Levítico 7:1-38
7 “ ‘Consagratsina sacrificiuqa *sagrädumi kaykan. Tsay sacrificiuta apamurqa kaynömi ruranqa:
2 Consagratsina sacrificiupaq apamushqan uywata pishtarqa rupatsina sacrificiupaq pishtashqalancho pishtanqa. Yawarninwanna *altarpa kuchunkunata tsaqtsupanqa.
3 Chupancho kaq wiranta y pacha wirantaqa lapanta altarcho rupatsinqa.
4 Tsaynöpis rupatsinqa ishkan rurunkunata wirantinta, washancho kaykaq wirankunata y natincho kaykaq wirankunata. Natincho kaykaq wirankunataqa rurunninkunatawan jorqunqa.
5 Lapan tsaykunataqa TAYTA DIOSTA adorarmi altarcho cüra rupatsinqa. Tsayqa consagratsina sacrificiumi kanqa.
6 Tsay uywapa aytsan sagrädu kaptinmi Tinkuna Toldupa patiuncho cürakuna mikunqa.
7 “ ‘Purificatsina sacrificiupaq y consagratsina sacrificiupaq apamushqanpis tsay uywakunapa aytsan sacrificiuta rupatsiq cürapaqmi kanqa.
8 Rupatsina sacrificiupaq apamushqa kaptinqa uywapa qaralanmi rupatsiq cürapaq kanqa.
9 Tsaynölami hornucho masarashqa karpis o sartincho ankashqa karpis o mankacho yanushqa karpis ofrendapaq lapan apamushqan tsaki mikuykuna altarcho rupatsiq cürapaq kanqa.
10 Tsaynölami ofrendapaq apamushqan aceitiwan tsapushqa harina y aceitiynaq harinapis Aarónpita miraq cürakunapaq iwal iwal rakipänakunqa.
Cürakunapa derëchun kashqan
11 “ ‘Pipis jawka kawakuy sacrificiuta TAYTA DIOSPAQ apamurqa kayno ruranqa:
12 Ali kawashqanpita agradëcikushpan apamurqa sacrificiupaq apamushqan uywa jananman apamunqa aceitiwan masarashqa levadüraynaq tantata, aceitiwan lushipashqa levadüraynaq lapsha tantata y alinnin kaq harinapita aceitiwan masarashqa levadüraynaq tantatapis.
13 Tsay ofrendakunatawan levadürayuq tantatapis apamunqa.
14 Lapan apamushqan tantapitami TAYTA DIOSPAQ chusku tantata rakinqa. Tsay rakishqan tantakunaqa uywapa yawarninta tsaqtsuq cürapaqmi kanqa.
15 “ ‘TAYTA DIOSTA agradëcikur jawka kawakuy sacrificiupaq pishtashqan uywapa aytsantaqa tsay junaqla ushaypa mikupäkunqa. Waraynin* junaqpaqqa ni juk pedäzulatapis ama putsütsinqatsu.
16 TAYTA DIOSTA promitishqanta cumplir jawka kawakuy sacrificiupaq pishtashqan uywapa aytsantami itsanqa waraynin junaqpis mikunqa. Tsaynölami kikinpa voluntäninpita jawka kawakuy sacrificiupaq pishtashqan uywapa aytsantapis waraynin junaq mikunqa.
17 Ishkay junaqchöpis mana usharqa kimsa kaq junaqchöqa tsay aytsata rupatsinqana.
18 Kimsa junaqcho jawka kawakuy sacrificiupaq pishtashqan aytsata mikuptinqa tsay sacrificiuta TAYTA DIOS manami chaskinqanatsu. Tsaynölami aytsapis melanaypaq kanqa. Tsay aytsata mikuq kaqpis jutsayuqmi kanqa.
19 “ ‘Püru kaq runakunalami jawka kawakuy sacrificiupaq pishtashqan uywapa aytsanta mikunqa. Imamanpis *impüru kaqman töpashqan aytsataqa mikunanpa trukan rupatsinqa.
