Josué 8:1-35
8 Tsaypitanami Josuéta TAYTA DIOS kayno nirqan: “Ama mantsakuytsu ni qelanaytsu. Pelyananpaq kamarikushqa runakunata shuntarkatsimur jukla aywapäkuy Hai markata atacanaykipaq. Noqami yanapashayki Hai markapa mandaqnin reyta y tsaycho taq runakunata lapanta ushakätsinaykipaq. Tsaymi paykunapa chakrankunapis y markanpis qamkunapaqna kanqa.
2 Jericó markacho taq runakunata y mandaqnin reyta ushakätsishqaykinöla Hai markacho taq runakunata y mandaqnin reytapis ushakätsinki. Tsay markapitami itsanqa uywankunata y imaykantapis kikikikunapaq apakärimunki. Elaqpita atacapäkunaykipaq marka qepanpa churanakärinki”.
3 Tsayno niptinmi Josué kimsa chunka waranqa* (30,000) runakunata akrarqan pelyaq aywananpaq. Paykunata Hai markaman tsakaypa kacharmi
4 kayno nirqan: “Nishqäta shumaq mayapäkamay. Marka qepanpa yaykuykur pakakärinki. Tsaycho listu shuyarpaykanki elaqpita markaman yaykuykur atacanaykipaq.
5 Noqanami wakin runakunawan markaman aywaykur achäquita ashipäshaq. Pelyaq yarqamuptinmi nawpata qeshpishqantsinöla qeshpiq tukärishaq.
6 Paykunaqa yapay vincimashqantsita yarparmi qepäkunata qatipämanqapaq.
7 Tsayyaqmi qamkunaqa pakaraykashqaykipita yarqamur markaman yaykapäkunki. TAYTA DIOSNINTSIMI tsay markata makintsiman churamunqa.
8 Markaman yaykuykur TAYTA DIOS nishqannöla wayikunata jukla rupatsipäkunki. Kay nishqätaqa mana qonqaypa rurapäkunki”.
9 Tsayno nirmi Josué paykunata kacharqan Hai marka lädupa pasar inti jeqanan kaq läducho pakakärinanpaq. Nishqannölami aywaykur pakakärirqan manaraq Bet-el markaman chayar. Josuénami campamentucho quëdarqan.
10 Waraynin* tutanami tsaka tsakala campamentucho quëdaq runakunata Josué shuntarqan Hai runakunawan pelyaq aywapäkunanpaq. Nirkurmi paykunapa puntanta Israel mayor runakunawan aywapäkurqan.
11 Marka frentinpa pasarmi norti kaq läduncho jamapäkurqan. Tsay markapita paykunata rakirarqan juk raqra.
12 Tsaypitami wakin runakuna pakarpaykashqanman pitsqa waranqatano (5,000) runakunata Josué kacharqan. Tsay runakunaqa inti jeqanan kaq läducho y Haipita Bet-elman aywanachömi pakarpaykarqan.
13 Tsaynöpami Israel runakuna ishkay puntaman churanakushqa kaykarqan. Jukaq puntami karqan markapita inti jeqanan kaq läducho y jukaq puntanami karqan norti läducho. Tsay tsakaymi Josuéwan aywaq runakuna pulan pampayaq aywapäkurqan.
14 Patsa waraptinnami tsimpancho kaykashqanta rikar Hai markapa mandaqnin rey lapan runakunawan jukla yarqurqan *Arabá pampaman aywaq bajädacho Israel runakunawan pelyapäkunanpaq. Itsanqa manami musyarqantsu wakin Israel runakuna markapa waqtancho pakaraykashqanta.
15 Tsaymi Josuéwan kaykaq runakunaqa qeshpiq tukur aywapäkurqan chunyaq jirkapa aywaq nänipa.
16 Tsayta rikarmi Hai runakunapa mandaqnin rey lapan runakunata nirqan Israel runakunata qatipänanpaq. Tsayno qatiparmi markapita karutana aywapäkurqan.
17 Tsaymi markacho quëdaqkunata washänanpaq Hai markacho ni Bet-el markacho juk runalapis mana karqantsu.
18 Tsaypitanami Josuéta TAYTA DIOS kayno nirqan: “Lanzaykita Hai markaman toqriy. Noqami yanapashayki ushakätsinaykipaq”.
Tsayno niptinmi Josuéqa lanzanta joqarirqan.
19 Tsaymi Israel runakunaqa pakaraykashqanpita yarqarkamur warakayla markaman yaykushpan lapan wayikunatapis rupatsipäkurqan.
20 Israel runakunata qatiparkaykashqancho Hai runakuna tikraykurmi rikapäkurqan markapita yanawyayparaq qoshtay sharkuykaqta. Josuéwan kaykaq Israel runakunanami tsayno rupaykashqanta rikaykur chunyaq jirkapa qeshpiykashqanpita Hai runakunata atacayta qalaykurqan. Tsaymi Hai runakunaqa maypa qeshpiytapis kamäpakurqantsu.
