Josué 19:1-51
19 Posisionta aypunanpaq suertita yapay jitaptin yarqamurqan Simeón trïbupa aylunkunapaq. Tsaymi Simeón trïbu runakuna posisionta chaskipäkurqan Judá trïbu runakunapa posisionninpa chawpincho.
2 Tsawraqa paykunapa markankuna karqan Beerseba, Seba, Molada,
3 Hazar-sual, Bala, Ezem,
4 Eltolad, Betul, Horma,
5 Siclag, Bet-marcabot, Hazar-susa,
6 Bet-lebaot y Saruhén. Tsay markakuna chunka kimsami karqan. Tsay markakunapa caseriunkunapis karqanmi.
7 Wakin chaskishqan markakunami karqan Aín, Rimón, Eter y Asán. Tsay markakuna chuskumi karqan. Tsay markakunapa caseriunkunapis karqanmi.
8 Sur kaq lädupa wakin markakunapis Simeón trïbu runakunapaqmi karqan hasta Baalat-beeryaq. Baalat-beerpa jukaq jutinqa *Neguev Ramatmi kaykan.
Tsaynömi karqan Simeón trïbu runakuna aylunpa aylunpa posisionta chaskishqan markakuna y caseriunkuna.*
9 Simeón trïbu runakunapa posisionninqa Judá trïbu runakunapa posisionninpa chawpinchömi karqan. Tsayno karqan Judá trïbu runakunapa posisionnin aläpa jatun kaptinmi.
Zabulón trïbu runakunapa lindërunkuna mayninpa kashqanpis
10 Posisionta aypunanpaq suertita yapay jitaptin yarqamurqan Zabulón trïbupa aylunkunapaq. Paykunapa posisionninqa chayarqan hasta Saridyaqmi.
11 Saridpita inti jeqanan kaq lädupa aywarmi lindërunqa Maralapa pasararqan hasta Dabesetyaq. Tsaypitami Jocneam tsimpancho kaykaq raqraman chayarqan.
12 Saridpita inti jeqamunan kaq lädupanami lindërunqa Quislot-taborpa pasarar Daberatyaq chayarqan. Tsaypitana witsan witsan aywararqan Jafíayaq.
13 Tsaypitami pasararqan Gat-heferpa, Ita-cazínpa y Rimónpa. Rimónpitami tumararqan Neapa.
14 Norti kaq lädupana lindërun tumar Hanatónpa pasararqan. Tsaypitami chayarqan Jefte-el pampayaq.
15 Tsay posisioncho kaq markakuna karqan Catat, Naalal, Simrón, Idala, Belén y wakin markakunapis. Paykunapa markankuna chunka ishkaymi karqan. Tsay markakunapa caseriunkunapis karqanmi.
16 Tsaynömi karqan Zabulón trïbu runakuna aylunpa aylunpa posisionta chaskishqan markakuna y caseriunkunapis.
Isacar trïbu runakunapa lindërunkuna mayninpa kashqanpis
17 Posisionta aypunanpaq suertita yapay jitaptin yarqamurqan Isacar trïbupa aylunkunapaq.
18 Paykunapa markankuna karqan Jezreel, Quesulot, Sunem,
19 Hafaraim, Sihón, Anaharat,
20 Rabit, Quisión, Abez,
21 Remet, En-ganim, En-hada y Bet-pases.
22 Lindërun pasararqan Taborpa, Sahazimapa y Bet-semespa hasta Jordán mayuman chayananyaq. Paykunapa markankuna chunka soqtami karqan. Tsay markakunapa caseriunkunapis karqanmi.
23 Tsaynömi karqan Isacar trïbu runakuna aylunpa aylunpa posisionta chaskishqan markakuna y caseriunkunapis.
Aser trïbu runakunapa lindërunkuna mayninpa kashqanpis
24 Posisionta aypunanpaq suertita yapay jitaptin yarqamurqan Aser trïbupa aylunkunapaq.
25 Paykunapa markankunaqa karqan Helcat, Halí, Betén, Acsaf,
26 Alamelec, Amad y Miseal. Inti jeqanan kaq lädupami lindërun pasararqan Carmelo jirkapa y Sihor-libnatpa.
27 Tsaypita inti jeqamunan kaq lädupa tumashpan Bet-dagónpa pasar chayarqan Jefte-el pampayaq. Jefte-el pampachöqa Zabulón trïbu runakunapa lindërunwanmi tinkurarqan. Tsaypita norti kaq lädupa tumar pasararqan Bet-emecpa y Neielpa hasta Cabulman chayashqanyaq.
