Levítico 19:1-37
19 Mastapis Moisésta TAYTA DIOS kayno nirqan:
2 “Israel runakunata kayno ninki: ‘Noqa TAYTA DIOSNIKI *santumi kaykä. Qamkunapis santu kapäkuy.*
3 “ ‘Mamaykita y taytaykita respitapäkunki.*
“ ‘Jamay junaqkunacho respitamar jamapäkunki.* Noqaqa TAYTA DIOSNIKIMI kaykä.
4 “ ‘Ima ïdulukunamanpis ama yärakärinkitsu. Metalpita fundiypa ïdulukunata ama rurapäkunkitsu.* Noqaqa TAYTA DIOSNIKIMI kaykä.
5 “ ‘Jawka kawakuy sacrificiupaq uywakunata pishtarqa noqa munashqäno rurapäkunki.
6 Jawka kawakuy sacrificiupaq pishtashqayki uywapa aytsanta tsay junaqla mikupäkunki. Putsuptin imaptinqa wara junaqpis mikupäkunki. Ishkay junaqchöpis tsay aytsata mana mikurqa kimsa kaq junaqcho rupatsipäkunkina.
7 Kimsa junaqcho tsay aytsa asyarishqanami kanqa. Rupatsinaykipa trukan mikuptikiqa tsay sacrificiu rurashqayki manami välinqanatsu.
8 Tsay aytsaqa NOQAPAQ *sagrädumi kaykan. Tsaymi tsay asyarishqa aytsata pipis mikurqa sagrädu kaqta mana respitaykantsu. Tsay aytsata mikuq kaqtaqa Israel runakunapita qarqupäkunki.
9 “ ‘Cosëchata shuntarqa chakra kuchunyaq ama shuntapäkunkitsu. Shikwashqantapis ama palapankitsu.
10 Üvatapis ashi ashirkurqa ama palapäkunkitsu. Shikwaqkunatapis ama shuntapäkunkitsu. Tsaykunataqa kachaykunki waktsakuna y qamkunacho taq jäpa runakuna shuntakärinanpaq.* Noqaqa TAYTA DIOSNIKIMI kaykä.
11 “ ‘Ama suwakärinkitsu.* Ama lulakärinkitsu. Ama pitapis engañapäkunkitsu.*
12 “ ‘Imatapis noqapa jutïcho promitirqa mana qonqaypa cumplipäkunki.* Mana cumplishpaykiqa manami respitaykämankitsu. Noqaqa TAYTA DIOSMI kaykä.
13 “ ‘Runa mayikita ama engañapäkunkitsu ni imantapis ama apakärinkitsu.* Minkaynikitapis tsay junaqla pägapäkunki.
14 “ ‘Upakunata ama ashlipäkunkitsu ni qapra purikunanman imatapis ama churapankitsu.* Tsayno ruranaykipa trukanqa noqata mantsakamay.* Noqaqa TAYTA DIOSMI kaykä.
15 “ ‘Autoridä karqa lapanta shumaq arreglapäkunki.* Waktsatapis rïcutapis mana jananpaylapa juzgapäkunki.
16 “ ‘Pipa wasantapis rimar ama puripäkunkitsu.
“ ‘Runa mayikita wanutsinanpaq shimita ama jatipankitsu. Noqaqa TAYTA DIOSMI kaykä.
17 “ ‘Pitapis ama chikipäkunkitsu.
“ ‘Runa mayiki jutsata ruraptinqa anyapay.* Mana anyaparqa qamkunapis jutsayuqmi karkaykanki.
18 “ ‘Runa mayiki mana alita rurashuptikipis qamkunaqa mana alita ama rurapäkunkitsu ni nanaparankitsu. Tsaypa trukanqa kikiki kuyakushqaykino runa mayikita kuyapäkunki.* Noqaqa TAYTA DIOSMI kaykä.
19 “ ‘Lapan leynïkunata shumaq cäsukärinki. Uywaykikunata tsay casta uywalawan malwatsipäkunki. Chakraykiman takuy murutaqa ama murupäkunkitsu. Röpata ama jatikärinkitsu ishkay casta hïluwan* awashqataqa.
20 “ ‘Ashmay jipash runawan tänanpaq awnishqa kaykaptin pipis tsay jipashwan punuptinqa ishkantami castigapäkunki. Itsanqa tsay ashmay jipash libri yarqunanpaq pipis manaraq pägaptinqa castigarpis mayqantapis ama wanutsipäkuytsu.
21 Tsaypa trukanqa consagratsina sacrificiupaq jipashwan punuq runa juk carnita apamunqa Tinkuna Toldu patiuman.
22 Tsay carnita pishtarkur *altarcho rupatsirmi TAYTA DIOSTA cüra manakunqa tsay runata perdonananpaq. Tsaynöpami jutsa rurashqanpita perdonashqa kanqa.
