Josué 13:1-33
13 Josué pasaypa awkinna kaykaptinmi TAYTA DIOS kayno nirqan: “Pasaypa awkinnami kaykanki. Qechunaykipaq partikunaqa atskaraqmi kaykan.
2 Tsay partikuna kaykan filisteo runakuna y gesureo runakuna tashqanmi.
3 Tsaynölami qechunaykipaq kaykan Sihor mayupita hasta cananeo runakuna tashqan Ecrónpa lindërunyaq. Sihor mayuqa Egiptupa lindërunpami pasan. Tsaynöpis qechunaykipaq kaykanraqmi filisteo runakunapa pitsqa mandaqnin tashqan markakuna. Tsay markakunaqa kaykan Gaza, Asdod, Ascalón, Gat y Ecrón. Tsaynöpis manaraqmi qechushqankiraqtsu aveo runakuna tashqan partikunata.
4 Tsay partiqa sur kaq lädupami kaykan. Tsaynöpis manami qechushqankiraqtsu cananeo runakuna tashqan partikunata. Tsay partikunaqa kaykan Sidón runakuna tashqan Meharapita hasta Afecyaqmi. Afecqa amorreo runakuna tashqan lindërunchömi kaykan.
5 Tsaynöpis manami qechushqankiraqtsu giblita runakuna tashqan partikunata y lapan Líbanuta Baal-gadpita hasta Hamatman yaykunayaq. Tsayqa kaykan inti jeqamunan kaq lädupami. Baal-gadqa Hermón punta chakinchömi kaykan.
6 Israel runakuna avanzashqan tupumi noqa qarqushaqpaq Sidón runakunata y jalqakunacho taq runakunata Líbanupita patsa hasta Misrefot-maimyaq. Qechurkurna noqa nishqänöla qamqa Israel runakunata tsay partikunata aypunki posisionnin kananpaq.
7 Isqun trïbukunata y pulan Manasés trïbuta posisionninta aypurqa tsay lapan partikunata aypunki”.
Jordán mayu tsimpancho lindërunkuna mayninpa kashqanpis
8 Jordán mayu tsimpan inti jeqamunan kaq lädupami Rubén trïbu runakuna, Gad trïbu runakuna y pulan Manasés trïbu runakuna posisionta puntata chaskipäkurqan. Tsaykunataqa TAYTA DIOSPA sirviqnin Moisésmi aypurqan.*
9 Paykunapa posisionninkunaqa karqan Arnón mayu nawpancho kaykaq Aroerpita y Arnón raqracho kaykaq markapita hasta Dibónyaqmi. Tsaynöpis posisionnin karqan lapan Medeba pampa
10 y Hesbóncho taq rey Sehón mandashqan lapan markakuna hasta amonita runakunapa lindërunyaq. Sehónqa amorreo runakunapa mandaqnin reymi karqan.
11 Tsaynöpis posisionnin karqan Galaad parti, gesureo y maacateo runakuna tashqan partikuna, Hermón punta jalqakuna y Basán partipis hasta Salcayaq.
12 Tsaynöpis posisionnin karqan Basán partipa rey Og mandashqankuna. Ogqa tarqan Astarotcho y Edreichömi. Paylanami kaykarqan refaíta runaqa. Og mandashqan runakunata wanurkatsirmi markankunata Moisés qechurqan.
13 Gesurcho y Maacacho taq runakunatami itsanqa mana qarqurqantsu. Tsaymi kananyaqpis Israel runakunawan juntu jinala tarkaykan.
