Josué 18:1-28
18 *Canaánta munayninman churarkurnami Tinkuna Tolduta ichitsipäkunanpaq lapan Israel runakuna Silucho juntakarqan.
2 Itsanqa qanchis trïbukuna manaraqmi posisionta chaskipäkurqanraqtsu.
3 Tsawraqa Israel runakunata Josué kayno nirqan: “Unay ayluntsikuna yärakushqan TAYTA DIOS maynami Canaánman chayatsimashqantsi. ¡Imayyaqraq shuyarpanki posisionta chaskipäkunaykipaq!
4 Cada trïbupita kimsa runata akrapäkuy. Paykunatami kachashaq chaskipäkunaykipaq kaq partikunata rikapakamunanpaq. Rikapakamurmi markakuna maycho maycho kashqantapis qelqapäkamunqa. Kutiykamurna qelqashqankunata apamunqa lindërunkuna maypa maypa kashqantapis musyar cada trïbuta posisionkunata aypunäpaq.
5 “Tsay rikapakuq aywaq runakunami qanchis partiman nacionta rakinqa. Itsanqa ama rakitsuntsu sur kaq läducho Judá trïbu chaskishqan posisionta ni norti kaq läducho Josépita miraq trïbukuna chaskishqan posisionta.
6 Qanchis partiman rakiykur markakuna may maycho kashqantapis qelqamutsun kutiykamur entregamänanpaq. Noqanami TAYTA DIOSNINTSIPA nawpancho suertita jitashaq tsay partikunata aypunäpaq.
7 “Wakin trïbu runakuna posisionta chaskiptinpis Leví trïbu runakunaqa manami chaskipäkunqatsu. Tsaypa trukanqa cüra kaptin paykunapa herencian kanqa TAYTA DIOSTA sirvishqanmi. Tsaynöpis Gad, Rubén y pulan Manasés trïbu runakunaqa maynami posisionta chaskipäkushqa. Tsay posisiontaqa TAYTA DIOSPA sirviqnin Moisésmi Jordán mayu wak tsimpacho kaykaptintsi aypurqan”.
8 Nacionta rikapakuqkuna yarqunanpaq kaykaptinmi Josué kayno nirqan: “Qamkuna manaraq aypushqä partikunata tumamur markakuna maycho maycho kashqantapis qelqamunki. Rikapakarkamurnami kay Siluman kutipäkamunki qelqashqaykita apakurkur. Noqanami TAYTA DIOSPA nawpancho suertita jitashaq tsay partikunata aypunäpaq”.
9 Tsawraqa tsay runakuna aywaykur manaraq aypushqan partikunata intëruta rikapakur tumamurqan. Qanchis partiman rakiykurmi qelqapäkurqan markakuna maycho maycho kashqantapis. Nirkur kutipäkurqan Josué taykashqan Siluman.
10 Josuénami jinan Silulacho TAYTA DIOSPA nawpancho suertita jitarqan cada partita mayqan trïbutapis aypunanpaq.
Benjamín trïbu runakunapa lindërunkuna mayninpa kashqanpis
11 Posisionta aypunanpaq suertita jitaptin yarqamurqan Benjamín trïbupa aylunkunapaq. Tsaymi Benjamín trïbu runakuna posisionta chaskipäkurqan Judá trïbu runakunapa posisionnin kashqanpita hasta Josépita miraq trïbu runakunapa posisionnin kashqanyaq.
12 Benjamín trïbu runakunapa posisionnin norti kaq lädupa lindërunqa Jordán mayupitami qalaykurqan. Tsaypita Jericó norti kaq lädupa pasar inti jeqanan kaq lädupa witsan witsan aywararqan. Jalqakunapa pasarkur Bet-avén chunyaq jirkapana pasararqan.
13 Tsaypita sur kaq lädupa tumashpan Luzpa pasar Atarot-adarpa uran uran aywararqan. Luzpa jukaq jutinqa Bet-elmi kaykan. Atarot-adarqa juk jirkanchömi kaykan. Tsay jirkanqa ura kaq Bet-horón sur kaq tsimpanchömi kaykan.
14 Tsaypita tsay jirkan kinralanpami lindëru pasararqan hasta inti jeqanan kaq lädu kuchunyaq. Tsaypitami sur kaq lädupa yapay tumashpan Quiriat-baalyaq chayarqan. Quiriat-baalqa Judá trïbu runakunapa markanmi karqan. Tsay markapa jukaq jutinmi kaykan Quiriat-jearim. Inti jeqanan kaq lädu lindërunmi pasararqan tsay markakunapa, jalqakunapa y raqrakunapa.
15 Sur kaq lädupa aywaq lindërunqa qalaykurqan Quiriat-jearimpa kuchunpitami. Tsaypitami inti jeqamunan kaq lädupa pasar chayarqan Neftoa pukyuyaq.
16 Tsaypita uran uran aywararqan Refaim pampa norti kaq kuchunyaq. Tsayqa jirka chakinchömi kaykan. Tsaypitaqa Ben-hinom raqrami qalaykun. Tsay lindëru Ben-hinom pampapa pasashpan jebuseo runakuna tashqan jirka sur kaq lädupami aywararqan. Tsaypitami aywararqan En-rogel pukyuyaq.
17 Tsaypitami norti kaq lädupa tumashpan En-semespa pasar Gelilotyaq chayarqan. Gelilotqa Adumín jirkan tsimpanchömi kaykan. Tsaypitami uran uran aywararqan Bohán Ben-Rubén qaqapa.
18 Tsaypita *Arabá pampa kuchuncho kaykaq jirkakuna norti kaq lädupa pasashpan Arabá pampapana uran uran aywararqan.
19 Bet-hogla norti kaq lädupa pasarnami chayarqan *Kachi Lamar norti kaq kuchunpa. Tsaychömi Jordán mayu ushaykan. Tsay markakunapa, jalqakunapa y raqrakunapami pasararqan surpa kaq lindërun.
20 Inti jeqamunan kaq lädu lindërunqa Jordán mayu kuchunpami aywararqan. Tsay markakunapa, jalqakunapa y raqrakunapami Benjamín trïbu aylukunapa lindërun pasararqan.
21 Benjamín trïbu runakuna aylunpa aylunpa chaskishqan markakuna karqan Jericó, Bet-hogla, Emec-casis,
22 Bet-arabá, Zemaraim, Bet-el,
23 Avim, Pará, Ofra,
24 Quefar-haamoni, Ofni y Geba. Tsay markakuna chunka ishkaymi karqan. Tsay markakunapa caseriunkunapis karqanmi.
25 Wakin chaskishqan markakuna karqan Gabaón, Ramá, Beerot,
26 Mizpa, Cafira, Mozah,
27 Requem, Irpeel, Tarala,
28 Zela, Elef, Jebús (Jebúspa jukaq jutin kaykan Jerusalén), Gabaa y Quiriat. Tsay markakuna chunka chuskumi karqan. Tsay markakunapa caseriunkunapis karqanmi. Tsaypami Benjamín trïbu runakuna aylunpa aylunpa chaskishqan posisionninpa lindërun karqan.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
