Josué 16:1-10
16 Josépita miraq runakuna suertita jitaypa chaskipäkushqan posisionpa lindërunkunaqa inti jeqamunan kaq lädupa Jordán mayu kuchunpitami qalaykurqan. Jericó pukyukunapita aywarmi chayarqan chunyaq jirkapa pasar hasta Bet-el jalqakunayaq.
2 Bet-elpita Luzyaq pasarmi chayarqan arquita runakuna taykashqan Atarotyaq.
3 Tsaypita urarna inti jeqanan kaq lädupa pasararqan Jaflet runakuna taykashqan ura kaq Bet-horónyaq. Tsaypitanami chayarqan Gezerpa pasar Mediterráneo Lamaryaq.
4 Tsaynömi Josépa tsurin Manaséspita miraq runakunapa y Josépa tsurin Efraínpita miraq runakunapa posisionnin karqan.
Efraín trïbu runakunapa lindërunkuna mayninpa kashqanpis
5 Efraín trïbu runakuna aylunpa aylunpa chaskishqan posisionpa lindërunqa inti jeqamunan kaq lädupita qalaykur Atarot-adarpa y Bet-horónpa pasar
6 Mediterráneo Lamaryaq chayarqan. Norti kaq läduchöna lindërun qalaykurqan Micmetatcho. Tsaypita inti jeqamunan kaq lädupa tumar Taanat-silupa pasararqan hasta Janoayaq.
7 Janoapita sur kaq lädupa urarmi Atarot, Naarat y Jericópa pasar Jordán mayuyaq chayarqan.
8 Tapúapitanami inti jeqanan kaq lädupa aywar Caná raqra kuchulanpa pasararqan hasta Mediterráneo Lamaryaq. Tsaypami Efraín trïbu runakuna aylunpa aylunpa chaskishqan posisionninpa lindërun karqan.
9 Efraín trïbu runakunapa mas wakin markankuna y caseriunkunapis pulan Manasés trïbu runakunapa posisionninchömi karqan.
10 Gezer markacho taq cananeo runakunata mana qarquptinmi kananyaqpis Efraín trïbu runakuna paykunawan juntu tarkaykan. Itsanqa tsay cananeo runakunataqa ashmaytano arutsir munayninchömi tsararaykan.*
