Josué 9:1-27
9 Heteo runakunapa, amorreo runakunapa, cananeo runakunapa, ferezeo runakunapa, heveo runakunapa y jebuseo runakunapa mandaqnin reykunami mayarqan wakin markakunata Israel runakuna ushakätsishqanta. Tsay reykunaqa tarqan jalqakuna kashqan partipa, *Sefelapa y Mediterráneo Lamar kuchunpa hasta Líbanuyaq. Lapan tsay partikuna karqan Jordán mayu tsimpan inti jeqanan kaq lädupami.
2 Tsay reykunami wilanakurqan Josuéta y Israel runakunata atacananpaq.
3 Gabaóncho taq runakunaqa Jericó markata y Hai markata Josué ushakätsishqanta mayarmi
4 lulapänanpaq yarpachakurqan. Tsaymi Josué kaqman kachakunata kachapäkurqan. Paykunami saqpi costalninkunata y qarapita rurashqa awkis y shilpashqa vïnu winakunankunata bürrunkunaman cargakurkur aywapäkurqan.
5 Tsaynölami shilpashqa awkis lanqinkunata y saqpi röpakunatapis jatikärirqan. Nirkurnami nänipa aywar mikunanpaqpis mupalishqa chukru tantata apapäkurqan.
6 Gilgal campamentuman chayaykushpanmi Josuéta y Israel runakunata kayno nipäkurqan: “Qamkunawan ali kawanantsipaqmi tsayjina karupita *pactu ruraq shapäkamushqä”.
7 Tsayno niptinmi Israel runakuna heveo runakunata kayno nirqan: “Qamkunaqa capazchari cercalachöpis tanki. Cercacho taptikiqa pactuta ama rurashuntsu”.*
8 Tsayno niptinpis Josuéta kayno nipäkurqan: “Noqakunaqa munashqaykitachari rurapäkushaq”.
Tsawraqa Josué kayno tapurqan: “¿Maypitataq karkaykanki? ¿Mayqan aylu runakunataq karkaykanki?”
9 Tsayno tapuptinmi kayno nipäkurqan: “TAYTA DIOSNIKI Egipto runakunata imano castigashqantapis musyaykurmi karupita shapäkamushqä.
10 Tsaynöpis musyapäkushqämi Jordán mayu wak tsimpancho taq amorreo runakunapa ishkay mandaqnin reykunata imano ushakätsishqanta.* (Paykunaqa karqan Hesbón markapa mandaqnin rey Sehón y Basán partipa mandaqnin rey Og. Astarotchömi rey Ogqa tarqan.)
11 Tsaynöpami autoridänïkunawan marka mayïkuna kachamashqa kayno nir: ‘Mirkapaykikunata rurakurkur Israel runakunaman aywaykur kayno nipäkunki: “Noqakuna ashmaynikikunami karkaykä. Tsaymi pactuta rurashun ali kawapäkunantsipaq” ’.
12 Nipäkamashqannölami shapäkamushqä. Markäpita yarqamur mirkapäkunapaq kay tantakunata akaykaqlatami qepikamurqä. Kananqa mupalishqa y chukrushqanami kaykan.
13 Kay qarakunamanpis mushuqmanmi vïnuta winapäkamurqä. Kananqa rachir ushashqanami kaykan. Tsayjina karuta shapäkamushqa kaptïmi röpäkunapis latsapayashqa kaykan y lanqïkunapis pasaypa makwayashqana kaykan”.
14 Tsayno niptinmi apashqankunata rikaykur Israel runakuna criyishpan mikupäkurqan. Itsanqa rasunpa karupita kashqanta musyapäkunanpaq TAYTA DIOSTA manami tapukurqantsu.
15 Tsaynöpami Josué paykunata promitirqan mana wanutsinanpaq. Nirkurmi Israel mayor runakuna TAYTA DIOSPA jutincho promitirqan tsay pactuta cumplipäkunanpaq.
16 Tsaypita kimsa junaqtanami Israel runakuna musyarqan Gabaón runakuna cercalacho tashqanta.
17 Tsayta musyaykur ashiq aywashpan kimsa junaq aywaycho taripäkurqan Gabaón runakunapa markankunata. Paykunapa markankunami karqan Gabaón, Cafira, Beerot y Quiriat-jearim.
18 Tsaycho tarirpis yärakushqan TAYTA DIOSPA jutincho autoridäkuna promitishqa kaptinmi mana wanutsipäkurqantsu.
Gabaón runakunawan pactuta rurashqanpitami Israel runakuna autoridäninkunapa wasanta rimapäkurqan.
19 Tsaymi autoridäkuna kayno nirqan: “Noqakuna TAYTA DIOSPA jutincho jurarmi promitishqä mana wanutsinantsipaq. Tsaymi kananqa ima ruraytapis mana kamäpakuntsitsu.
20 Tsayno kaykaptinqa ama wanutsishuntsu. Jurashqäkunata mana cumpliptïqa TAYTA DIOSPIS fiyupami rabyakunqapaq”.
21 Tsaynömi nipäkurqan mana wanutsinanpaq. Tsawraqa Gabaón runakunata churapäkurqan Israel runakunapaq yantata churapänanpaq y yakuta apapänanpaq. Tsaynöpami Gabaón runakunawan pactu rurashqanta autoridäkuna cumplipäkurqan.
22 Gabaón runakunata shuntaykurnami Josué kayno nirqan: “Kay cercalacho taykarqa ¿imanirtaq ‘karupitami shamushqä’ nir lulapämashqanki?
23 Tsayno lulapämashqaykipitami TAYTA DIOS qamkunata churashunki imaypis ashmay kanaykipaq. Kananpitaqa TAYTA DIOSNÏPA wayinman yantata y yakutami apapäkamunki”.
24 Tsayno niptinmi Josuéta kayno nipäkurqan: “Sirviqnin Moiséstashi TAYTA DIOSNIKI nirqan kay nacioncho taq runakunata wanutsipäkunaykipaq. Tsaymi wanuyta mantsakushpä lulapashqä, tayta.
25 Kananqa makikicho chakikichömi karkaykä, tayta. Nimashqaykitami imatapis rurapäkushaq”.
26 Tsaynöpami Gabaón runakunata Josué salvarqan Israel runakuna mana wanutsinanpaq.
27 Tsay junaqmi Gabaón runakunata churarqan Israel runakunapaq imaypis yantata churapänanpaq y yakuta apapänanpaq. Tsaynölami churarqan TAYTA DIOSPA *altarninpaqpis yantata y yakuta apapänanpaq. Kananyaqpis tsaynölami rurarkaykan.
Ichic wilacuycuna
^ Sefela Sefelaqa Israel nacioncho jirkan jirkan partimi kaykan. Sefelapita inti jeqanan lädupami Mediterraneo lamar kaykan. Sefelapita inti jeqamunan lädupanami jirkakuna kaykan. Norti lädupita sur kaq läduyaqmi Sefela kaykan chusku chunka pitsqa kilömetruno. Inti jeqamunan lädupita inti jeqanan läduyaqmi chunka soqta kilömetruno kaykan. Sefelacho chakrakuna ali kaptinmi mikuykuna ali wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakärirqan (Jos. 10.40; 12.8; 1Rey. 10.27; 2Crón. 28.18).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 9.7 Éxo. 23.32; 34.12; Deut. 7.2; 20.15-16.
^ 9.10 Núm. 21.21-35.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
