Malaquías 4:1-6
4 (3.19) Lapanta mandaq TAYTA DIOS kaynömi nin: “Walkalanami pishiykan juzganä junaq chayamunanpaq. Tsay junaqmi bunyaypa bunyar nina rupar oqshata ushashqanno lapan ali chölu tukuqkunata y fiyu runakunata chipyaq ushakätsishaq.
2 (3.20) Qamkunapaqmi itsanqa, *mantsakamaq kapäkuptiki, inti jeqamuqno salvación chayamunqa. Salvacionta chaskirmi becërrukuna pañaqnöraq kushishqa tiwyaykachanki.
3 (3.21) Juzganä junaq chayamuptinmi fiyu runakunata vincir uchpatano jarur ushanki. Noqa lapanta mandaq TAYTA DIOSMI tsayno nï”.
Elíasta kachamunanpaq Tayta Dios nishqan
4 (3.22) Tayta Dios kaynömi nin: “Sirvimaqnï Moisésta Horeb puntacho* kamaripashqä leynïkunata imaypis ama qonqapäkuytsu. Tsay leynïkuna y mandamientükunaqa lapan Israel runakunapaqmi kaykan.
5 (3.23) “Juzganä junaq pasaypa mantsariypaqmi kanqa. Tsay junaq manaraq chayamuptinmi profëta Elíasta qamkunaman kachamushaq.*
6 (3.24) Pay wilakuptinmi mamanpis wawankunawan y papäninpis tsurinkunawan amistanqapaq. Tsurinkunapis papäninwan y mamanwan amistanqapaq.* Mana amistaptinqa shamushqä hörami nacionninta ushakätsishaqpaq”.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