20 Impüru kaq runakunaqa jawka kawakuy sacrificiupaq pishtashqan uywapa aytsanta ama mikunqatsu. Tsay aytsaqa TAYTA DIOSPAQ kaptin impüru kaq runakuna ama mikunqatsu. Mikuq kaqtaqa Israel runakunapita qarqupäkunki.
21 Pï runapis impüru kaqkunata töpashqa kaykar TAYTA DIOSPAQ apamushqan jawka kawakuy sacrificiuta mikuptinqa Israel runakunapita qarqupäkunki. Tsayno qarqupäkunki impüru kaq runata o impüru kaq warmita töpaptinpis, impüru kaq uywata töpaptinpis o imatapis impüru kaqta töpaptinpis’ ”.
22 Mastapis Moisésta TAYTA DIOS kayno nirqan:
23 “Israel runakunata tantiyatsinki wäkapa, uyshapa o cabrapa wiranta mana mikupäkunanpaq.
24 Wanushqa uywakunapa wiranta o jirka uywakuna katupakushqan uywapa wirantaqa ama mikupäkunqatsu. Mikunanpa trukanqa imalachöpis utilizanqa.
25 TAYTA DIOSPAQ ofrenda apamushqan uywapa wiranta mikuq kaqtaqa Israel runakunapita qarqupäkunki.
26 “Maycho tarpis qamkunaqa ama mikunkitsu päriqkunapa yawarninta ni uywakunapa yawarninta.
27 Yawarta mikuq kaqtaqa Israel runakunapita qarqupäkunki”.*
28 Mastapis Moisésta TAYTA DIOS kayno nirqan:
29 “Israel runakunata kayno niy: ‘Jawka kawakuy sacrificiupaq apamurqa rupatsinanpaq kaqkunata TAYTA DIOSPA nawpanman apamunqa.
30 Uywata apamuq runami TAYTA DIOSPA nawpancho uywapa pëchunta y pëchuncho kaykaq wiranta joqarkur wakman kayman kuyutsinqa.
31 Kuyurkatsir makyaptinmi cürana wiran kaqta *altarcho rupatsinqa. Uywapa pëchunmi itsanqa kanqa Aarón y paypita miraq cürakuna mikupäkunanpaq.
32 Tsaynölami jawka kawakuy sacrificiupaq apamushqan uywapa alawqa kaq chankanqa cürapaq kanqa.
33 Alawqa kaq chankanqa yawarta tsaqtsupaq y wirata rupatsiq cürapa derëchunmi kanqa.
34 Israel runakuna uywakunata jawka kawakuy sacrificiupaq apamushqanpita kuyutsishqan pëchunta y alawqa kaq chankanta Aarónpaq y paypita miraq cürakunapaqmi rakishqä. Tsay nishqäkunaqa qamkunapaq imayyaqpis leymi kanqa.
35 “ ‘Tsaymi TAYTA DIOSTA adorar sacrificiuta rupatsinanpaq apamushqanpita Aarónpaq y paypita miraqkunapaq kanqa. Cüra kananpaq TAYTA DIOS churashqanpita patsami paykuna tsayno chaskipäkunqa.
36 Israel runakuna imaypis tsayno qoykunanpaqmi Aarónta y tsurinkunata cüra kananpaq churashqan junaq TAYTA DIOS nirqan. Tsay nishqankunaqa imayyaqpis leymi qamkunapaq kanqa’ ”.
37 Tsaynömi TAYTA DIOS tantiyatsirqan rupatsina sacrificiuta rupatsipäkunanpaq, tsaki mikuy ofrendata rupatsipäkunanpaq, purificatsina sacrificiuta rupatsipäkunanpaq, consagratsina sacrificiuta rupatsipäkunanpaq, cüra kananpaq churashqanpita ofrendata rupatsipäkunanpaq y jawka kawakuy sacrificiuta rupatsipäkunanpaq.
38 Sinaí jirkachömi Moisésta TAYTA DIOS tantiyatsirqan Israel runakuna sacrificiukunata apapäkunanpaq.
Ichic wilacuycuna
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 7.15 Wakin runakunaqa warantin nipäkun.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 7.26-27 Gén. 9.4; Lev. 17.10-14; 19.26; Deut. 12.16, 23; 15.23.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
