Josué 17:1-18
17 Suertita jitaptinmi pulan Manasés trïbu runakunapis posisionta chaskipäkurqan. Tsay runakunaqa Josépa qechpa tsurin Manaséspita miraqkunami karqan. Manaséspa qechpa tsurinqa Maquirmi karqan. Maquirpa tsurinqa Galaadmi karqan. Maquirpita miraq runakuna pelyayta ali yachaptinmi posisionta entregarqan Galaad partita y Basán partita.
2 Jordán mayu tsimpan inti jeqanan lädupanami Manasés trïbucho wakin aylu runakuna suertita jitaypa chaskipäkurqan. Tsay runakunaqa karqan Abiezer aylu runakuna, Helec aylu runakuna, Asriel aylu runakuna, Siquem aylu runakuna, Hefer aylu runakuna y Semida aylu runakuna. Tsay runakunaqa Josépa tsurin Manaséspita miraqkunami karqan.
3 Manasés trïbupitami juk runa karqan Zelofehad jutiyuq. Payqa karqan Heferpa tsurin, Heferna karqan Galaadpa tsurin, Galaadna karqan Maquirpa tsurin y Maquirna karqan Manaséspa tsurin. Zelofehadpaqa manami karqantsu olqu tsurinkuna, sinöqa warmi tsurinkunalami karqan. Tsay warmi tsurinkunapa jutinkunami karqan Maala, Noa, Hogla, Milca y Tirsa.
4 Paykunami cüra Eleazarman, Josuéman y mayor runakunaman aywaykur kayno nipäkurqan: “TAYTA DIOS Moisésta nishqannöla noqakunatapis posisionta aypuykalämay tiyükuna chaskishqan kaqpa”.*
Tsayno niptinmi TAYTA DIOS nishqannöla posisionta Josué aypurqan tiyunkuna posisionta chaskishqan kaqpa.
5 Tsaynöpami Manasés trïbu runakunapa posisionnin chunka karqan. Tsaynölami Jordán mayu wak tsimpancho Galaad partipis y Basán partipis Manasés trïbu runakunapa posisionnin karqan.
6 Olqupis warmipis posisionta chaskishqanpitami pulan Manasés trïbu runakunapaq chunka posisionkuna karqan. Galaad partitanami Manaséspita wakin miraqkuna chaskipäkurqan.
7 Manasés trïbu runakunapa posisionninpa lindërunqa Aserpita aywararqan Micmetatyaq. Micmetatqa Siquem tsimpanmi kaykan. Tsaypita sur kaq lädupa aywararqan hasta Tapúa pukyuyaq.
8 Tapúa marka cercankuna Manasés trïbu runakunapa kaptinpis kikin Tapúa markaqa Efraín trïbu runakunapami karqan.
9 Tapúa pukyupitanami Manasés trïbu runakunapa posisionninpa lindërun Caná raqra kuchunpa aywararqan hasta Mediterráneo Lamaryaq. Caná raqra norti kaq lädu Manaséspa kaptinpis tsay tsimpacho juk ishkay markakuna Efraín trïbu runakunapami karqan.
10 Imano kaptinpis Caná raqra sur kaq tsimpan Efraín trïbu runakunapami karqan. Tsay raqra norti kaq tsimpannami Manasés trïbu runakunapa karqan. Raqra kuchunpa aywararmi lindërun chayarqan Mediterráneo Lamaryaq. Manasés trïbu runakuna chaskishqan norti kaq lädu lindërunmi Aser trïbu runakunapa lindërunwan tinkurarqan. Inti jeqamunan kaq lädu lindërunnami Isacar trïbu runakunapa lindërunwan tinkurarqan.
11 Manasés trïbu runakuna chaskishqan wakin markakunaqa Isacar y Aser trïbu runakunapa posisionninkuna kaqpami karqan. Caseriunkunawanmi tsay markakuna karqan Bet-seán, Ibleam, Dor, Endor, Taanac y Meguido.
12 Posision kananpaq tsay markakunata chaskirpis tsaycho taykaq cananeo runakunata manami qarquyta kamäpakurqantsu.
13 Tsaypita Israel runakuna atskaman mirashpan tsaycho taykaq cananeo runakunata arutsirmi munaynincho tsarararqan.*
Efraín y Manasés trïbu runakuna posisionnin mas kananpaq manakushqan
14 Josépita miraq runakunami Josuéta kayno nipäkurqan: “TAYTA DIOSPA bendicionninwan atskaman mirarkaykaptï ¿imanirtaq walkalata posisionta aypumashqanki?”
15 Tsayno niptinmi Josué kayno nirqan: “Efraín jalqakuna qamkunapaq mana aypaptinqa ferezeo y refaíta runakuna tashqan muntikunaman aywaykur chakrata kichapäkuy tsaychöpis tänaykipaq”.
16 Niptinmi kayno nipäkurqan: “Efraín jalqakuna manami aypämanqatsu. Tsaynöpis Jezreel pampacho y Bet-seáncho y caseriunkunacho taq cananeo runakunata manami vinciyta kamäpakütsu. Paykunapaqa pelyaq aywananpaq fiërru carrëtankunapis kaykanmi”.
17 Tsawraqa Josépita miraq Manasés y Efraín trïbu runakunata Josué kayno nirqan: “Qamkunaqa atska kar paykunata ushakätsinkimi. Tsaymi posisionniki
18 intëru tsay muntiyuq jalqakunapis kanqa. Tsay muntikunata tsaqur chakrakunata kichapäkunki mayyaqpis lindërun chayashqanyaq. Pampacho taq cananeo runakuna munayniyuq kaptinpis y fiërru carrëtankuna kaptinpis qamkunaqa qarqapäkunkipaqmi”.
