Jeremías 48:1-47
48 Kaychömi qelqaraykan Moab nación runakunapaq Tayta Dios nishqan.* Israel runakunata kuyaq y lapanta mandaq TAYTA DIOS kaynömi nin:“¡Nebo marka lakipaypaqmi kanqa!Tsay markata pasaypami ushakätsinqa.Quiriataim markapis vinciptin penqaypaqmi kanqa.Ali corralashqa kaptinpis chipyaqmi juchutsir ushanqa.
2 Moab nación munayniyuq kashqanpita mananami pipis rimakunqanatsu.Contran runakunami wilanakunqa Hesbón markacho imatapis mana kachaypa ushakätsinanpaq.Madmena markatapis guërrawanmi chipyaq ushakätsinqa.
3 Tsaymi runakuna kayno nir qaparpanqa: ‘¡Lapan markatami ushakätsishqa!’Tsayno qaparpashqanmi Horonaim markapita patsa mayakämunqa.
4 “Moab nacionta pasaypami ushakätsinqa.Nanätsikur wamrakuna qaparashqanpis mayakanqami.
5 Luhit cuestapapis waqaraykarmi aywapäkunqa.Horonaim bajädachöpis fiyupa lakikur waqapäkushqanmi mayakanqa.
6 Wanuyta mana munaq kaqqa, ¡imaykanöpapis qeshpikäriy!¡Chunyaq jirkaman qeshpirkur pakakäriy!
7 Qamkunaqa soldäduykikunaman y rïcu kashqaykimanmi atiënikurkaykanki.Tsayno kaptikipis contraykikuna shamurmi vincishunkipaq.Quemos diosnikitapis apakärinqami.Cürakunata y autoridäkunatapis prësumi apakärinqa.
8 Contraykikuna shamur lapan markaykikunatami ushakätsinqa.Manami ni juk markalapis qeshpinqatsu.Qechwacho y jalqacho kaykaq markakunatapis lapantami ushakätsinqa.Noqa TAYTA DIOSMI tsayno nï.
9 “Moab nación mana ushakänanpaq ¡imanöparaq älan yurinman pärir aywakunanpaq!Lapan markankunata ushakätsiptin mananami pipis tsaycho tanqanatsu.
10 ¡Munashqäta rurananpaq kachaykaptï janan shonqula ruraqkunataqa maldicionashaqmi!*¡Espädawan wanutsinanpaq niykaptï mana wanutsiqkunatapis maldicionashaqmi!
11 “Moabita runakunaqa imaypis jawkami täkushqa.Manami imaypis nacionninpita juk läduman prësu apashqatsu.Paykunaqa karkaykan kashqalancho imaypis winaräkuq vïnunömi.Tsay vïnupa mishkin y ali asyaynin* imaypis tsaynölami kaykan.Tsaynölami moabita runakunapis kashqalan imaypis kaykan.
12 Tsay vïnuta juk urpupita juk urpuman winananpaqmi runakunata kachashaq.Nirkurnami tsay jäkatsishqan urputa pakir ushanqa.*
13 Salvayta mana kamäpakuptinmi moabita runakunaqa Quemos diosninpita penqakärinqa.Israel runakuna Bet-elcho ïduluman yärakushqanpita penqakushqannömi paykunapis penqakärinqa.*
14 “Moabita runakuna, ama nipäkuytsu ali chölu kapäkushpayki guërracho pelyanaykipaq listu karkaykashqaykita.
15 Nacionniki ushakashqami kanqa.Markaykikunapis raqälanami rikakunqa.Alinnin mözukunatapis chipyaqmi wanutsinqa.Rey karmi tsayno nï.Noqapa jutïqa lapanta mandaq *Yahwehmi.
16 “Moabita runakunata desgracia pasananpaq walkalanami pishiykan.Paykuna ushakänanpaq tiempu chayaykämunnami.
17 Nawpan nacionkunacho taq runakuna, Moab nacionpaq lakikäriy.Munayniyuq kashqanta musyaqkuna, tsay nacionpaq kayno nipäkuy:‘¡Wawalaw, pipis mana vincishqan Moab nación pasaypa ushakashqa!’
