Jeremías 43:1-13
43 TAYTA DIOS tsayno nishqanta Jeremías wilayta usharkuptinmi
2 Osaíaspa tsurin Azarías, Careapa tsurin Johanán y paykunawan kaykaq runakunapis runa tukushpan kayno nipäkurqan: “¡Qamqa lulakuykankimi! ¡TAYTA DIOSNINTSI manami nishushqankitsu Egiptuman mana aywapäkunäpaq!
3 Tsaytaqa Neríaspa tsurin Barucmi yachaykätsishunki Babilonia* runakunapa makincho kanantsita munar. Barucqa munaykan Babilonia runakuna wanutsipäkamänanta o prësu apapäkamänantami”.
4 Tsayno nirmi Careapa tsurin Johanán, capitankuna y paywan kaykaq lapan runakuna Judácho quëdananpaq TAYTA DIOS nishqanta mana cäsukärirqantsu.
5 Cäsukunanpa trukanqa Johanán y capitankuna Judácho taykaq runakunata pushakurkur Egiptupa aywakärirqan. Tsay pushashqan runakuna maytsay nacionman qeshpishqanpita tsayraq Judáman kutimuq runakunami karqan.*
6 Paykunawanmi aywakärirqan Gedalíaspa makincho Nabuzaradán kachaykushqan runakuna, warmikuna, wamrakuna y Judá nacionpa mandaqnin reypa jipash tsurinkuna. Tsaynölami profëta Jeremías y Neríaspa tsurin Barucpis paykunawan aywakärirqan.
7 TAYTA DIOS nishqanta mana cäsukurmi Egiptupa aywakur Tafnes markayaq chayapäkurqan.*
Egiptuta Nabucodonosor atacananpaq Jeremías nishqan
8 Tafnescho kaykaptinnami Jeremíasta TAYTA DIOS kayno nirqan:
9 “Tafnes markacho Faraónpa palaciun punkuman aywaykur ladrilluwan rurashqa pïsuta uchkurkur jatusaq rumikunata pampay. Nirkur mituwan laqapaylapa ladrillukunata kutitsiy. Tsayno ruray Judá runakunapa nawpancho.
10 Nirkur runakunata kayno ninki: ‘Israel runakunata kuyaq y lapanta mandaq TAYTA DIOS kaynömi nin: Babilonia nacionpa mandaqnin rey sirvimaq Nabucodonosortami kachamushaq kay pampatsishqä rumikuna janancho toldunta ichirkatsir trönunta churananpaq.
11 Chaykamurmi Egipto runakunata soldädunkunawan atacar vincinqa. Wanuqpaq kaqkunaqa wanunqami. Prësu aywaqpaq kaqkunaqa prësumi aywanqa. Guërracho espädawan wanuqpaq kaqkunaqa guërrachömi wanunqa.*
12 “ ‘Egipto runakuna adorashqan dioskunapa templunkunatapis rupatsipäkunqami. Egipto runakuna rurashqan dioskunatapis wakinta rupatsinqa y wakintanami apakärinqa. Mitsikuq runa röpanpita usata jorquqnömi Egipto nacionpa riquëzankunata lapanta apakunqa. Tsayno rurarkur aywakäriptin tsaycho taq runakuna mantsakushpan manami imatapis rimapanqatsu.
13 Bet-semescho* kaykaq adorashqan wanka ruminkunatapis talamarmi ushakätsinqa. Egipto runakuna adorashqan dioskunapa templunkunata lapantami rupatsir ushanqapaq’ ”.
Ichic wilacuycuna
^ 43.3 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ 43.5 Jer. 40.11-12.
^ 43.7 2Rey. 25.26.
^ 43.13 Bet-semespaq parlarqa manami Judácho kaq Bet-semespaqtsu parlaykan, sinöqa Egiptucho kaq Bet-semespaqmi. Tsay markapa jukaq jutin Heliópolismi karqan.
