Jeremías 9:1-26
9 (8.23) ¡Imanöparaq weqï yakunöraq kanman!¡Nawïpis pukyunöraq kanman!Tsayno kaptinqa marka mayïkunata wanutsishqanpita paqasta junaqtami lakikur waqäman.*
2 (1) ¡Pilaraq chunyaq jirkacho tsuklalatapis kamaripämanman!Tsaychömi markäpita aywakur täküman.Marka mayïkunaqa Tayta Diosta manami cäsukärintsu ni promitirkurpis manami cumplipäkuntsu.
Judá nacionta ushakätsinanpaq wilakushqan
3 (2) TAYTA DIOSMI kayno nin:“Kay nacionchöqa flëchata lutala flëchaqnömi lapanpis lulakärin.Waran waran peormi jutsata rurapäkun.‘Tayta Diostami *reqï’ nirpis manami rasunpaqa reqimantsu.
4 (3) “Paykunaqa manami runa mayinmanpis ni wawqinmanpis yärakärintsu.Amïgunwanpis lulapänakurmi jitapänakun.Tsay wawqila kaykarpis engañanakunmi.
5 (4) Juknin jukninpis lulapänakun.Rasun kaqtaqa manami imaypis rimapäkuntsu.Lapanpis jutsa rurayman uman churakashqami karkaykan.
6 (5) Lulapänakular kawashpanmi reqimaytapis mana munapäkuntsu.Noqa TAYTA DIOSMI tsayno nï”.
7 (6) Tsaymi lapanta mandaq TAYTA DIOS kayno nin:“Qanranta jorqunanpaq qorita tsulutsiqnömi kuyashqä runakunata corrigishaq.Tsayno mana corrigirqa manami imanöpapis tantiyatsiyta kamäpakushaqtsu.
8 (7) Paykuna parlashqanqa afilashqa flëchanöraqmi kaykan.Imatapis rasuntanöraqmi pitapis criyitsipäkun.Ali shimilanpa amïgunta parlaparpis shonqunchöqa imatashi yarparkaykan.
9 (8) Tsayno kashqanpitami paykunata castigashaq.Tsay runakunaqa makïta apanqaraqmi.Noqa TAYTA DIOSMI tsayno nï”.
10 (9) ¡Jirkakunapaqmi ataypa atar waqashaq!¡Chakracho qewakunapaqpis cantapalanpami waqashaq!Chipyaq rupatsipäkuptinmi tsaykunapa pipis mana purinqanatsu.Törukuna jüyashqanpis manami mayakanqanatsu.Pishqukunapis y jirka uywakunapis qeshpirmi aywakärinqa.
11 (10) Tayta Dios kaynömi nin:“Asulaptïmi Jerusalén marka raqälana rikakunqa.*Chacalkunalami tsaycho tanqa.Judá nacioncho kaq wakin markakunatapis chipyaqmi ushakätsishaq.Manami pipis tsay markakunacho tanqapaqnatsu”.
Judá nacionta imanir ushakätsinanpaq kashqan
12 (11) ¿Imanirtaq kay nación ushakashqa kaykan? ¿Imanirtaq chunyaqman tikrashqa kaykan? ¿Pitaq yachaq kaykan imanir tsayno pasashqantapis tantiyananpaq? ¿Pitataq TAYTA DIOS tantiyatsishqa tsayta wilakunanpaq?
13 (12) TAYTA DIOSMI kayno nin: “Lapanpis tsayno pasanqa leynïkunata mana cumplipäkushqanpita, nishqäkunata mana cäsukärishqanpita y yätsishqäno mana kawapäkushqanpitami.
14 (13) Cäsukamänanpa trukanqa shonqun yarpashqanta rurarmi unay aylunkunano *Baal dioskunata adorapäkushqa”.
15 (14) Tsaymi Israel runakunata kuyaq y lapanta mandaq TAYTA DIOS kayno nin: “Fiyupa asqaq mikuyta mikatsiqno y venenashqa yakuta uputsiqnömi kay runakunata castigashaq.*
16 (15) Unay aylunkunapis ni kikinkunapis mana reqishqan nacionkunamanmi paykunata qarqushaq. Soldädukunatapis paykunamanmi kachashaq espädawan wanutsiptin lapanpis ushakänanpaq”.
