Levítico 22:1-33
22 Mastapis Moisésta TAYTA DIOS kayno nirqan:
2 “Aarónta y tsurinkunata kayno ninki: ‘Israel runakuna noqapaq apamushqan *sagrädu kaptin lutalaqa ama ushatsuntsu. Lutala usharqa manami respitaykämantsu. Noqaqa TAYTA DIOSMI kaykä.
3 “ ‘Israel runakuna noqapaq apamushqanqa sagrädumi kaykan. Tsaymi Aarónpita miraqkuna *impüru kaykar tsaykunata *altarcho rupatsiptinqa nawpäpita qarqushaq.* Noqaqa TAYTA DIOSMI kaykä.
4 “ ‘Aarónpita miraqkuna *lepra qeshyawan karpis o purgación qeshyawan karpis impürumi kaykan. Tsayno kaykarqa Israel runakuna noqapaq apamushqan sagrädu kaqkunata ama mikunqatsu. Purificakurmi itsanqa mikupäkunqa.
“ ‘Aya tsutarashqan kaqta yatarpis o chiwlakunanpa lëchin jutupakurpis impürumi rikakunqa.
5 Tsaynölami pachalanpa y lätaypa puriqkunata yatar y impüru runata yatarpis impüru rikakunqa.
6 Patsa tsakashqanyaqmi impüru kanqa. Purificakur manaraq armakurqa sagrädu mikuykunata y sagrädu aytsata manami mikunmantsu.
7 Inti jeqarpuptinraqmi purificashqa kar cürakuna sagrädu mikuykunata mikupäkunqa.
8 Wanushqa uywakunapa aytsanta y jirka uywakuna katupakushqan aytsata ama mikunqatsu. Tsayta mikurqa impürumi rikakunqa. Noqaqa TAYTA DIOSMI kaykä.
9 “ ‘Cürakunata wilay lapan nishqäkunata cumplipäkunanpaq. Mana cumplirqa jutsayuq rikakur wanupäkunqami. Noqa TAYTA DIOSMI paykunata akrashqä *santu kananpaq.
10 “ ‘Cüra mana karqa sagrädu mikuykunata y aytsakunata ama mikunqatsu. Cürapa qorpan karpis ni minkaynin karpis tsay sagrädu mikuykunataqa ama mikunqatsu.
11 Ashmayninpaq cüra rantishqami itsanqa sagrädu mikuykunata mikunqa. Tsaynölami cürapa makincho yuriqkunapis mikupäkunqa.
12 “ ‘Cürapa warmi tsurin cürapa wayincho mana tarqa cürapaq apamushqan sagrädu mikuykunata y aytsakunata ama mikunqatsu.
13 Cürapa warmi tsurin viüdayashpan o runanpita rakikashpan wawaynaqlaraq taytanpa wayinman kutirqa taytan chaskishqan mikuykunata mikunqa. Jäpa runakunami itsanqa tsay mikuykunata ama mikunqatsu.
14 “ ‘Pipis mana musyayninpa cürapaq kaq sagrädu mikuyta mikurqa trukanta kutitsinqa. Tsay jananman quinta parti masta yapanqa.
15 TAYTA DIOSPAQ apamushqan sagrädu sacrificiukunata y ofrendakunata Israel runakuna lutala ushapäkunanta cürakuna ama kachapanqatsu.
16 Lutala mikunanpaq pitapis kachaparqa cürapis jutsayuqmi kanqa. Noqa TAYTA DIOSMI cürakunata akrashqä santu kananpaq’ ”.
Sänu uywata Tayta Diospaq apapäkunanpaq tantiyatsishqan
17 Mastapis Moisésta TAYTA DIOS kayno nirqan:
18 “Aarónta, tsurinkunata y Israel runakunata kayno niy: ‘Israel runa karpis o qamkunacho taq jäpa runa karpis rupatsina sacrificiupaq uywata apamurqa turituta karpis, carnita karpis, chïvuta karpis sänuta apamunqa. Tsayno apamunqa promitishqanta cumplishpan sacrificiupaq apamurpis o kikinpa voluntäninpita sacrificiupaq apamurpis.
19 -
20 Sänu mana kaptinqa Tayta Dios manami chaskinqatsu.*
21 “ ‘Jawka kawakuy sacrificiupaq uywata apamurqa turituta karpis uyshata karpis cabrata karpis sänuta apamunqa. Promitishqanta cumplishqanpita sacrificiupaq apamurpis o kikinpa voluntäninpita sacrificiupaq apamurpis sänu uywata apamunqa.
22 TAYTA DIOSPAQ uywata apamurqa ama apamunqatsu qaprata, chakin pakishqata, weqruta, verrugayuqta, qarachuta ni qeri ushashta. Tsayno kaqkunataqa ama apamunqatsu TAYTA DIOSPA *altarnincho rupatsinanpaq.
23 “ ‘Kikinpa voluntäninpita apamuptinqa makllu töru o makllu carni kaptinpis Tayta Dios chaskinqami. Promitishqanta cumplishpan tsaytano apamuptinmi itsanqa Tayta Dios mana chaskinqatsu.
24 “ ‘Tsaynöpis TAYTA DIOSPAQ ama apamunqatsu runtuncho qeriyuqta, runtun däñashqata, runtun pashtashqata o capashqata. Entreganäpaq kaq nacionchöpis tsayno uywakunata ama apapäkamunkitsu.
25 Jäpa runa kaptinpis Tayta Diospaq tsayno däñashqa uywata apamuptinqa ama chaskinkitsu. Däñashqa uywataqa Tayta Dios manami chaskinqatsu’ ”.
26 Mastapis Moisésta TAYTA DIOS kayno nirqan:
27 “Becërru orqu yurirqa, uysha malwa orqu yurirqa y cabra malwa orqu yurirqa qanchis junaqyaqlami mamanwan kanqa. Pusaq junaqpitaqa TAYTA DIOSPAQ rupatsinanpaq apapäkamunki.
28 Wäkata karpis ni uyshata karpis tsay junaqlaqa wawantinta ama pishtapäkunkitsu.
29 TAYTA DIOSTA agradëcikushpayki uywata apamurqa pay munashqantano apapäkamunki.
30 Tsaynöpis sacrificiuta rupatsir tsay junaqla mikupäkunki. Waraynin* junaqpaqqa imatapis ama putsütsinkitsu. Noqaqa TAYTA DIOSMI kaykä.
31 “Mandamientükunata lapanta cumplipäkunki. Noqaqa TAYTA DIOSMI kaykä.
32 *Santu kashqäta musyaykar manakaqkunata rurar penqayman ama churamankitsu. Tsaynöpami qamkunacho pïmaypis tantiyanqa santu kashqäta. Noqa TAYTA DIOSMI qamkunata akrashqä santu kapäkunaykipaq.
33 Tayta Diosniki kanäpaqmi Egiptupita qamkunata jorqamushqä. Noqaqa TAYTA DIOSMI kaykä”.
Ichic wilacuycuna
^ Sagrädu Toldu Liyinki Tinkuna Toldupita tantiyatsikuyta.
^ sagrädu Liyinki santupita tantiyatsikuyta.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 22.3 Nawpäpita qarqushaq ninanqa altarcho sirvimashqanpita qarqushaq ninanmi.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 22.18-20 Lev. 1.3; Deut. 17.1.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 22.30 Wakin runakunaqa warantin nipäkun.
