Levítico 3:1-17
3 “ ‘TAYTA DIOSPA nawpanman* jawka kawakuy sacrificiuta apamurqa turituta karpis o ternërata karpis sänuta apamunqa.
2 Sacrificiupaq apamuq runami uywapa umanman makinta churaykur Tinkuna Toldu patiucho pishtanqa. Aarónpita miraq cürakunami uywapa yawarninwan *altarpa lädunkunata tsaqtsupanqa.
3 “ ‘Nirkurnami TAYTA DIOSPAQ rupatsipäkunanpaq uywapa pacha wirankunata cürakunata entreganqa.
4 Tsaynöla entreganqa wirantinta ishkan rurunkunata, washancho kaykaq wirankunata y natincho kaykaq wirankunata. Natincho kaykaq wirankunata y rurunta jorqurkurmi
5 rupatsina sacrificiu jananman cürakuna churanqa rupananpaq. Tsay rupatsishqanpa ali asyayninta* mayarmi TAYTA DIOS kushikunqa.
6 “ ‘Jawka kawakuy sacrificiupaq uyshata o cabrata apamurqa chinata karpis orquta karpis sänuta apamunqa.
7 Uyshata TAYTA DIOSPA nawpanman apamurqa
8 uyshapa umanman makinta churaykur Tinkuna Toldu patiucho pishtanqa. Tsay uyshapa yawarninwanmi cürakuna altarpa lädunkunata tsaqtsupanqa.
9 “ ‘Jawka kawakuy sacrificiupaq apamurqa uyshapa chupanta* sapipita kutsurir y pacha wirankunata jorqurir cürakunata entreganqa.
10 Tsaynöla entreganqa rurunninkunata wirantinta, washancho kaykaq wirankunata y natinnincho kaykaq wirankunata. Natincho kaykaq wirankunataqa rurunnintawan jorquykur
11 altarcho cüra rupatsinqa. Tsay rupatsishqanqa TAYTA DIOSPAQ mikuymi kanqa.
12 “ ‘Cabra kaptinqa TAYTA DIOSPAQ pishtashqan höra
13 uywapa umanman makinta churaykur Tinkuna Toldu patiucho pishtanqa. Tsay uywapa yawarninwanmi Aarónpita miraq cürakuna altarpa lädunkunata tsaqtsupanqa.
14 “ ‘Tsay apamuq runami cabrapa pacha wirankunata cürakunata entreganqa TAYTA DIOSTA adorar altarcho rupatsinanpaq.
15 Tsaynöla entreganqa ishkan rurunninkunata wirantinta y washancho kaykaq wirankunatapis. Natincho kaykaq wirankunataqa rurunnintawan jorqurir
16 altarcho cüra rupatsinqa. Tsay rupatsishqanpa ali asyayninta mayarmi TAYTA DIOS kushikunqa. Wirankunaqa TAYTA DIOSLAPAQMI kanqa.
17 “ ‘Maycho tarpis wirata ni yawarta ama mikupäkunkitsu. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis’ ”.
Ichic wilacuycuna
^ 3.1 Tayta Diospa nawpanman sacrificiuta apananpaq nirqa Tinkuna Tolducho kaykaq altarman apananpaqmi niykan.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 3.5 Wakin runakunaqa mushkuyninta nipäkun.
^ 3.9 Tsaycho kaq uyshakunapa chupanqa pasaypa wirasapami kaykan.
