Jonás 1:1-17
1 Amitaipa tsurin Jonástami* TAYTA DIOS kayno nirqan:
2 “Nínive markacho taq runakunapa jutsankuna aläpanami kaykan. Tsay jatun markaman aywaykur paykunata ushakätsinäpaq kashqanta wilanki”.*
3 Tsayno niykaptinpis Jonásqa qeshpir Jope markaman aywakurqan. Tsaychömi tarirqan Tarsis markapa *büqui yarqunanpaqna kaykaqta. Tsawraqa TAYTA DIOSPITA qeshpiyta yarpar pasäjita jukla rantir tsay büquiwan Tarsisman aywakurqan.
4 Tsay büquicho aywaykaptinmi TAYTA DIOS fiyupa wayrätsimurqan. Tsawraqa yaku altuparaq fiyupa pulchaqyaptin büquipis pakikänanpaqna kaykarqan.
5 Tsaymi büqui manijaqkunaqa pasaypa mantsakärishpan diosninkunata cada ünun manakärirqan. Nirkurmi büqui mana talpukänanpaq apaykashqan cargankunata lamarman jitarpurqan.
Tsayyaqqa büquipa rurin kaq cuartuchömi Jonás wanuyparaq punukashqa kaykarqan.
6 Büqui manijaqkunapa mandaqninmi rikchatsir kayno nipäkurqan: “¡Punuy siki! ¡Imanirtaq kaycho punuräkunki! Sharkur diosnikita manakuy. Capazchari salvamashwanpis kaycho mana ushakänantsipaq”.
7 Tsaypitanami büqui manijaqkuna wilanakur kayno nipäkurqan: “Pipa jutsanpita kayno nakaykashqantsitapis musyanantsipaq suertita jitashun”.
Tsayno jitaptin Jonáspaq suerti yarqamurqan.
8 Tsawraqa Jonásta kayno tapupäkurqan: “Wilamay, tayta. ¿Imatataq rurashqanki kayno nakanantsipaq? ¿Imachötaq arunki? ¿Maypitataq shamushqanki? ¿May runataq kanki? ¿Mayqan aylutaq kanki?”
9 Tsawraqa Jonás kayno nirqan: “Noqaqa hebreo runami kä. Jana patsacho kaykaq TAYTA DIOSTA *mantsakurmi payta sirvï. Paymi lamartapis y kay patsatapis kamashqa”.
10 Tsaymi büquicho aruqkuna fiyupa mantsakashpan kayno nipäkurqan: “¡Imanirtaq TAYTA DIOSTA mana cäsukushqankitsu!”
Tsayno nirqan TAYTA DIOSPITA qeshpikuykashqanta wilaptinmi.
11 Mas fiyupa yaku pulchaqyaptinnami kayno tapupäkurqan: “Kanan ¿imatataq rurashun yaku chawänanpaq?”
12 Tsawraqa Jonás kayno nirqan: “Lamarman jitarpamay pulchaqyaykashqanpita yaku chawänanpaq. Noqami jutsayuq kaykä lamar kayno pulchaqyänanpaq”.
13 Tsayno niptinpis büqui manijaq runakuna imaykanöpapis lamar kuchunmanmi büquita kutitsiyta munapäkurqan. Fiyupa wayraptinmi kutitsiyta munarpis mana kamäpakärirqantsu.
14 Tsawraqa TAYTA DIOSTA kayno nir manakärirqan: “Qam munaptikimi lapan kaykuna pasaykan, Tayta. Noqakunata ama ushakaykatsilämaytsu kay runa jutsata rurashqanpita. Lamarman jitarpäriptï jutsan mana kaptinqa noqakunata ama jitapaykalämaytsu”.
15 Tsayno manakurirmi Jonásta lamarman jitarpuptin fiyupa pulchaqyaykashqanpita chawarqanna.
16 Tsayno chawaptinmi TAYTA DIOS munayniyuq kashqanta tantiyar büqui manijaq runakuna pasaypa mantsakarqan. Tsaymi sacrificiuta rupatsir promitipäkurqan payta sirvipäkunanpaq.
17 (2.1) Jonásta ultakurkunanpaqmi TAYTA DIOS shuyarätsirqan jatunkaray pescäduta. Ultakurkuptinmi Jonásqa pescädupa pachancho kimsa paqas kimsa junaq karqan.*
Ichic wilacuycuna
^ 1.1 2Rey. 14.25.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 1.17 Mat. 12.40.
