey churashqanta. Tsaynöpis mayapäkurqan Babiloniaman prësu mana aywaq olqukunapis, warmikunapis y wamrakunapis Gedalíaspa makinchöna kashqanta. Prësu mana aywaq runakunaqa waktsa runakunami karqan.
8 Tsayta mayaykurmi mandashqan runakunata pushakurkur tsay capitankuna aywarqan Gedalías kaqman. Gedalíasqa Mizpachömi kaykarqan. Aywaq runakuna karqan Netaníaspa tsurin Ismael, Careapa tsurinkuna Johanán y Jonatán, Tanhumetpa tsurin Seraías, Netofacho taq Efaipa tsurinkuna, Maacatcho taq runapa tsurin Jezanías y paykuna mandashqan lapan runakuna.
9 Chayaykuptinmi Ahicampa tsurin y Safánpa wilkan Gedalías tsay capitankunata y paykunawan aywaqkunata kayno nipäkurqan: “Diospa jutinchömi qamkunata nï Babilonia* runakunapa makincho karpis mana mantsakärinaykipaq. Babilonia nacionpa mandaqnin rey nimashqantsita rurar alimi kawapäkushunpaq.
10 Noqaqa kay Mizpachömi täshaq Babilonia autoridäkuna shamuptin qamkunapa favorniki parlanäpaq. Qamkunaqa maychöpis tashqaykicho üvata, hïgusta, dätilta* y olïvupita rurashqa aceitita wayikikunaman atskata shuntapäkuy”.
11 Tsaynölami Moabcho, Amóncho, Edomcho y juk lädu nacionkunacho kaykaq Judá runakunapis mayapäkurqan Babiloniapa mandaqnin rey juk ishkay Judá mayinkunata kachaykushqanta y Gedalíasta paykunapa gobernadornin kananpaq churashqanta.
12 Tsayta mayaykurmi qeshpishqan nacionkunapita Judácho kaykaq markankunaman kutipäkamurqan. Kutimurmi Gedalíaswan parlananpaq Mizpaman aywapäkurqan. Nirkurnami paykunapis markankunaman kutiykur üvata, hïgusta y dätilta atskata shuntapäkurqan.
Gedalíasta wanutsiyta munashqanta Johanán musyashqan
13 Tsay junaqkunalanami Careapa tsurin Johanán y mana rindikuq soldädukunapa capitanninkunapis Mizpaman aywapäkurqan Gedalíaswan parlamunanpaq.
14 Chayaykärirmi kayno nipäkurqan: “Amón nación runakunapa mandaqnin rey Baalismi Netaníaspa tsurin Ismaelta wanutsishunaykipaq kachamushqa”.
Tsayno niptin Gedalías manami criyirqantsu.
15 Tsaymi Careapa tsurin Johanán pakaylapa Gedalíasta Mizpacho kayno nirqan: “Imapis manaraq pasashushqaykiyaq pakaylapa aywaykur Netaníaspa tsurin Ismaelta wanutsishaq. Tsayta manami pipis musyanqatsu. Wanutsishuptikiqa makikicho kaykaq lapan Judá mayintsikunapis mantsakärishpan maytsaypachari qeshpir aywakärinqa”.
16 Niptinmi Gedalías kayno nirqan: “Ismaelpaq nishqayki manami rasunpatsu. Payta ama wanutsiytsu”.
Ichic wilacuycuna
^ 40.9 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. Tsaynölami kaykan Jer. 40.10 versïculuchöpis.
^ 40.10 Dätilqa juk casta palmërapa wayuyninmi kaykan.
