Josué 6:1-27
6 Israel runakunata mantsakurmi Jericó markapa punkunta wichqarkur trancapäkurqan. Tsaymi pipis yaykurqantsu ni yarqurqantsu.
2 Tsayno kaptinpis Josuéta TAYTA DIOS kayno nirqan: “Makikimanmi churashqä Jericó markata, mandaqnin reyta y soldädunkunatapis.
3 Tsaymi soldäduykikunawan cada junaq Jericó marka murälla waqtanpa soqta junaqyaq tumapanki.
4 Tsayno rurarqa *Pactu Babulpa puntanta qanchis cürakuna aywapäkunqa *cornëtan aptashqa. Qanchis kaq junaqchömi itsanqa cornëtakunata cürakuna tukamuptin qanchis kuti lapayki tumapanki.
5 Tsay junaq guërrapaq tukashqanno cürakuna tukashqanta mayaykur fuerti qaparpanki. Tsayno qaparpaptikimi Jericó markata tsaparaq murälla kikilan juchunqapaq. Juchuptin jukla tsay markaman yaykapäkunki”.
6 Tsayno niptinmi cürakunata qayaykur Nunpa tsurin Josué kayno nirqan: “Jericó markata tumapänantsipaq Pactu Babulta apapäkunki. Apaqkunapa puntanta qanchis cürakuna aywapäkutsun cornëtan aptashqa”.
7 Tsaynölami runakunatapis Josué kayno nirqan: “Qamkunapis lapayki Jericó markata tumapanki. Pelyananpaq kamarikushqa runakunapis TAYTA DIOSPA babulninpa puntanta aywapäkunqa”.
8 Josué parlayta usharkuptinmi TAYTA DIOSPA Pactu Babulninpa puntanta qanchis cürakuna aywapäkurqan cornëtata tukaraykar.
9 Paykunapa puntantanami pelyananpaq kamarikushqa runakuna aywapäkurqan. Babulpa qepanta wakin runakunapis pelyananpaq kamarikushqa aywapäkuptinmi cürakuna mana chawaypa tukapäkurqan.
10 Manaraq yarquptinmi Josué kayno nirqan: “Upälala aywapäkushun. Qaparänaykipaq niptïraqmi lapan kalpaykiwan qaparpanki”.
Jericó markaman yaykapäkushqan
11 Tsayno niptinmi TAYTA DIOSPA babulninta apakurkur Jericó marka murälla waqtanpa tsay junaq juk kutila tumapäkurqan. Nirkurnami campamentunman kutipäkurqan.
12 Tsaypita jukaqnin tuta tsaka tsakala Josué sharkurqan. Cürakunanami TAYTA DIOSPA *Pactu Babulninta umrukur apapäkurqan.
13 Paykunapa puntantami qanchis cürakuna yarqupäkurqan *cornëtata tukaraykar. Paykunapa puntantami pelyananpaq kamarikushqa runakunapis aywapäkurqan. Wakin runakunanami TAYTA DIOSPA babulnin qepanta aywapäkurqan. Tsayno lapan aywapäkuptinmi cornëtata mana chawaypa tukapäkurqan.
14 Jericó markata tsayno tumaparkurmi campamentunman kutipäkurqan. Tsaynölami soqta junaqyaq tumapäkurqan.
15 Qanchis kaq junaqchöpis tsaka tsakala markata yapay tumapämuq aywarmi tsay junaqqa qanchis kuti tumaparqan.
16 Qanchis kaq tumaycho cornëtata tukamuptinmi Josuéqa runakunata kayno nirqan: “¡Qaparpay! ¡TAYTA DIOSMI kay markata makintsiman churamushqa!
17 Kay markata chipyaq rupatsishun.* Tsayno rupatsiptintsiqa TAYTA DIOSPAQ sacrificiumi kanqa. Rikapakuq kachashqantsi runakunata pakashqanpitami *wayrapakuq warmi Rahabta y wayincho kaykaqkunalata kawaykaqta kachaykushun.
18 Tsay markacho kaqkunataqa mayjina ali kaptinpis ama imatapis apakushuntsu, sinöqa lapanta rupatsishun. Imalatapis apakuptikiqa maldición lapantsimanpis chayamunqapaq.
19 Qoripita kaqkunata, qellaypita kaqkunata, broncipita kaqkunata y fiërrupita kaqkunatami itsanqa TAYTA DIOSPAQ shuntashqantsi kaqman churashun”.
20 Cornëtata cürakuna tukaptin y Israel runakuna qaparpaptinmi marka tsaparaq murälla elaqpita juchurqan.* Juchurkuptinnami markaman yaykur
21 espädawan wanutsipäkurqan runakunata, warmikunata, mözukunata, awkinkunata, wäkakunata, uyshakunata y bürrukunatapis.
22 Rikapakuq kachashqan ishkay runakunatami Josué kayno nirqan: “Wayrapakuq warmi Rahabta promitishqaykinöla wayinman aywapäkuy lapan aylunkunatawan jorqamunaykipaq”.
23 Tsayno niptinmi Rahabpa wayinman aywaykur jorqapäkamurqan kikinta, mamanta, taytanta, turinkunata y tsay wayicho lapan aylunkunatapis. Nirkurnami pushapäkurqan Israel runakunapa campamentunpita juk läduman.
24 Tsaypitanami Jericó markacho kaqkunata lapan imaykatapis rupatsir ushapäkurqan. Qellayta, qorita, broncita y fiërrukunatami itsanqa shuntapäkurqan TAYTA DIOSPA wayinpaq shuntashqan kaqman churapäkunanpaq.
25 Jericóman rikapakuq kachashqan runakunata pakashqanpitami Rahabta* y aylunkunataqa Josué mana wanutsirqantsu. Tsaypita patsami kananyaq Rahabpa aylunkuna Israel runakunacho tarkaykan.
26 Tsaypitanami Josué kayno nirqan: “Jericó markata yapay sharkatsiyta munaq runaqa maldicionädumi kanqa. Tsaymi marka murällata sharkatsiq runapa qechpa kaq tsurinpis wanunqapaq. Tsaynölami marka yaykuna punkuta tanaq runapa nunush kaq tsurinpis wanunqapaq”.*
27 Josuéta TAYTA DIOS yanapashqan maytsaychöpis mayakarqanmi.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 6.17 Deut. 13.15-16; 20.16-18.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 6.20 Heb. 11.30.
^ 6.25 Heb. 11.31.
^ 6.26 1Rey. 16.34.
