Jeremías 44:1-30
44 Egiptuman aywakuq Judá runakunaqa tarkaykarqan Migdol markacho, Tafnes markacho, Menfis markacho y Patros partichömi. Paykuna imano kananpaq kaqtapis musyananpaqmi Jeremíasta Tayta Dios kayno nirqan:
2 “Israel runakunata kuyaq y lapanta mandaq TAYTA DIOS kaynömi nin: ‘Qamkunaqa rikapäkushqankimi Jerusaléncho taq runakunata y intëru Judá markakunacho taq runakunata fiyupa castigashqäta. Kananqa tsay markakuna chunyaraykannami.
3 “ ‘Tsayno castigashqä pasaypa rabyatsimashpan juk dioskunata adorar* inciensuwan qoshtatsishqanpitami. Unay ayluykikuna mana adoraykaptinmi qamkunaqa tsay dioskunata adorapäkushqanki.
4 Melanaypaq mana alikunata rurar rabyatsimashqaykita wilashunaykipaqmi sirvimaqnï profëtakunata unaypita patsa yaparir yaparir qamkunaman kachamushqä.
5 “ ‘Tsayno kaptinpis manami cäsukärimashqankitsu ni jutsa ruraykunatapis kachapäkushqankitsu. Tsaypa trukanqa jinalami juk dioskunata inciensuwan qoshtatsipäkushqanki.
6 Tsaymi fiyupa rabyakushpä Jerusalén cällikunacho y intëru Judá markakunacho runakunata castigashqä. Tsaymi kananqa pasaypa chunyaraykan y raqälana rikakushqa.
7 “ ‘Israel runakunata kuyaq y lapanta mandaq TAYTA DIOS karmi kayno nï: Judá runakuna, ¿imanirtaq achäquita ashipaykanki? Tsaynöla rabyatsimaptikiqa lapaykitami ushakätsishayki: olqutapis, warmitapis, wamrakunatapis y chuchuykaq wamrakunatapis.
8 ¿Imanirtaq fiyupa rabyatsimashpayki Egiptuchöpis juk dioskunata inciensuwan qoshtarkaykätsinki? Tsayno rurar wanunaykipaq kikikikunami jutsayuq karkaykanki. Tsaymi maytsay nacioncho taqkuna rikakärinanpaq pasaypa maldicionädu kapäkunkipaq.
9 “ ‘Unay ayluykikuna, Judácho reykuna y tsay reykunapa warminkunapis qamkunanölami jutsata rurapäkurqan. Paykunata castigashqäta ¿qonqaykärishqankiku? Judá nacioncho y Jerusalén cällikunacho warmikikunapis y kikikikunapis jutsata rurapäkushqaykipita castigashqäta ¿qonqaykärishqankiku?
10 Jutsa ruraykunata kananyaqpis qamkunaqa manami kacharinkitsu ni pitapis mantsakärinkitsu. Leynïkunatapis ni estatütükunatapis manami cäsukärinkitsu. Tsay leykunata entregarqä unay ayluykikuna y qamkunapis cäsukärinaykipaqmi.
11 “ ‘Tsaymi Israel runakunata kuyaq y lapanta mandaq TAYTA DIOS kar kayno nï: Tsayno kashqaykipitami qamkunataqa chipyaq ushakätsishayki.
12 Judápita mana cäsukuypa shamuqkuna, lapaykimi kay Egiptucho ushakankipaq. Wakinniki guërracho wanupäkunkipaq y wakinnikinami yarqaypita wanupäkunkipaq. Wamrapita qalaykurmi hasta awkinyaq wanupäkunkipaq. Penqaypaq kaptikimi runakuna chikishushpayki maldicionashunkipaq. Qamkunata castigashqäta musyarmi espantashqa rikakärinqa.
13 “ ‘Jerusaléncho taqkunata castigashqänölami Egiptucho taykaqkunatapis castigashayki. Tsaymi wakinniki guërracho wanupäkunkipaq, wakinniki yarqaypita wanupäkunkipaq y wakinnikinami pesti qeshyawan wanupäkunkipaq.
14 Judápita Egiptupa aywakuqkunaqa manami mayqanikipis kawaykar quëdankipaqtsu. Judácho tänaykipaq mayjina kutiyta munarpis juk ishkay qeshpiqkunalami kutirpis kutinqapaq’ ”.
Judá runakuna contestashqan
15 Jeremías tsayno nishqanta tsaytsika runakunami mayapäkurqan. Tsaychömi kaykarqan Patros particho taq runakunapis. Warminkuna juk dioskunata adorar inciensuwan qoshtatsishqanta musyaqkuna y tsaycho kaykaq lapan warmikunami Jeremíasta kayno nipäkurqan:
16 “TAYTA DIOSPA jutincho wilapämashqaykita manami cäsukärishaqtsu.