23 “ ‘Qoykunäpaq kaq nacionman chayashpayki plantashqayki yörakunapa wayuyninta kimsa wata ama mikupäkunkitsu.
24 Chusku wata kaqchöqa TAYTA DIOSTA agradëcikur lapan wayushqanta paypaq apapäkamunki.
25 Pitsqa wata kaqchönami itsanqa wayuyninta mikupäkunki. Tsayno rurapäkuptikiraqmi plantashqayki frütakuna mas wayunqa. Noqaqa TAYTA DIOSNIKIMI kaykä.
26 “ ‘Ima aytsatapis yawartashqataqa ama mikupäkunkitsu.*
“ ‘Qamkunacho ama pipis kanqatsu rikakuqkuna ni brüjukunapis.*
27 “ ‘Aqtsaykita rutukurqa imaypis rutukushqaykinöla rutukärinki. Uma pukshulaykicho kachaypaqa ama rutukärinkitsu. Shapraykitaqa puntalantapis ama rutukunkitsu.
28 “ ‘Pipis wanuptin lakikushpayki ama cuerpuykita pishtaypa pishtakunkitsu. Qaraykiman tatuäjita ama ruratsinkitsu.* Noqaqa TAYTA DIOSMI kaykä.
29 “ ‘Tsurikita *wayrapakuq warmi kananpaq ama kachapankitsu. Tsayno kachapaptikiqa tashqayki nacioncho runakuna pasaypa jutsa ruraymanmi churakanqa.*
30 “ ‘Jamay junaqkunata respitapäkunki. *Sagrädu Toldutapis respitapäkunki. Noqaqa TAYTA DIOSMI kaykä.
31 “ ‘Brüjukunaman ni rikakuqkunaman ama aywapäkunkitsu.* Paykunaman aywarqa pasaypa jutsayuqmi rikakärinkipaq. Noqaqa TAYTA DIOSNIKIMI kaykä.
32 “ ‘Awkinkunata respitapäkunki. Paykunata respitarqa noqatami mantsakaykämanki. Noqaqa TAYTA DIOSMI kaykä.
33 “ ‘Qamkunacho taq jäpa runakunata ama nakatsipäkunkitsu.
34 Kikikipura kuyanakushqaykino paykunatapis kuyapäkunki. Yarpapäkuy qamkunapis Egiptucho jäpa kashqaykita.* Noqaqa TAYTA DIOSNIKIMI kaykä.
35 “ ‘Metruykiwanpis, pësaykiwanpis ni ima tupuykiwanpis pitapis ama engañapäkunkitsu.
36 Tsawraqa balanzaykipis pësaykipis y metruykipis mana pishiq kanqa.* Egiptupita jorqamushuqniki TAYTA DIOSNIKIMI kaykä.
37 “ ‘Lapan nishqäkunata y lapan leynïkunata cumplipäkuy. Noqaqa TAYTA DIOSMI kaykä’ ”.
Ichic wilacuycuna
^ 19.2 Lev. 11.44-45; Mat. 5.48; 1Ped. 1.16.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 19.3a Éxo. 20.12; Deut. 5.16.
^ 19.3b Éxo. 20.8; Deut. 5.12.
^ 19.4 Éxo. 20.23; 34.17; Deut. 7.25.
^ sagrädu Liyinki santupita tantiyatsikuyta.
^ 19.9-10 Lev. 23.22; Deut. 24.19-22.
^ 19.11a Éxo. 20.15; Deut. 5.19.
^ 19.11b Éxo. 20.16; Deut. 5.20.
^ 19.12 Éxo. 20.7; Deut. 5.11; Mat. 5.33.
^ 19.13 Deut. 24.14-15.
^ 19.14 Deut. 27.18.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 19.15 Éxo. 23.6-8; Deut. 16.19.
^ 19.17 Mat. 18.15.
^ 19.18 Mat. 19.19; 22.39; Mar. 12.31; Luc. 10.27; Rom. 13.9; Gál. 5.14; Stg. 2.8.
^ 19.19 Tayta Dios manami munarqantsu lïnuwan milwa awashqa röpata Israel runakuna lutala jatikunanta. Tsayno awashqa tëlaqa Tinkuna Tolduta qatananpaq y cürakuna jatikunalanpaqmi karqan. Tsaypita masta musyanaykipaq liyinki Éxo. 26.1, 31, 36; 28.5; Deut. 22.11.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 19.26a Gén. 9.4; Lev. 7.26-27; 17.10-14; Deut. 12.16, 23; 15.23.
^ 19.26b Deut. 18.10.
^ 19.27-28 Lev. 21.5; Deut. 14.1.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 19.29 Deut. 23.17.
^ Sagrädu Toldu Liyinki Tinkuna Toldupita tantiyatsikuyta.
^ 19.31 Deut. 18.11; 1Sam. 28.3; 2Rey. 23.4; Isa. 8.19.
^ 19.33-34 Éxo. 22.21; Deut. 24.17-18; 27.19.
