Jeremías 5:1-31
5 Tayta Diosmi kayno nin:“Jerusalén cällikunapa purishpayki shumaq rikachakäriy.Intëru pläzakunachöpis shumaq ashipäkuy.Tsaycho mä ¿tarinkikush juklaylatapis ali ruraq runata y rasun kaqlata rimaqta?Juklaylatapis tariptikiqa Jerusaléncho taqkunata perdonashaqmi.
2 Tsay runakunaqa jutïcho jurarpis janan shonqulami jurapäkun”.
3 TAYTA DIOS, qamqa munanki runakuna promitishushqaykinöla imaypis cäsushunaykitami.Jerusalén runakunaqa corrigir astaptikipis manami cäsukushunkitsu.Castigaptikipis manami wanakärintsu*.Paykunapaqa shonqunpis ruminömi kaykan.Mana mantsakuypami jutsatapis rurapäkun.
4 Tsaymi kayno nirqä: “Mana yachaq runakunalami lutanta rurapäkun.TAYTA DIOSPA yachatsikuyninta mana musyarmi pay munashqannöqa mana kawapäkuntsu.
5 Rïcu runakunami itsanqa TAYTA DIOSPA näninta reqir pay munashqanno kawapäkun”.Tsayno yarparmi aywarqä rïcu runakuna kaqman Tayta Dios munashqanno kawashqanta o mana kawashqantapis musyamunäpaq.Paykunawan parlarmi tantiyarqä rïcu runakunapis Tayta Dios munashqanno mana kawapäkushqanta.
6 “Tsayno kashqanpitami muntipita yarqamuq leonno paykunata wanutsipäkunqa.Chunyaq jirkapita shamuq *löbunömi rachir ushapäkunqa.Marka nawpankunachöpis wanutsinanpaq tigrikunanömi shuyarpaykanqa.Markapita yarquq kaqtaqa pitapis wanutsinqami.Tsayno pasanqa yaparir yaparir mana cäsukuypa jutsata rurapäkushqanpitami”.
7 Tayta Diosmi kayno nin:“Israel runakuna, tsayno kashqaykipita manami perdonashaykitsu.Qamkunaqa qonqaykamar mana rasunpa kaq dioskunapa jutinchömi jurarkaykanki.Lapan nistashqaykita kamaripaykaptïmi runanta warmi kachariqno qamkunapis kacharimashqanki.*Wayrapakuq warmipa wayinman aywaq runakunanömi qamkunapis juntakaykur juk dioskunata adoraq aywarkaykanki.
8 Tsaynöpis yëwata wera cawallu qatiraqnömi runa mayikipa warminta qatirpaykanki.
9 Tsay niraq runakunataqa mana kuyapaypami castigashaq.
10 “Jerusalén runakuna üva chakrä kashqa karpis kananqa manami chakränatsu kaykan.Tsayno kaykaptinqa contrankuna shamur corral jananpa yaykuykur üva chakräta ushakätsitsun.Üva rämakunata mututsun.*Itsanqa lapantaqa ama ushakätsitsuntsu.*
11 Israel runakuna y Judá runakuna yaparir yaparir promitimarpis manami cumplintsu.Noqa TAYTA DIOSMI tsayno nï.
12 “Jerusalén runakunaqa manakaqman churamarmi kayno nipäkun:‘Tayta Dios manami kantsu.Ima desgraciapis manami pasamäshuntsu.Manami kanqatsu guërrapis ni muchuypis.
13 Tayta Diospa profëtankuna wilakushqanpis wayrano pasaqlami kaykan.Paykunataqa manami pipis kachamushqatsu.Castïgu shamunanpaq wilakushqanpis kikinkunata pasatsun’ ”.
14 Tsaymi lapanta mandaq TAYTA DIOS kayno nimashqa:“Tsayno nishqanpitami noqapa jutïcho wilakushqayki ninano kanqa.Tsay runakunanami yantano kanqa.Nina rupaptin yanta ushakashqannömi paykunapis ushakanqa.
15 Israel runakuna, qamkunata atacashunaykipaqmi karu nación runakunata pushamushaq.Tsay runakunaqa unaypita patsami pasaypa kalpasapa kaykan.Paykunapa rimayninta mana tantiyarmi imata nishqantapis mana tantiyankipaqtsu.