17 Tsaypa trukanqa kikïkuna munashqänömi rurapäkushaq. Ciëlupa Maman diösapaq* mana kachaypami inciensuwan qoshtatsishaq y vïnutapis jichapäshaq. Payta adoraykashqänölami unay aylükunapis, mandamaqnï reykunapis y autoridänïkunapis Judá markakunacho y Jerusalén cällikunacho adorapäkurqan. Tsayno ruraptin mikuynïkunapis putsuy putsuymi karqan. Ima desgraciapis mana pasaptin kushishqami kawapäkurqä.
18 Ciëlupa Mamanpaq inciensuwan qoshtatsiyta y vïnu jichapayta kachaykushqä junaqpita patsami pasaypa muchuycho kawarkaykä. Runakunapis guërrachömi wanupäkushqa y wakinqa yarqaypitami wanupäkushqa”.
19 Mastapis warmikuna kayno nirqan: “Ciëlupa Maman diösa niraq wawata ruraykur inciensuwan qoshtatsishqäta y vïnuta jichapar adorakushqätaqa runäkuna musyapäkunmi”.
Jeremías contestashqan
20 Tsayno niptinmi runakunata y warmikunata Jeremías kayno nirqan:
21 “Tsaykunata rurapäkushqaykita ¿TAYTA DIOS mana musyashqantaku o qonqaykushqantaku qamkunaqa yarpapäkunki? Payqa musyanmi unay ayluykikuna, reykuna, autoridäkuna, Judácho taq runakuna y kikikikunapis juk dioskunata adorapäkushqaykita. Tsaynöpis musyanmi intëru Judá markakunacho y Jerusalén cällikunacho inciensuwan qoshtatsipäkushqaykita.
22 “Tsayno jutsata rurar rabyatsishqaykipitami TAYTA DIOS castigapäkushushqanki. Tsaymi kananqa intëru nacionnintsicho markakuna raqälana chunyaraykan. Mantsakuypaq maldición pasashqami kaykan.
23 Tsayno castigashqa kaykantsi TAYTA DIOSTA rabyatsir juk dioskunata inciensuwan qoshtatsipäkushqaykipitami. Pay nishqanta mana cäsukurmi leyninkunata, estatütunkunata y mandashqankunata mana cumplipäkunkitsu”.
24 Tsaycho juntaraykaq runakunata y warmikunata mastapis Jeremías kayno nirqan: “Kay Egiptucho taykaq Judá runakuna, TAYTA DIOS nishqanta mayapäkuy.
25 Israel runakunata kuyaq y lapanta mandaq TAYTA DIOSMI kayno nin: ‘Warmikikunapis y kikikikunapis promitirqayki Ciëlupa Mamanpaq vïnuta jichapänaykipaq y inciensuwan imaypis qoshtatsipäkunaykipaqmi. Tsaynöpis nipäkurqayki tsay promitishqaykita imanöpapis cumplinaykipaqmi. Tsay nipäkushqaykinöla lapantapis rurayta munaykarqa rurapäkuy.
26 “ ‘Egiptucho taykaq Judá runakuna, noqa TAYTA DIOS nishqäta shumaq mayapäkamay. Kananpitaqa intëru Egiptucho manami mayqanikipis jutïta joqarir “TAYTA DIOSPA jutinchömi jurä” ninkipaqnatsu. Kikïpa jutïcho jurarmi tsayno nï.
27 Qamkunata yanapanäpa trukanqa castiganäpaq listumi kaykäshaq. Egiptucho taykaq Judá runakuna, wakinniki guërracho wanupäkunkipaq y wakinnikinami yarqaypita wanupäkunkipaq. Qamkunataqa lapaykitami ushakätsishayki.
28 “ ‘Egiptucho guërrapita qeshpir juk ishkaylami Judá nacionman kutipäkunqa. Nishqäno pasaptinmi tantiyakärinkipaq noqa nishqä rasunpa kashqanta y qamkuna nipäkushqayki mana ali kashqanta.
29 Nishqänölami qamkunata kay nacioncho castigashayki. Tsayta musyanaykipaqmi
30 Egipto nacionpa mandaqnin rey Hofrata contrankunapa makinman kachaykushaq. Tsayta rurashaq Judá nacionpa mandaqnin rey Sedequíasta Nabucodonosorpa makinman kachaykushqänömi.* Noqa TAYTA DIOSMI tsayno nï’ ”.
