Josué 5:1-15
5 Amorreo runakunapa mandaqnin reykuna mayarqan Israel runakuna pasananpaq Jordán mayuta TAYTA DIOS tsakitsishqanta. Tsay reykunaqa Jordán mayu tsimpan inti jeqanan lädupami tarqan. Tsaynölami mayarqan Mediterráneo Lamar kuchuncho taq cananeo runakunapa mandaqnin reykunapis. Tsayta musyaykurmi pasaypa mantsakushpan Israel runakunawan pelyaq aywaytapis mana munapäkurqantsu.
2 Jordán mayuta lapan pasarkuptinmi Josuéta TAYTA DIOS kayno nirqan: “Rumipita cuchillukunata rurarkur Israel runakunata *señalatsinki aylunkunano señalashqa kananpaq”.
3 Tsayno niptinmi rumipita cuchillukunata ruraykur Aralot jirkacho Israel runakunata Josué señalatsirqan.
4 Tsayno señalatsirqan Egiptupita yarqamuq runakuna chunyaq jirkacho wanur ushakashqa kaptinmi. Tsay wanuq runakunaqa Egiptupita yarqamur guërraman aywapäkunanpaq kalpanchönami karqan.
5 Tsay runakuna señalashqa kaptinpis chunyaq jirkacho yuriqkuna señaläni kaptinmi Josué señalatsirqan.
6 Egiptupita yarqamur guërraman aywapäkunanpaq kalpancho kaq runakunaqa chusku chunka (40) wata chunyaq jirkapa puriykashqalanchömi wanurqan. Tsayno wanupäkurqan TAYTA DIOSTA mana cäsukushqanpitami. Tsaymi paykunata TAYTA DIOS nirqan unay aylunkunata promitishqan nacionman mana yaykunanpaq.* Tsaychöqa lëchipis abëjapa mishkinpis yakunöraqmi atska kaykan.
7 Egiptupita yarqamuq runakuna wanushqa kaptinmi paykunapa tsurinkunata Josué señalatsirqan. Paykunatami Tayta Dios churarqan wanuq runakunapa trukan promitishqan nacionta chaskipäkunanpaq. Nänicho yurishqa karmi paykunaqa tsay junaqyaq señaläni karqan.*
8 Lapanta señalayta usharkuptinnami aliyänanyaq jinan campamentulacho qoyäkärirqan.
9 Tsaypitanami Josuéta TAYTA DIOS kayno nirqan: “Señalashqana karmi Egiptucho ashmay kashqanpita mana penqakärinqanatsu”.
Tayta Dios tsayno nishqanpitami kananyaq tsay partipa jutin kaykan Gilgal.*
10 Gilgalqa Jericó pampachömi kaykan. Israel runakuna tsaychömi wata qalaykunan killacho chunka chusku junaq tardi *Pascua fiestata* rurapäkurqan.
11 Tsaypita jukaqnin junaqmi mikupäkurqan levadüraynaq tantata y trïgu kamtsata. Tsaykunaqa jinancho wayushqan mikuykunami karqan.
12 Tsay junaqpita patsa mikupäkunanpaq *maná manami karqannatsu.* Tsaymi *Canaáncho chakrakuna wayushqalantana mikupäkurqan.
Josuéta Tayta Diospa soldädunkunapa mandaqnin yuripashqan
13 Jericó marka cercancho puriykashqanchömi Josué rikarqan espädan aptashqa ichiraykaq runata. Tsaymi nawpanman witiykur kayno nir tapurqan: “¿Qamqa kaykanki noqakunapa favornïku o conträkunapa favorninku?”
14 Tsayno tapuptinmi tsay runa kayno nirqan: “Manami mayqaykipapis favornikitsu kaykä. Noqaqa TAYTA DIOSPA soldädunkunapa mandaqninmi kaykä”.
Tsayno niptinmi Josuéqa pampaman lätakuykur tsay soldäduta tapurqan kayno nir: “Tayta, sirviqnikimi kä. ¿Imataq kaykan wilamänaykipaq?”
15 Tsayno niptinmi TAYTA DIOSPA soldädunkunapa mandaqnin kayno nirqan: “Jatirashqayki lanqikita jorquy. *Sagrädu partichönami ichiraykanki”.
Tsayno niptinmi Josuéqa lanqinta jukla jorqurqan.
Ichic wilacuycuna
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 5.6 Núm. 14.28-35.
^ 5.5-7 Gén. 17.9-14.
^ 5.9 Gilgal ninanqa jorqushqa ninanmi.
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 5.10 Éxo. 12.1-14.
^ maná Manáqa karqan culandrupa murunno y jachapa weqin niraq qarwashlami. Tsay mikuytami Israel runakunata Tayta Dios kamariparqan chunyaq tsaki jirkacho. Tsaytami ankaypapis machkaypapis y tantata ruraykurpis mikupäkurqan. Israel runakunaqa chusku chunka (40) watami tsay mikuyta mikupäkurqan (Éxo. 16; Núm. 11.4-9; Juan 6.31).
^ 5.12 Éxo. 16.13-15, 31, 35.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ sagrädu Liyinki santupita tantiyatsikuyta.
