Josué 23:1-16
23 TAYTA DIOS yanapaptinmi contran runakunata ushakarkatsir Israel runakuna atska wata jawka kawapäkurqan. Josué awkinna kaykarmi
2 Israel runakunata, mayor runakunata, mandaqkunata, juezkunata y soldädukunapa mandaqninkunata qayaykatsir kayno nirqan: “Rikamashqaykinöpis noqaqa awkinnami kaykä.
3 Qamkuna rikapäkushqankimi kay nacioncho taq runakunata TAYTA DIOSNINTSI imano ushakätsishqantapis. Paymi noqantsipa favornintsi pelyashqa.
4 Trïbunpa trïbunpa chaskinantsipaqmi tsay runakuna tashqan partikunata suertita jitaypa aypushqä. Manami qechushqantsi markakunalatatsu aypushqä, sinöqa qechuypaq kaqkunatapis Jordán mayupita qalaykur hasta Mediterráneo Lamaryaqmi aypushqä.
5 Tsay qechuypaq kaq markakunacho tänantsipaqmi tsaycho taq runakunata TAYTA DIOSNINTSI qarqunqapaq. Tsaymi TAYTA DIOSNINTSI promitishqanno tsay markakunata chaskipäkunkipaq.
6 “Tsayno kaykaptinqa Moisés qelqashqan librucho leykuna nishqantaqa juktapis mana qonqaypa lapanta cumplipäkunki.
7 Kay markakunacho taykaq jäpa runakunawanqa ama talukankitsu. Tsaynöpis paykuna adorashqan dioskunata ama adorapäkunkitsu ni sirvipäkunkitsu ni jutincho imatapis ama promitipäkunkitsu ni jutinkunata imalapaqpis ama joqarinkitsu.
8 TAYTA DIOSNINTSITA kanan wiyakushqaykino imaypis wiyakärinki.
9 “Kaycho tänantsipaqmi jatusaq markakunacho taq tsaytsika runakunata TAYTA DIOS ushakätsishqa. Pay yanapamaptintsimi kananyaq pipis mana ichipämashqantsitsu.
10 Promitimashqantsinöla favornintsi pelyaptinmi* qamkunaqa juk runala karpis waranqa (1,000) runakunata qati qatiykur ushakätsinkipaq.*
11 Tsayno kaykaptinqa lapan shonquykiwan TAYTA DIOSNINTSITA *kuyar munashqanno imaypis kawapäkuy.
12 “Mana wanutsipäkushqayki runakunawan juntu tashpayki tsurikikunata paykunapa tsurinkunawan tätsiptikiqa
13 TAYTA DIOSNINTSI tsay runakunata manami qarqunqatsu. Tsaypa trukanqa tsay runakuna qamkunapaq kanqa redno, toqlano*, lätiguno y nawikicho jatiraykaq kashanömi. Tsaynöpami maypis täkuypaq nacionnintsiman churashushpaykipis TAYTA DIOSNINTSI lapaykita ushakätsishunkipaq.
14 “Noqaqa wanukunäpaqnami kaykä. Tsayno kaptinpis musyapäkunkimi lapan promitimashqantsikunata TAYTA DIOSNINTSI cumplishqanta. Tsayno cumplishqantaqa imaypis ama qonqapäkuytsu.
15 TAYTA DIOSNINTSI yanapashunaykipaq promitishushqaykita cumplishqannölami mana wiyakäriptikiqa ushakätsishunaykipaq nishushqaykitapis cumplinqa. Tsaymi maypis täkuypaq qoykushushqayki nacioncho juklaylapis tanqatsu.
16 Noqantsiwan Tayta Diosnintsi *pactu rurashqanta mana cumplishpayki juk dioskunata adorapäkuptikiqa TAYTA DIOS fiyupami rabyakunqa. Tsaymi manaraqpis aykälata kay qoykushushqayki ali nacioncho ushakätsishunkipaq”.
Ichic wilacuycuna
^ 23.10a Deut. 3.22.
^ 23.10b Deut. 32.30.
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 23.13 Wakin runakunaqa tsiklano nipäkun.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
