Números 10:1-36
10 Moisésta TAYTA DIOS kayno nirqan:
2 “Qellaypita ishkay *cornëtakunata ruratsinki martilluwan takaylapa. Tsay cornëtakunata tukatsinki runakuna juntakänanpaq y aywananpaqpis.
3 Ishkay cornëtakunata tukaptinmi Tinkuna Toldu punkuman lapan runakuna nawpaykiman juntakämunqa.
4 Juk cornëtalata tukaptinqa cada trïbupa mandaqninkunalami shapäkamunqa.
5 “Aywalay tönuta tukaptinmi itsanqa Tinkunantsi *Sagrädu Toldupa inti jeqamunan kaq läducho patsaraykaq runakuna toldunkunata shuntarkur aywayta qalaykärinqa.
6 Tsaypita yapay cornëtata tukaptinnami Tinkunantsi Sagrädu Toldupa sur kaq läducho patsaraykaq runakuna toldunkunata shuntarkur aywayta qalaykärinqa. Tsaynömi tukanqa cada lädupita yarqupäkunanpaq.
7 “Runakuna juntakänalanpaq kaptinqa jukno tönuta tukatsinki.
8 Cornëtata tukaqkunaqa Aarón aylu cürakunalami kanqa. Tsay nishqäkunaqa imayyaqpis leymi kanqa qamkunapaq y qamkunapita miraqkunapaq.
9 “Nacionnikiman contrayki runakuna shamur atacashuptiki guërraman yarqupäkunaykipaq cornëtata tukapäkunki. Tsaynöpami yanapashayki contraykikunata vincipäkunaykipaq.
10 Tsaynölami cornëtata tukapäkunki fiesta kaptin, lulu killa kaptin, sacrificiuta rupatsishpayki y jawka kawakuy sacrificiuta rupatsishpayki. Tsaynöpami qamkunawan conträtu rurashqäta yarpar imaypis yanapashayki. Noqaqa TAYTA DIOSNIKIMI kaykä”.
Sinaí jirkapita Israel runakuna aywakushqan
11 Egiptupita yarqushqanpita juk wata y juk killa cumplirkur ishkay chunka (20) junaq kaykaptinnami *Pactu Toldu jananpita pukutay aywayta qalaykurqan.
12 Tsawraqa Sinaí jirkapita Israel runakuna trïbunpa trïbunpa qatinaylanpa aywarkaykaptinmi Parán chunyaq jirkacho pukutay ichikuykurqan.
13 Sinaípita yarqur Moisésta TAYTA DIOS yätsishqannölami*
14 Judá trïbu runakuna bandërankunawan puntata aywapäkurqan. Paykunawan juntumi ishkay trïbukunapis* aywapäkurqan. Judá trïbupa mandaqninmi karqan Aminadabpa tsurin Naasón.
15 Isacar trïbupa mandaqninmi karqan Zuarpa tsurin Natanael.
16 Zabulón trïbupa mandaqninnami karqan Helónpa tsurin Eliab.
17 Paykunapa qepantanami aywapäkurqan Gersónpita miraq runakuna y Meraripita miraq runakunapis. Paykunami *Sagrädu Tolduta paskarir apapäkurqan.
18 Paykunapa qepantanami Rubén trïbu runakuna bandëranwan aywapäkurqan. Paykunawan juntumi ishkay trïbu runakunapis* aywapäkurqan. Rubén trïbupa mandaqninmi karqan Sedeurpa tsurin Elisur.
19 Simeón trïbupa mandaqninmi karqan Zurisadaipa tsurin Selumiel.
20 Gad trïbupa mandaqninmi karqan Reuelpa tsurin Eliasaf.
21 Paykunapa qepantanami Coatpita miraq runakuna aywapäkurqan Sagrädu Toldupa manëjunkunata apakurkur. Nawpaq trïbu runakuna ichitsishqan Sagrädu Tolduman chayarkurmi apashqan manëjunkunata churapäkuq.