18 “Dibón marka runakuna, Moab nacionnikita ushakätsinanpaq runakuna aywaykämunnami.Amparakunayki markakunatapis chipyaqmi elqätsinqa.Tsayno kaykaptinqa ali chölu tukunaykipa trukan humillakäriy.
19 “Aroer markacho taqkuna, nänikunapa pipis shamuqta rikachakäriy.Qeshpiykaqkunata tapukäriy ima pasashqantapis.
20 Tapukuptiki kayno nipäkushunkipaq:‘¡Moab nacionnintsitami ushakätsishqa!¡Qaparaypa waqapäkuy!¡Arnón mayu witsaypa aywaykur wilakäriy nacionnintsita ushakätsishqanta!’
21 “Pampacho kaykaq markakunatami desgracia pasanqa.Tsay markakunami kaykan Holón, Jahaza, Mefaat,
22 Dibón, Nebo, Bet-diblataim,
23 Quiriataim, Bet-gamul, Bet-meón,
24 Queriot, Bosra y Moabcho kaykaq lapan markakuna.Karucho o cercacho kaqtapis lapantami desgracia pasanqa”.
25 TAYTA DIOSMI kayno nin:“Moab nacionqa manami munayniyuqnatsu kanqa.Ali chölu kashqanpis ushakanqanami.
26 Moabita runakunaqa conträmi rikakärishqa.Kananqa shinkashqa runakunano tsanka tsanka purir ishkitsun.Gumitashqan janancho qochpapäkutsun.Paykunataqa pïmaypis asipätsun.
27 “Moabita runakuna, Israel runakunata manakaqmanmi churarqayki.Suwakuykaqta taripaqnömi pasaypa manakaqman churapäkurqayki.
28 Kananqa markaykikunapita qeshpir machaykunachöna täkäriy.Qaqa chawpincho qeshwanta ruraq palumano qamkunapis täkäriy.
29 Qamkunaqa runa tukur pïmaytapis mana respitaqmi karkaykanki.Tsaynöpis ali chölu tukurmi baduläqui karkaykanki.Tsayno kashqaykita pïmaypis musyapäkunmi”.
30 TAYTA DIOSMI kayno nin:“Noqa musyämi ali chölu tukärishqaykita.Tsayno karpis manami ichipayta kamäpakunkipaqtsu.Vincinaykipaq alabakuptikipis vincishunkipaqmi.
31 Tsaymi Moab nacionnikipaq pasaypa waqashaq.Kir-hares markacho* taq runakunapaqpis lakikushaqmi.
32 “Sibma marka, üva chakraykikuna atskami kaykan.Lamarpa wak tsimpanyaq y Jazer markayaqmi kaykan.Tsayno kaptinpis cosechanaykipaq üvakuna manami kanqanatsu.Tsaymi qampaq y üva chakraykikunapaqpis waqashaq.Jazer markapaq waqashqäpita masraqmi waqashaq.
33 “Moab nacioncho chakrankuna ali kaptinpis runakuna kushikushqan y asikachashqan manami mayakanqanatsu.Cosëcha manana kaptin winaräkunancho manami vïnupis kanqanatsu.Vïnuta rurananpaq üva jaruqkunapis manami kanqanatsu.Manami kushikushpan versutapis cantanqanatsu.
34 Hesbón markacho waqashqanqa Eleale markayaq y Jahaza markayaqmi mayakanqa.Nimrimcho yaku tsakiptinmi Zoar markachöpis qaparayparaq waqapäkunqa.Tsay waqashqanqa Horonaim markayaq y Eglat-selesiyá markayaqmi mayakanqa”.
35 TAYTA DIOSMI kayno nin: “Diosninkunata adorar uywakunata *altarkunacho rupatsipäkushqanpita y inciensuwan qoshtatsipäkushqanpitami moabita runakunata ushakätsishaq.
36 Tsayno kaptinmi pampakuycho këna waqaqnöraq lapan shonqüwan moabita runakunapaq waqashaq. Riquëzankuna ushakaptinmi Kir-hares markacho taq runakunapaqpis waqashaq.
