Levítico 23:1-44
23 Mastapis Moisésta TAYTA DIOS kayno nirqan:
2 “Israel runakunata kayno niy: ‘Kanan tantiyatsishayki TAYTA DIOSTA adorar imay juntakänaykipaq kashqantapis. Tsay juntakashqayki junaqkunaqa *sagrädumi kanqa.
3 “ ‘Soqta junaqla arupäkunki. Qanchis kaq junaqchöqa TAYTA DIOSTA adorapäkunaykipaq juntakanki. Tsay junaq ama arupäkunkitsu, sinöqa maycho tarpis TAYTA DIOSTA adorar jamapäkunki.*
Pascua fiestata y Levadüraynaq Tantata Mikupäkunan fiestata rurapäkunanpaq nishqan
Éxodo 12.14-20; Números 28.16-25; Deuteronomio 16.1-8
4 “ ‘Wakin diyawardakunapis kaykanmi TAYTA DIOSTA adorar juntakänaykipaq.
5 Cada wata punta kaq killacho chunka chusku kaq junaq tardi TAYTA DIOSTA adorar *Pascua fiestata rurapäkunki.*
6 “ ‘Tsaypita jukaqnin junaq qalaykunqa Levadüraynaq Tantata Mikupäkunan fiesta.* Tsay fiestachöqa TAYTA DIOSTA adorashpayki levadüraynaq tantata qanchis junaq mikupäkunki.
7 Fiesta qalaykunan junaq ima aruytapis ama arupäkunkitsu, sinöqa TAYTA DIOSTA adorapäkunaykipaq juntakanki.
8 Tsaypita waran waran fiesta ushananyaq sacrificiukunata *altarcho TAYTA DIOSPAQ rupatsipäkunki. Qanchis kaq junaqchöqa ima aruytapis ama arupäkunkitsu, sinöqa tsay junaq yapay juntakanki’ ”.
Cosëcha Qalaykunan fiestata rurapäkunanpaq nishqan
9 Mastapis Moisésta TAYTA DIOS kayno nirqan:
10 “Israel runakunata kayno niy: ‘Qoykunäpaq kaykaq nacionman chayaykur murushqaykita cosechar punta poquqpita juk inuyta* cüraman apapäkamunki. Tsay apapäkamushqaykiqa *primiciami kanqa.
11 TAYTA DIOS chaskinanpaqmi jamay junaqpita jukaqnin junaq cüraqa TAYTA DIOSPA nawpancho joqarkur wakman kayman kuyutsinqa.
12 “ ‘Tsay junaqmi juk watayuq sänu carnishtapis apapäkamunki sacrificiuta rupatsir TAYTA DIOSTA adorapäkunaykipaq.
13 Tsaynöpis chusku kïlu pulan harinatapis aceitiwan tsapurkur apapäkamunki. Tsayqa tsaki mikuy ofrendami kanqa *altarcho rupatsinanpaq. Tsay rupatsishqanpa ali asyayninta* mayarmi TAYTA DIOS kushikunqa. Juk litru vïnutapis apapäkamunki altarman winapänanpaq.
14 TAYTA DIOSNINTSIPAQ tsaykunata manaraq apamurqa ankaypapis ni chawalanpapis ni masararkurpis trïguta amaraq mikupäkunkitsu. Maycho taptikipis tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
Semäna fiestata rurapäkunanpaq nishqan
Números 28.26-31; Deuteronomio 16.9-12
15 “ ‘Punta poquqta apamur jamay junaq warayninpita* yupanki qanchis semänata.
16 Qanchis semäna cumplirkuptin juk junaq masta yupaptikimi pitsqa chunka (50) junaqna kanqa. Tsay junaqmi cosechashqayki trïgupita TAYTA DIOSPAQ ofrendata apapäkamunki.
17 Tsaynöpis wayikipita apapäkamunki ishkay tantata. Tsay tantakunaqa kanqa cada ünun chusku kïlu alinnin harinapita levadürawan masarashqami. Cada watacho puntata cosechashqaykipita wakman kayman kuyutsishqan ofrenda karmi tsay tantakuna TAYTA DIOSPAQ *primicia kanqa.
