Josué 14:1-15
14 Cüra Eleazar, Nunpa tsurin Josué y Israel runakunapa mandaqninkunami Israel runakunapa wakin trïbunkunata *Canaáncho posisionta aypurqan.*
2 Tsay isqun trïbu y mas pulan trïbu runakunami Moisésta TAYTA DIOS nishqanno suertita jitaypa posisionta chaskipäkurqan.*
3 Rubén trïbu runakunata, Gad trïbu runakunata y pulan Manasés trïbu runakunatami posisionta Moisés aypurqan Israel runakuna Jordán mayuta manaraq pasaptin.* Leví trïbu runakunataqa manami posisionta aypurqantsu.
4 Mana aypuptinpis wakin trïbukunapa posisionninchömi markakunata y chakrakunata chaskipäkurqan uywankunata mitsikur tänanpaq. Josépita miraq ishkay trïbukunaqa karqan Manasés trïbu y Efraín trïbumi.
5 Tsawraqa Israel runakuna posisionta aypunakurqan Moisésta TAYTA DIOS nishqannölami.
Hebrón partita posisionta Caleb chaskishqan
6 Gilgalcho Josué kaykaptinmi Judá trïbu runakuna aywar cenezeo runa Jefonipa tsurin Caleb Josuéta kayno nirqan: “Musyankimi Cades-barneacho kaykaptintsi* TAYTA DIOS sirviqnin Moisésta noqantsipaq imata nishqantapis.
7 *Canaánta rikapakamunantsipaq TAYTA DIOSPA sirviqnin Moisés Cades-barneapita kachamashqantsi höra chusku chunka (40) watayuqmi kaykarqä. Kutiykurmi Israel runakunata wilaparqä kay parti imano kashqantapis.*
8 Noqantsiwan aywaq runakuna mantsakätsir wilapaptinpis noqaqa TAYTA DIOSMAN lapan shonqüwan yärakur runakunata shakyätsirqä kay nacionman yaykamunantsipaq.
9 Tsaymi TAYTA DIOSPA jutincho promitimashpan Moisés kayno nimarqan: ‘TAYTA DIOSMAN yärakur payta cäsukushqaykipitami Canaáncho purishqayki partikuna qampaq y qampita miraqkunapaq imayyaqpis kanqapaq’.*
10 “Moisés tsayno nimashqanqa chusku chunka pitsqa (45) watanami pasashqa. Chunyaq tsaki jirkapa puriptintsipis TAYTA DIOS promitimashqanno shumaq yanapamashqa kananyaqpis sänu kanäpaq. Kananqa pusaq chunka pitsqa (85) watayuqnami kaykä.
11 Moisés rikapakuq kachamashqantsi witsannölami kananpis kalpä kaykan. Nawpata pelyashqäno kananpis pelyämanraqmi.
12 Tsaymi qamta ruwakü TAYTA DIOS promitimashqan jalqakunata qoykamänaykipaq. Rikapakuq tsayman aywar tarirqantsi anaceo jatusaq runakuna tsaycho tarkaykaqta. Markankunapis jatusaq y ali murallashqami karqan. Tsayno kaptinpis TAYTA DIOS promitimashqanno yanapamaptinqa qarqushaqpaqmi”.
13 Tsayno manakuptinmi Jefonipa tsurin Calebta bendicionninta qoshpan Hebrón partita Josué qoykurqan posisionnin kananpaq.
14 Tsaynöpami Hebrónqa cenezeo runa Jefonipa tsurin Calebpa y paypita miraqkunapa posisionnin kananyaqpis kaykan. Paypa posisionnin karqan Israel runakuna yärakushqan TAYTA DIOSTA cäsukushqanpitami.
15 Hebrónpa unay kaq jutinqa Quiriat-arbami karqan. Tsayno jutin karqan Arba jutiyuq runa tsaycho tashqanpitami. Payqa jatusaq anaceo runakunacho reqishqami karqan.
Tsaypitaqa guërra mana kaptin Israel runakuna jawkanami kawapäkurqan.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 14.1 Núm. 34.16-29.
^ 14.2 Núm. 26.52, 56; 34.13.
^ 14.3 Núm. 32.33; 34.14-15; Deut. 3.12-17.
^ 14.6 Núm. 14.30.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 14.7 Núm. 13.30.
^ 14.9 Núm. 14.24.
