Jeremías 47:1-7
47 Kaychömi qelqaraykan filisteo runakunapaq profëta Jeremíaswan TAYTA DIOS wilakatsishqan. Tsay witsan Gaza markata* manaraqmi Faraón atacarqanraqtsu.*
2 “Noqa TAYTA DIOSMI kayno nï:Mayu cargashqa aywar intëru pampapa mashtakaqnömi norti kaq lädupita soldädukuna shapäkamunqa.Shamurmi intëru Filistea nacioncho kaq markakunaman juntakanqa.Tsayta rikarmi tsaycho taq runakuna pasaypa mantsakashpan maytsaychöpis waqapäkunqa.
3 Cawallukuna patatayla aywashqan, carrëtakuna taqrarashqan y ruëdankuna aywashqanpis mantsakuypaqmi mayakanqa.Tsayta mayarmi runakuna ichipayta mana kamäpakur tsurinkunatapis kachariykur qeshpir aywakärinqa.
4 “Tsayno kanqa filisteo runakunata ushakätsinäpaq kaq junaq chayamuptinmi.Tiro runakunata y Sidón runakunata yanapaq nacionkunata* lapantami ushakätsishaq.Paykunata ushakätsishaq wakin yanapaqnin nacionkunata ushakätsishqänömi.Caftor islapita shamuq filisteo runakunata* NOQAMI ushakätsishaq.
5 Gaza markacho taq runakuna fiyupa lakikushpanmi aqtsankunatapis rutukärinqa.Ascalón markacho taq runakunapis upatakashqami rikakärinqa.Tsaycho taqkunami wanushkunapaq lakikur qarankunata pishtaypa pishtakunqa.
6 “Filisteo runakuna lakikurmi kayno nipäkunqa:‘¡TAYTA DIOSPA espädan!¡Imayyaqraq wanutsipäkamanki!¡Imayraq jamanki!¡Churaräkunaykiman kutikuyna!’
7 “Tsayno nipäkuptinpis ¿imanöparaq espädä jamanman?Noqa TAYTA DIOSMI espädäta kachamushqä Ascalón markata y lamar kuchuncho kaykaq markakunatapis ushakätsinanpaq.Tsaycho runakunata ushakätsinanpaqmi destinashqä”.
Ichic wilacuycuna
^ 47.1 Gaza markaqa Filistea nacionchömi karqan.
^ 47.4a Filisteo runakunami Tiro runakunawan y Sidón runakunawan pactuta rurarqan guërra kaptin yanapanakunanpaq. Tsaymi Tiro runakunata y Sidón runakunata yanapaq nacionkunata lapantami ushakätsishaq nishqanqa filisteo runakunata ushakätsinanpaq parlaykan.
^ 47.4b Filisteo runakunapa unay aylunkunaqa lapanmi Caftor nishqan Creta islapita karqan. Tsaymi Caftor islapita shamuq filisteo runakunata noqami ushakätsishaq nishqanqa lapan filisteo runakunata ushakätsinanpaq niykan.