18 Tantata apamurmi rupatsina sacrificiupaq apapäkamunki juk watayuq qanchis sänu carnishkunata, juk turituta y ishkay carnikunata. Tsay apamushqayki uywakunata, tsaki mikuy ofrendata y vïnuta *altarcho cüra rupatsiptinmi ali asyayninta mayar TAYTA DIOS kushikunqapaq.
19 “ ‘Tsaynöpis juk chïvuta apapäkamunki purificatsina sacrificiupaq y juk watayuq ishkay carnishkunata apapäkamunki jawka kawakuy sacrificiupaq.
20 Tsay uywakunata y punta poquq trïgupita rurashqayki tantakunatami cüraqa TAYTA DIOSPA nawpancho wakman kayman kuyutsinqa. Tsaykuna TAYTA DIOSPAQ *sagrädu kaptinmi cüra mikunanpaq kanqa.
21 “ ‘Tsay junaqqa ima aruytapis kachaykur TAYTA DIOSTA adorapäkunaykipaq lapayki juntakanki. Maycho taptikipis tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.*
22 “ ‘Chakraykipita mikuyta shuntarqa ama shuntankitsu kuchu kuchuyaqqa ni palapatapis ama palapankitsu. Tsaykunata kachaykunki waktsakuna y jäpa runakuna shuntakunanpaq’. Noqaqa TAYTA DIOSNIKIMI kaykä”.*
Cornëtakunata Tukanan fiestata rurapäkunanpaq nishqan
Números 29.1-6
23 Mastapis Moisésta TAYTA DIOS kayno nirqan:
24 “Israel runakunata kayno niy: ‘Qanchis kaq killa qalaykunan junaqcho lapayki jamar TAYTA DIOSTA adorapäkunaykipaq juntakanki. *Cornëtata tukashpayki fiestata rurapäkunki.
25 Tsay junaqqa ima aruytapis kachaykur TAYTA DIOSTA adorar sacrificiukunata rupatsipäkunki’ ”.
Israel runakuna purificashqa kananpaq kaq junaq
Levítico 16; Números 29.7-11
26 Mastapis Moisésta TAYTA DIOS kayno nirqan:
27 “Qanchis killa chunka kaq junaqchömi jutsa rurashqaykipita purificashqa kanaykipaq kaykan. Tsay junaq ayunar TAYTA DIOSTA adorapäkunaykipaq lapayki juntakanki. Tsaynöpis TAYTA DIOSTA adorar sacrificiuta rupatsinki.
28 Tsay junaqqa ama ima aruytapis arupäkunkitsu. Purificashqa kanaykipaq kaq junaq kaptinmi lapan jutsa rurashqaykipita TAYTA DIOSNINTSI perdonashunki.
29 Tsay junaq mana ayunaq kaqtaqa pï kaptinpis Israel runakunapita qarqapäkunki.
30 Ayunananpa trukan tsay junaq pipis aruptinqa kikïmi ushakätsishaq.
31 Tsayno kaykaptinqa tsay junaq ama arupäkunkitsu. Maycho taptikipis tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
32 Tsay junaqqa ayunashpayki jamapäkunki. Tsayno ayunapäkunki isqun junaq tardipita jukaqnin tardiyaq”.
Ramäda fiestata rurapäkunanpaq nishqan
Números 29.12-40; Deuteronomio 16.13-17
33 Mastapis Moisésta TAYTA DIOS kayno nirqan:
34 “Israel runakunata kayno niy: ‘Qanchis killacho chunka pitsqa kaq junaq *Ramäda fiesta rurayta qalaykunki. TAYTA DIOSTA adorarmi tsay fiestata qanchis junaq rurapäkunki.
