Levítico 24:1-23
24 Mastapis Moisésta TAYTA DIOS kayno nirqan:
2 “Israel runakunata kayno niy: ‘Tinkuna Tolducho kaykaq candelabru imaypis ratananpaq olïvupita rurashqa aceitita apapäkamunki.
3 *Pactu Babulpita rakiraq cortïnapa nawpanman aywar tsay apapäkamushqayki aceitita candelabruman Aarón winanqa TAYTA DIOSPA nawpancho warayta rataränanpaq. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
4 Qori candelabrucho kaykaq mechërukunata tsayno kamarinqa TAYTA DIOSPA nawpancho warayta rataränanpaq.
Qori mësaman tantakunata churananpaq nishqan
5 “ ‘Alinnin harinapita chunka ishkay tantata rurapäkunki. Cada tantata ruranki chusku kïlu pulan harinapita.
6 Nirkur TAYTA DIOSPA nawpancho kaykaq qori mësaman tsay chunka ishkay tantakunata soqta soqta churapäkunki.*
7 Cada soqta tantakunapa nawpanman inciensuta churapäkunki. TAYTA DIOS imaypis yarparänanpaqmi tsay inciensuta payta adorar qoshtatsinki.
8 Cada jamay junaqmi TAYTA DIOSPA nawpanman mana qonqaypa tsay tantakunata churapäkunki. Tsaykunata imaypis rurapäkunki Israel runakunawan TAYTA DIOS *pactu rurashqanta cumplir.
9 Tsay tantakunataqa Aarón y paypita miraq cürakunalami mikupäkunqa. Wakin ofrendakunapita y sacrificiukunapitapis mas *sagrädu kaptinmi sagrädu lugarlacho* tsay tantakunata mikupäkunqa’ ”.*
Tayta Diospa contran rimaq runata wanutsipäkushqan
10 Juk runapa maman karqan Israel warmi y taytannami karqan Egipto runa. Tsay Egipto runapa tsurinmi juk junaq Israel mayinwan campamentucho rimanakuykashqancho
11 TAYTA DIOSTA manakaqman churarqan. Tsayno rimashqanta mayaqkunami prësu tsarirkur Moisésman apapäkurqan. Tsay runapa mamanpa jutinmi karqan Selomit. Selomitpa taytanmi karqan Dibri. Dibriqa karqan Dan trïbupitami.
12 Tsaychömi prësu tsararparqan imata rurananpaq TAYTA DIOS nishqanyaq.
13 Tsaymi Moisésta TAYTA DIOS kayno nirqan:
14 “Conträ rimaq runata campamentupita juk läduman jorquy. Tsaycho conträ rimashqanta mayaqkuna paypa umanman makinta churapäkutsun. Nirkurna lapan runakuna saqmaypa wanutsipäkutsun.
15 Israel runakunata kayno niy: ‘Pipis TAYTA DIOSPA contran rimaq kaqqa jutsayuqmi kanqa.
16 Tsay runataqa saqmaykälar lapan wanutsipäkutsun. Jäpa runa kaptinpis o Israel mayiki kaptinpis TAYTA DIOSPA contran rimaq kaqtaqa wanutsipäkutsun.
17 “ ‘Pipis runa mayinta wanutsiq kaqtaqa wanutsipäkunqa.*
18 “ ‘Jukpa uywanta wanutsirqa trukanta kutitsinqa.
19 “ ‘Pipis runa mayinta maqar däñashqannöla kikintapis maqapäkunqa.
20 Maqaykashqancho tulunta pakiptinqa kikinpa tuluntapis pakipäkunqa. Nawinta pashtapaptinqa kikinpa nawintapis pashtapäkunqa. Kirunta jorquptinqa kikinpa kiruntapis jorqunqa. Runa mayinta maqar däñashqannöla kikintapis maqapäkunqa.*
21 “ ‘Pipa uywantapis wanutsirqa trukanta kutitsinqa. Runa mayinta wanutsiptinqa kikintapis wanutsipäkunqa.
22 “ ‘Kay nishqä leykunaqa jäpa runakunapaq y Israel runakunapaqpis iwalmi kanqa. Noqaqa TAYTA DIOSNIKIMI kaykä’ ”.*
23 Moisés tsayno niykaptinmi TAYTA DIOSPA contran rimaq runata Israel runakuna campamentupita juk läduman jorquykur saqmaypa wanutsipäkurqan. Moisésta TAYTA DIOS nishqannölami Israel runakuna rurapäkurqan.
Ichic wilacuycuna
^ 23.40 Tayta Diospa nawpancho nirqa Tinkuna Tolducho kaykaq altarpa nawpanchömi niykan.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 24.5-6 Éxo. 25.30.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ sagrädu Liyinki santupita tantiyatsikuyta.
^ 24.9 Tsay sagrädu lugarqa altar nawpankunami karqan. Tsaypita masta musyanaykipaq liyinki Lev. 10.13-14.
^ 24.9 Mat. 12.4; Mar. 2.26; Luc. 6.4.
^ 24.17 Éxo. 21.12.
^ 24.20 Éxo. 21.23-25; Deut. 19.21; Mat. 5.38.