37 Lapan runakunami lakikushpan aqtsankunata qara putuypa rutukärinqa. Shaprankunatapis chipyaq rutukärinqa. Makinkunatapis pishtaypa pishtarmi kutsukärinqa. Tsaynölami qachqa röpakunatapis jatikärinqa”.
38 TAYTA DIOSMI kayno nin: “Moabita runakunaqa wayin janankunacho* y cällikunachöpis waqanqami. Tsayno waqapäkunqa shilishqa puyñutano ushakätsiptïmi.
39 “¡Moab nacionpaq waqapäkuy! ¡Chipyaqmi ushakätsinqa! ¡Penqakurmi uysuranqa! Moabita runakuna ushakashqanta mayarmi nawpan nacionkunacho taq runakunapis kushipar manakaqman churapäkunqa”.
40 TAYTA DIOSMI kayno nin:“Älanta anka luylukurkur chipshata elaqpita tsarishqannömi moabita runakunataqa contrankuna elaqpita ushakätsinqa.
41 Moabita runakunapa markankunata y amparakunan wayinkunatapis ushakätsinqami.Tsay junaqmi moabita soldädukuna pasaypa mantsakärinqa.Qeshyaq warmi wachay nanay tsariptin mantsakuqnömi mantsakärinqa.
42 Moabita runakunaqa conträmi sharkapäkushqa.Ushakätsiptï manami nacionnatsu kanqa”.
43 TAYTA DIOSMI kayno nin:“Moabita runakunaqa mantsakashqami kanqa.Patsapa shiminno y toqlanömi* desgracia paykunata shuyaraykan.
44 Mantsakuypita qeshpiq kaqqa uchkumanmi jeqanqa.Uchkupita yarquq kaqnami toqlaman ishkinqa.*Tsaynömi moabita runakunata castigashaq.Noqa TAYTA DIOSMI tsayno nï.
45 “Qeshpir aywaqkunaqa Hesbón markaman kalpan ushakashqami amparakunanpaq chayapäkunqa.Tsayno kaptinpis rey Sehónpa markan Hesbóntaqa ninami rupar ushanqa.Intëru Moab jirkakunata ruparmi tsay fiyu runakuna tashqan wakin markakunatapis rupar ushanqa.
46 “¡Wawalaw, imanöraq kanki, moabita runakuna!¡Quemos diosta adoraq runakuna ushakanqami!*¡Tsurikikunatapis olquta warmita prësu tsarirmi apakärinqa!
47 Tsayno kaptinpis watakuna pasarkuptinqa moabita runakunata nacionninmanmi kutitsimushaq.Noqa TAYTA DIOSMI tsayno nï”.Moab nación runakunata Tayta Dios castigananpaq wilashqan kaychömi ushan.
Ichic wilacuycuna
^ 48.10 Kay textucho Tayta Dios munashqanta rurananpaq nishqanqa moabita runakunata wanutsinanpaqmi niykan.
^ 48.11 Wakin runakunaqa mushkuynin nipäkun.
^ 48.12 Vïnupaq parlarqa moabita runakunapaqmi parlaykan. Vïnuta juk urpupita juk urpuman winananpaq parlarqa moabita runakunata nacionninpita juk nacionman prësu apananpaqmi parlaykan. Jäkatsishqan urputa pakir ushakätsinanpaq parlarqa Moab nación markakunata ushakätsinanpaqmi parlaykan.
^ 48.13 Bet-elcho qoripita rurashqa turituta adorashqanpita masta musyanaykipaq liyinki 1Rey. 12.28-32. Tsay ïduluman yärakushqanpita Israel runakuna penqakärirqan Asiria runakunapita salvayta mana puëdiptinmi. Tsaynölami niykan Ose. 10.6 versïculuchöpis.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 48.31 Kir-hares markaqa Moabcho mas jatun kaq markami karqan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 48.38 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ 48.43 Wakin runakunaqa tsiklanömi nipäkun.
^ 48.43-44 Isa. 24.17-18.
^ 48.46 Moabita runakunami Quemos diosta adorarqan.