28 Tsaypita pasararqan Abdónpa, Rehobpa, Hamónpa y Canápa hasta jatunkaray Sidón markaman chayashqanyaq.
29 Tsaypita tumar lindërun Ramápa pasararqan hasta corralashqa Tiro markayaq. Tsaypitaqa Hosapa pasar Mediterráneo Lamarman chayarqan. Aser trïbu runakunapa markankuna karqan Mahaleb, Aczib,
30 Uma, Afec Rehob. Paykunapa markankunaqa ishkay chunka ishkaymi (22) karqan. Tsay markakunapa caseriunkunapis karqanmi.
31 Tsaynömi karqan Aser trïbu runakuna aylunpa aylunpa posisionta chaskishqan markakuna y caseriunkunapis.
Neftalí trïbu runakunapa lindërunkuna mayninpa kashqanpis
32 Posisionta aypunanpaq suertita yapay jitaptin yarqamurqan Neftalí trïbupa aylunkunapaq.
33 Paykuna chaskishqan posisionpa lindërun qalaykurqan Helefpita. Tsaypita pasararqan Alón-saananimpa, Adami-necebpa, Jabneelpa y Lacumpa hasta Jordán mayuyaq.
34 Inti jeqanan kaq lädupami lindërun Aznot-taborpa pasarar chayarqan Hucocyaq. Sur kaq läducho tinkurarqan Zabulón trïbu runakunapa lindërunwan. Inti jeqanan lädupana lindërun tinkurarqan Aser trïbu runakunapa lindërunwan. Inti jeqamunan kaq lädupanami lindërun chayarqan Jordán mayuyaq.
35 Paykunapa corralashqa markankuna karqan Sidim, Zer, Hamat, Racat, Cineret,
36 Adama, Ramá, Hazor,
37 Cedes, Edrei, En-hazor,
38 Irón, Migdal-el, Horem, Bet-anat y Bet-semes. Paykunapa markankunaqa chunka isqunmi karqan. Tsay markakunapa caseriunkunapis karqanmi.
39 Tsaynömi karqan Neftalí trïbu runakuna aylunpa aylunpa posisionta chaskishqan markakuna y caseriunkunapis.
Dan trïbu runakunapa lindërunkuna mayninpa kashqanpis
40 Posisionta aypunanpaq suertita yapay jitaptin yarqamurqan Dan trïbupa aylunkunapaq.
41 Paykunapa markankuna karqan Zora, Estaol, Ir-semes,
42 Saalabín, Ajalón, Jetla,
43 Elón, Timnat, Ecrón,
44 Elteque, Gibetón, Baalat,
45 Jehúd, Bene-berac, Gat-rimón,
46 Mejarcón y Racón. Tsaynöpis paykunapaqmi karqan Jope marka cercancho kaykaq partikuna.
47 Tsayno kaptinpis posisionninta Dan trïbu runakuna manami qechuyta kamäpakurqantsu. Tsaymi Lesemman aywapäkurqan tsaycho tänanpaq. Lesem runakunawan pelyar wanuykatsir tsaychöna lapan tarqan.* Tsay markapa jutinta trukatsirqan Dan jutin kananpaq. Tsaymi unay aylunpa jutin Dan kashqanno markapa jutinpis karqan.
48 Tsaynömi karqan Dan trïbu runakuna aylunpa aylunpa posisionta chaskishqan markakuna y caseriunkunapis.
Josuépis posisionta chaskishqan
49 Posisionta aypuyta usharkuptinnami Nunpa tsurin Josuétapis posisionta Israel runakuna rikatsirqan wakin kaq trïbukuna chaskishqan posision chawpincho.
50 TAYTA DIOS nishqannömi Josué manakuptin markata aypupäkurqan. Tsaymi chaskirqan Efraín jalqakunacho kaq Timnat-sera markata. Josuéqa tsay markata altsar wayikunatapis yapay sharkarkatsir tsaycho tarqan.
51 Israel runakunata posisionta aypunanpaqmi suertita jitapäkurqan cüra Eleazar, Josué y Israel runakunapa mandaqninkuna. Tinkuna Toldu punkuchömi TAYTA DIOSPA nawpancho tsayno suertita jitapäkurqan. Tinkuna Tolduqa Siluchömi karqan. Tsaynöpami posisionkunata lapan trïbukunata aypuyta ushapäkurqan.
Ichic wilacuycuna
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 19.8 1Crón. 4.28-33.
^ 19.47 Jue. 18.1-29.