14 Moisésqa manami ima posisiontapis Leví trïbu runakunata aypurqantsu. Tsaypa trukanqa TAYTA DIOS nishqanno paykunapaq karqan Israel runakuna apashqan sacrificiukunalami.*
Rubén trïbu runakunapa lindërunkuna mayninpa kashqanpis
15 Rubén trïbu runakunata aylunpa aylunpa Moisés aypuptinmi
16 posisionnin karqan Arnón mayu nawpancho kaykaq Aroer marka, Arnón raqracho kaykaq marka y lapan Medeba pampa hasta
17 Hesbónyaq. Tsaynöpis posisionnin karqan tsay pampacho kaykaq markakuna. Tsay markakuna karqan Dibón, Bamot-baal, Bet-baal-meón,
18 Jahaza, Cademot, Mefaat,
19 Quiriataim, Sibma, Zaret-sahar (Zaret-saharqa pampacho kaykaq jirkanchömi kaykan),
20 Bet-peor y Bet-jesimotpis. Tsaynöpis posisionnin karqan Pisga nishqan punta chakincho tunakuna.
21 Tsaynöpami Rubén trïbu runakunapa posisionnin karqan intëru pampacho kaykaq markakuna y Hesbóncho taq rey Sehón lapan mandashqankuna. Sehónqa amorreo runakunapa mandaqnin reymi karqan. Payta y paypa munaynincho kaykaq madianita runakunapa mandaqninkunatami Moisés wanutsirqan. Tsay mandaqkuna karqan Evi, Requem, Zur, Hur y Reba.
22 Paykunawan pelyar atska runakunatami Israel runakuna wanutsirqan. Tsaychömi Beorpa tsurin adivinaq Balaamtapis wanutsipäkurqan.
23 Rubén trïbu runakunapa posisionninpa lindërun karqan Jordán mayu kuchulanpami. Tsay markakunata y caseriukunata Rubén trïbu runakunami aylunpa aylunpa chaskipäkurqan.
Gad trïbu runakunapa lindërunkuna mayninpa kashqanpis
24 Gad trïbu runakunatapis aylunpa aylunpa Moisés aypuptinmi
25 posisionnin karqan Jazer, Galaad particho kaykaq lapan markakuna y pulan amonita runakunapa markankuna hasta Rabá tsimpancho kaykaq Aroeryaq.
26 Tsaynöpis posisionnin karqan Hesbónpita hasta Ramat-mizpayaq y Betonimyaq y Mahanaimpita hasta Debiryaq.
27 Jordán mayu nawpan pampakunachöpis posisionnin karqan Bet-aram, Bet-nimra, Sucot, Zafón y Hesbóncho taq Sehón mandashqan wakin markakunapis. Lindërunmi Jordán mayu kuchunpa aywararqan hasta Cineret qocha kuchunyaq. Lapanpis karqan Jordán mayu inti jeqamunan kaq lädupami.
28 Tsay markakunata y caseriukunata Gad trïbu runakunami aylunpa aylunpa chaskipäkurqan.
Pulan Manasés trïbu runakunapa lindërunkuna mayninpa kashqanpis
29 Pulan Manasés trïbu runakunatapis aylunpa aylunpa Moisés aypuptinmi
30 posisionnin karqan Mahanaimpita norti kaq lädupa. Tsaymi karqan Basán partipa mandaqnin rey Og mandashqankuna, Jairpita miraq runakuna qechushqan soqta chunka (60) markakuna* y Basáncho wakin markakunapis.
31 Tsaynöpis posisionnin karqan pulan Galaad y Basán nacionpa mandaqnin rey Og tashqan Astarot y Edrei markakuna. Tsaykuna karqan pulan Manasés trïbu runakuna aylunpa aylunpa chaskishqan posisionmi. Tsay runakunaqa Manaséspa tsurin Maquirpita miraq runakunami karqan.
32 Lapan tsay posisionkunatami Moisés aypurqan Jordán mayuta manaraq pasar Jericó tsimpan Moab pampakunacho kaykar.
33 Leví trïbu runakunatami itsanqa posisionta mana aypurqantsu, sinöqa Israel runakuna yärakushqan TAYTA DIOSMI kayno nirqan: “Noqa kikïmi qamkunapa herenciayki kaykä”.*
Ichic wilacuycuna
^ 13.8 Núm. 32.33; Deut. 3.12.
^ 13.14 Deut. 18.1-8; Jos. 13.33.
^ 13.30 Núm. 32.41.
^ 13.33 Núm. 18.20; Deut. 18.2.