21 -
22 Nirkurna marka rupatsiq Israel runakuna yarqupäkamurqan Hai runakunawan pelyananpaq. Tsayno ishkan lädupita atacarmi Hai runakunata lapanta wanutsipäkurqan.
23 Hai markapa mandaqnin reylatami kawaykaqta tsarirkur Josuéman apapäkurqan.
24 Qatipaq runakunata wanutsir usharkurnami Israel runakuna Hai markaman kutiykur lapan tsaycho kaqkunata wanutsipäkurqan.
25 Tsay junaqmi Hai runakunata warmitapis olqutapis wanutsipäkurqan chunka ishkay waranqata (12,000).
26 Josuéqa lanzanta Hai markamanpa toqrirarqan tsaycho lapan runakunata ushakätsishqanyaqmi.
27 Itsanqa uywakunata y markacho tarishqan kuyaylapaq kaqkunataqa manami ushakätsirqantsu. Tsaypa trukanqa Josuéta TAYTA DIOS nishqannöla kikinkunapaq apakärirqan.
28 Hai markata Josué rupatsishqanpita patsami kananyaqpis raqäkunala kaykan.
29 Hai markapa mandaqnin reyta Josué wanurkatsirmi ayanta tardiyaq qeruman warkutsirqan. Inti jeqaykaptinnami jorqurkatsir marka yaykunaman apatsirqan. Nirkurmi ayan jananman rumikunata qotunanpaq nirqan. Tsay rumikunaqa kananyaqmi qoturaykan.
Ebal jirkacho leykunata Josué liyishqan
30 Tsaypitanami Ebal jirkacho Israel runakuna yärakushqan TAYTA DIOSPAQ *altarta Josué perqarqan.
31 Tsay altartaqa TAYTA DIOSPA sirviqnin Moisés Israel runakunata nishqannömi laqläni rumikunawan perqarqan. *Moisés qelqashqan leykunachöpis kaynömi qelqaraykan: “Altarta perqarqa ama perqapäkunkitsu laqlashqa rumiwanqa”.*
Tsaychömi Israel runakunaqa uywakunata altarcho rupatsirqan rupatsina sacrificiupaq y jawka kawakuy sacrificiupaq.
32 Tsaynöpis Israel runakuna rikarpaykaptinmi perqashqan altar rumikunaman Josué qelqarqan Moisés yachatsishqan leykunata.*
33 Tsaypitami Israel runakuna, paykunawan kaykaq jäpa runakuna, mayor runakuna y juezkunapis ishkay partiman juntakarqan Tayta Diospa bendicionninta chaskinanpaq. TAYTA DIOSPA sirviqnin Moisés nishqannömi* pulan runakuna juntakarqan Gerizim jirka chakinman y pulannami juntakarqan Ebal jirka chakinman. Tsay jirkakuna chawpincho kaykaq pampaman TAYTA DIOSPA *Pactu Babulninta apaykurmi Leví trïbu cürakuna ichirparqan.
34 Nirkurmi Moisés qelqashqan leykunata Josué fuertipa liyimurqan. Tsaynöpis liyimurqan bendicionkuna y maldicionkuna qelqarashqankunatapis.*
35 Moisés qelqashqan leykunataqa Israel runakuna mayananpaqmi lapanta Josué liyimurqan. Tsay junaqmi tsaycho kaykarqan runakuna, warmikuna, wamrakuna y paykunawan kaykaq jäpa runakunapis.
Ichic wilacuycuna
^ 8.3 Kay textucho waranqa nishqanqa unay hebreo idiömacho capaz tröpa o mandaq ninanmi.
^ 8.10 Wakin runakunaqa warantin nipäkun.
^ Arabá Arabáqa jatun pampami kaykan. Galilea qocha sur kaq kuchunpitami qalaykun. Tsaypita sur kaq lädupami Jordán mayu kuchunkunapa Kachi Lamaryaq pasan. Kachi Lamarpitanami Puka Lamarcho kaq Golfo de Acabayaq chayan. Arabápa anchunmi chunka kilömetruno kaykan. Largunnami kimsa pachak ishkay chunka (320) kilömetruno kaykan. Arabápa ishkan lädupa jirkakuna kaptinmi tsaki kaykan. Norti kaq lädu chakrakunatami Jordán mayu yakuwan parqupäkun. Sur kaq lädu chakrakunatami itsanqa yaku mana kaptin mana parqupäkuntsu (Deut. 1.7; 2.8; 3.17; 4.49).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 8.31 Éxo. 20.25.
^ 8.32 Deut. 27.2-8.
^ 8.33 Deut. 27.11-14.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 8.34 Deut. 11.29; 27—28.