Jerusaléncho runakuna fiyupa waqananpaq nishqan
17 (16) Lapanta mandaq TAYTA DIOS kaynömi nin:“Imanir castiganäpaq kashqantapis tantiyakäriy.Wanupakuycho waqapakuq warmikunata qayatsipäkamuy.Shumaq waqay yachaqkunata ashipäkamuy.
18 (17) Jukla shamushpan nacionnikipaq lakikur waqapäkutsun.Fiyupa waqaptin qepshankunapapis weqin jututsun.
19 (18) *Siónpita patsami mayakämunqa lakikur waqashqan.Tsayno waqarmi kayno nipäkunqa:‘¡Chipyaq ushakashqami kaykantsi!¡Fiyupa penqaypaqmi kaykantsi!¡Wayintsitapis juchutsirmi ushashqa!¡Nacionnintsitapis kachariykushqantsinami!’ ”
20 (19) Warmikuna, TAYTA DIOS nishqanta shumaq tantiyakäriy.Warmi wawaykikunata waqapakuq kananpaq yachatsipäkuy.Yanasaykikunatapis wanupakuy cantakunata yachatsipäkuy.
21 (20) Wayintsikunamanpis wanuymi chayamushqa.Palaciuntsikunamanpis wanuymi yaykamushqa.Cällikunachöpis wamrakunatami wanurkaykätsin.Pläzakunachöpis mözukunatami ushakarkaykätsin.
22 (21) TAYTA DIOSMI kayno nin:“Wanushqa runakunaqa uywakunapa ismayninnömi jitarpanqa.Trïgu manöjukunata pipis mana shuntaptin jitaraqnömi jitarpanqa”.
Tayta Dios imapita kushikushqanpis
23 (22) TAYTA DIOSMI kayno nin:“Tantiyakuq runa tantiyakuq kashqanpita ama alabakutsuntsu.Munayniyuq runapis munayniyuq kashqanpita ama runa tukutsuntsu.Rïcu runapis rïcu kashqanman ama atiënikutsuntsu.
24 (23) Tsaypa trukanqa kushikäritsun noqata *reqimar TAYTA DIOS kashqäta tantiyashqanpita.*Noqa kuyapäkuq y kay patsacho alilata ruraqmi kaykä.Tsayno reqimar tantiyakäriptinqa pasaypami kushikü.Noqa TAYTA DIOSMI tsayno nï”.
Israel runakunapa shonqunkuna señaläni kashqan
25 (24) TAYTA DIOSMI kayno nin: “Cuerpun *señalakuqkunata y mana señalakuqkunatapis castiganäpaq kaq tiempu chayaykämunnami.
26 (25) Noqa castigashaqmi Egipto runakunata, Judá runakunata, edomita runakunata, amonita runakunata y moabita runakunatapis. Tsaynöpis castigashaqmi laplanta* rutukur chunyaq jirkacho taqkunatapis.* Tsay runakunaqa lapanpis señaläninömi karkaykan. Israel runakunapis cuerpun señalashqa kaptinpis shonqunqa señalänimi kaykan”.* *
Ichic wilacuycuna
^ 9.1 Lam. 3.48-51.
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ chacal Chacalqa atuq niraq jirka uywami kaykan. Chacalqa atuqpita mas jatulanmi. Atuqkunaqa castankunawanmi puripäkun. Chacalkunami itsanqa majanwan majanwan puripäkun (Isa. 13.22; Jer. 9.11; Lam. 4.3).
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 9.15 Jer. 23.15.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 9.24 1Cor. 1.31; 2Cor. 10.17.
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 9.26a Wakin runakunaqa patillanta nipäkun.
^ 9.26b Tsay witsan chunyaq jirkacho taq wakin runakuna laplanta rutukuq ïdulukunata adorashpanmi. Laplanta tsayno mana rutukunanpaq Tayta Dios nishqanta musyanaykipaq liyinki Lev. 19.27.
^ 9.26c Cuerpunta señalar chiwlakunanpa punta qaranta kutsurir jorqushqannömi shonqunta señalar jutsa rurayta kacharin.
^ 9.25-26 Hech. 7.51; Rom. 2.25-29.