35 Qalaykunan junaq ima aruytapis kachaykur TAYTA DIOSTA adorapäkunaykipaq lapayki juntakanki.
36 TAYTA DIOSTA adorar qanchis junaqyaqmi sacrificiukunata rupatsipäkunki. Tsaynöla pusaq kaq junaqchöpis lapayki juntakaykur TAYTA DIOSTA adorar sacrificiuta rupatsipäkunki. Tsay junaqqa ama ima aruytapis arupäkunkitsu.*
37 “ ‘Tsay fiestakunata rurar juntakärinaykipaqmi TAYTA DIOS nishqa. Pay nishqanno *altarcho rupatsipäkunaykipaq apapäkamunki uywakunata y tsaki mikuy ofrendakunata. Tsaynöla vïnutapis apapäkamunki altarman winapänanpaq. Lapantapis diya junaq rurapäkunki.
38 Jamay junaqkunacho TAYTA DIOSTA adorashqaykinöla tsay fiestakunachöpis adorapäkunki. Tsaynöpis fiestakunapaq apamushqayki sacrificiukuna y ofrendakuna shuynimi* kanqa jamay junaqpaq apapäkamushqayki sacrificiukunapita y ofrendakunapita. Tsayno shuyni kanqa promitishqaykita cumplir apamushqaykipitapis y kikikipa voluntänikipita apamushqaykipitapis.
39 “ ‘Cosëcha shuntayta usharkur qanchis junaqyaq TAYTA DIOSTA adorar fiestata rurapäkunki.* Tsay fiestata rurayta qalaykärinki qanchis kaq killa chunka pitsqa junaqcho. Fiesta qalaykunan junaq y fiesta ushanan junaqpis jamapäkunki.
40 Fiesta qalaykunan junaq palmakunapa rämankunata, copösu yörakunapa rämankunata y mayu kuchuncho saucikunapa rämankunatapis pakirir qanchis junaq kushikushpayki TAYTA DIOSNINTSIPA nawpancho fiestata rurapäkunki.*
41 Cada wata qanchis kaq killacho TAYTA DIOSTA adorar tsay fiestata qanchis junaq rurapäkunki. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
42 Tsay fiestata rurarqa ramädakunalacho qanchis junaq lapayki punupäkunki.
43 Fiestata mana qonqaypa tsayno ruraptikimi qamkunapita miraqkuna musyapäkunqa Egiptupita jorqamuptï Israel runakuna ramädalacho tashqanta. Noqaqa TAYTA DIOSNIKIMI kaykä’ ”.
44 Tsaynömi Moisésqa Israel runakunata tantiyatsirqan TAYTA DIOSTA adorar fiestakunata imay rurapäkunanpaq kashqantapis.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ sagrädu Liyinki santupita tantiyatsikuyta.
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 23.5 Éxo. 12.1-13; Deut. 16.1-2.
^ 23.6 Éxo. 12.14-20; 23.15; 34.18; Deut. 16.3-8.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 23.10 Wakin runakunaqa kinuyta nipäkun.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 23.13 Wakin runakunaqa mushkuyninta nipäkun.
^ 23.15 Wakin runakunaqa warantinpita nipäkun.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ 23.15-21 Éxo. 23.16; 34.22; Deut. 16.9-12.
^ 23.22 Lev. 19.9-10; Deut. 24.19-22.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Ramäda fiesta Trïgu cosëchata y üva cosëchata usharkurmi Ramäda fiestata qanchis junaq rurapäkurqan (Lev. 23.34-36; Deut. 16.13). Tsay karqan octubri killa qalaykunanchömi. Tsay fiestata rurananpaqmi lapan olqu kaqkuna Jerusalénman aywapäkurqan (Deut. 16.16). Tsay fiestachömi ramädakunalacho punupäkurqan (Lev. 23.42). Tsaycho punupäkurqan Egiptupita Israel runakunata Tayta Dios jorqamuptin ramädalacho tashqanta yarpänanpaqmi (Lev. 23.43). Jesucristupis Ramäda fiestaman aywarmi runakunata yachatsirqan (Juan 7.37-39).
^ 23.33-36 Deut. 16.13-15.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 23.38 Wakin runakunaqa rawwami nipäkun.
^ 23.39 Éxo. 23.16; 34.22.
