Josué 3:1-17
3 Tsaypita jukaqnin tuta tsaka tsakala Josué y lapan Israel runakuna Sitimpita aywarmi Jordán mayu kuchunman chayapäkurqan. Mayuta manaraq tsimpar jinalanchömi patsakärirqan.
2 Tsaypita kimsa junaq pasarkuptinnami Israel autoridäkuna intëru campamentupa purir
3 kayno nipäkurqan: “TAYTA DIOSNINTSIPA *Pactu Babulninta Leví trïbu cürakuna apaykaqta rikar noqantsipis qepalanta aywapäkushun.*
4 Mayu tsimpa nänitaqa manami reqintsitsu. Tsaymi mana pantakänantsipaq paykunapa karu qepalanta aywashun. Itsanqa apaykashqan babulmanqa ama aläpa witipäshuntsu. Tsaypa trukanqa waranqa (1,000) metrutano qepanta aywashun”.
5 Nirkurnami runakunata Josué kayno nirqan: “Wara junaqmi rikaykaptintsi TAYTA DIOS milagruta ruranqa. Tsayno kananpaq kaykaptinqa purificakäriy”.
6 Tsaypita jukaqnin junaq cürakunata Josué kayno nirqan: “TAYTA DIOSPA Pactu Babulninta runakunapa puntanta apapäkuy”.
Tsaymi Josué nishqanno babulta apapäkurqan runakunapa puntanta.
7 Tsaypitami Josuéta TAYTA DIOS kayno nirqan: “Kanan junaqpitami Israel runakuna musyapäkunqa Moisésta yanapashqänöla qamtapis yanapaykashqäta. Tsayno yanapaykashqäta tantiyarmi cäsukushunkipaq.
8 Qamnami Pactu Babulta apaykaq cürakunata ninki Jordán mayuman yaykuykur ichinanpaq”.
9 Tsayno niptinmi Israel runakunata Josué kayno nirqan: “Shapäkamuy TAYTA DIOSNINTSI imata nimashqantapis wilanäpaq”.
10 Juntakaptinmi kayno nirqan: “Kanan junaqmi qamkuna tantiyankipaq imayyaqpis kawaq TAYTA DIOS noqantsiwan kaykashqanta. Paymi yanapamäshun tsimpacho taq runakunata ushakätsinantsipaq. Tsay runakuna kaykan cananeo runakuna, heteo runakuna, heveo runakuna, ferezeo runakuna, gergeseo runakuna, amorreo runakuna y jebuseo runakunami.
11 Tsaynöpis kay patsata munaynincho tsararaq TAYTA DIOSPA Pactu Babulnintami puntantsita Jordán mayuta pasatsinqa.
12 Kanan akrapäkuy chunka ishkay runakunata cada trïbupita jukta.*
13 Kay patsata munaynincho tsararaq TAYTA DIOSPA Pactu Babulninta apaq cürakuna yakuman yaykuriptinmi mayu tsapakanqa tsakilapana pasanantsipaq”.
14 Tsaymi Jordán mayuta tsimpananpaq Israel runakuna toldunkunata shuntarkuptin cürakuna Pactu Babulta umrushqa puntata aywapäkurqan.
15 Cosëcha tiempu kaptinmi Jordán mayu pasaypa cargashqa aywaykarqan. Tsayno kaptinpis Pactu Babulta apaq cürakuna Jordán mayuman yaykuyta qalaykuptinmi
16 Saretán particho kaykaq Adam markapita janaman yaku tsapakäkurqan. Tsaymi tsay markapita uramanpana hasta *Arabá Lamaryaq tsakina karqan. Arabá Lamarqa *Kachi Lamarmi kaykan. Jordán mayu tsayno tsakiptinnami Israel runakuna Jericó marka lädupa tsimpapäkurqan.
17 Israel runakuna pasananyaqmi TAYTA DIOSPA Pactu Babulninta umrushqa cürakuna tsakishqa mayu chawpincho ichirparqan. Tsaymi Israel runakuna lapanpis tsakilapana pasapäkurqan.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 3.3 Núm. 10.33.
^ 3.12 Jos. 4.2-3.
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