16 Paykunaqa lapanpis ali chölulantaqmi karkaykanPitapis flëcharqa wanutsinmi.
17 Lapan mikuynikitami ushapäkunqa.Tsurikikunata warmitapis olqutapis wanutsipäkunqami.Uyshaykikunata, wäkaykikunata, üvaykikunata y hïgusnikikunatapis mikukurkunqami.Yärakärishqayki ali corralashqa markakunatapis ushakätsinqami”.*
18 TAYTA DIOSMI kayno nimarqan: “Tsayno castigarpis manami lapaykitatsu ushakätsishayki.
19 Desgracia pasaptinmi runakuna tapushunki imanir Diosnin kaykar tsayno rurashqäta. Tsayno tapushuptiki kayno ninki: ‘Qamkunaqa Tayta Diosta qonqaykurmi juk lädu nacionkunapa diosninkunata nacionnikicho adorapäkushqanki. Tsaypitami qamkuna juk lädu nación runakunata jäpa nacioncho sirvipäkunkipaq’ ”.
Castïgu shamunanpaq wilakushqan
20 Tayta Dios kaynömi nin:“Jacobpita miraq Israel runakuna y Judá runakuna, wilakushqäta mayapäkamay.
21 Nawiyuq kaykarpis mana rikaq,rinriyuq kaykarpis mana wiyaq,mana tantiyakuq upa runakuna, mayapäkamay.*
22 Noqa TAYTA DIOSMI kayno nï:Lamar yaku kuchunpita masta mana pasananpaqmi aquyshata churapashqä.Tsaymi mayjina wayraptin pulchaqyarpis mana pasantsu.*Lamarpis cäsukaykämaptinqa ¿imanirtaq qamkunaqa mana cäsukamankitsu?Castigakuq kashqäta musyaykarqa ¿imanirtaq *mantsakamashpayki nawpächo mana siksikyankitsu?
23 “Qamkunaqa ishkay cära mana wiyakuq karmi noqata kachariykamashqanki.
24 Shonqulaykichöpis manami yarpachakunkitsu NOQATA mantsakamänaykipaq.Manami tantiyapäkunkitsu mikuyniki ali qeshpinanpaq punta kaq tamyata y qepa kaq tamyatapis noqaraq tamyatsimushqäta.Tsaynöpis manami tantiyapäkunkitsu mikuynikita shuntanaykipaq noqa usyätsishqäta.
25 Tsaymi kananqa kikikikunapa jutsaykipita mana tamyatsimushaqtsu.Imayka alikunata tarinaykipaq kaqtapis manami taripäkunkinatsu.
26 “Qamkuna kaqchöqa fiyu runakunami karkaykan.Tsay fiyu runakunaqa pichiwchankata tsarinanpaq shuyaraqnömi runa mayinkunata engañananpaq shuyarpaykan.
27 Jaulacho pichiwchankakuna atska kashqannömi wayinkunachöpis suwakushqankuna atska kaykan.Tsaynöpa rïcuyarmi paykunaqa munayniyuq rikakushqa.
28 Ali alita mikurmi weray weray karkaykan.Mana tantiyakuypami lutankunata rurapäkun.Waktsakuna quejakuptinpis manami favornin sharkuntsu.Nakaykaqta rikaykarpis manami yanapantsu.
29 “Noqa TAYTA DIOSMI kayno nï:Tsay niraq runakunataqa mana kuyapaypami castigashaq.Rabyanätsimashqanman tupumi castigashaqpaq.
30 Paykunaqa fiyupa mantsariypaq mana alikunatami kay nacioncho rurarkaykan.
31 Profëtakunapis lulakurkaykanmi.Cürakunapis kikinkunapa jamuynilanpitami yacharkaykätsin.Tsayno kaptinpis qamkunataqa manami imapis qokushunkitsu.Tsaypa trukanqa paykuna tsayno kanantami munarkaykanki.Ushakänayki junaq chayamuptin ¿imanöparaq salvakärinkipaq?”
Ichic wilacuycuna
^ 5.3 Wakin runakunaqa wiyakärintsu nipäkun.
^ löbu Löbuqa jatusaq fiyu alquno munti uywami kaykan.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 5.10 Üva rämakunata mututsun ninanqa Jerusalén runakunata wanutsitsun ninanmi.
^ 5.10 Isa. 5.1-7; Jer. 2.21.
^ 5.15-17 Deut. 28.49-52.
^ 5.21 Isa. 6.9-10; Eze. 12.2; Mar. 8.18.
^ 5.22 Job 38.8-11; Sal. 104.6-9; Prov. 8.29.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