22 Paykunapa qepantanami Efraín trïbu runakuna bandëranwan aywapäkurqan. Paykunawan juntumi ishkay trïbu runakunapis aywapäkurqan.* Efraín trïbupa mandaqninmi karqan Amiudpa tsurin Elisama.
23 Manasés trïbupa mandaqninmi karqan Pedasurpa tsurin Gamaliel.
24 Benjamín trïbupa mandaqninmi karqan Gedeonipa tsurin Abidán.
25 Lapanpa qepantanami Dan trïbu runakuna bandëranwan aywapäkurqan. Paykunawan juntumi ishkay trïbu runakunapis* aywapäkurqan. Dan trïbupa mandaqninmi karqan Amisadaipa tsurin Ahiezer.
26 Aser trïbupa mandaqninmi karqan Ocránpa tsurin Pagiel.
27 Neftalí trïbupa mandaqninmi karqan Enánpa tsurin Ahira.
28 Tsaynömi Israel runakuna trïbunpa trïbunpa qatinaylanpa aywapäkurqan.
Yanaqänanpaq cuñädun Hobabta Moisés ruwakushqan
29 Moiséspa cuñädunmi karqan madianita Ragüelpa* tsurin Hobab. Paytami Moisés kayno nirqan: “Yanapamänanpaqmi TAYTA DIOS promitimashqa. Tsaymi aywapäkushaq TAYTA DIOS rikatsimänanpaq kaqman. Yanaqaykalämay, tayta. Bendición chaskishqäkunata rakipäshaykichari”.
30 Tsayno niptinmi Hobab kayno nirqan: “Manami kamäpakushaqtsu. Noqaqa markächo kaykaq aylükunamanmi kutikushaq”.
31 Tsawraqa Moisés kayno nirqan: “Ama kutikuytsu. Qamqa lapan jirkakunatami reqinki. Maycho patsakunantsipaq kashqantapis musyankimi. Tsaymi qamta ruwakü reqitsimar pushapäkamänaykipaq.
32 Noqakunawan aywaptikiqa TAYTA DIOS kamaripämashqankunata rakipäshaykimi”.
33 Sinaí jirkapita aywakurmi Israel runakuna kimsa junaq aywayta aywapäkurqan. *Pactu Babultami puntanta apapäkurqan patsakunanpaq sitiuta tarishqanyaq.
34 Campamentupita yarqushqanpitami TAYTA DIOS kachamushqan pukutay cada junaq paykunapa jananpa aywarqan.
35 Pactu Babulta puntata yarqatsiptinmi Moisés kayno nirqan:“Noqakunapa favornï sharkuykulay, TAYTA DIOS.Contraykikuna matsipa matsir qeshpikäritsun.Chikishuqnikikunapis nawpaykipita qeshpir aywakäritsun”.*
36 Babulta ichitsiptinnami Moisés kayno nirqan: “TAYTA DIOS, yupaytapis mana atipaypaq Israel runakunaman kutimuyna”.
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Sagrädu Toldu Liyinki Tinkuna Toldupita tantiyatsikuyta.
^ Pactu Toldu Pactu Tolduqa Tayta Dioswan Tinkuna Toldumi karqan. Tsayno jutin karqan Israel runakunawan pactuta rurar paykunawan imaypis kananpaq Tayta Dios promitishqa kaptinmi. Tsay tolducho Tayta Dios kaptinmi Pactu Toldu kashqanta y Tayta Dioswan Tinkuna Toldu kashqanta nipäkurqan (Éxo. 38.21; Núm. 1.50; 2Crón. 24.6; Hech. 7.44; Apoc. 15.5). Tsaynöla Tinkuna Toldupita tantiyatsikuyta liyinki.
^ 10.13 Núm. 2.1-34.
^ 10.14 Judá trïbu runakunawan aywaq runakunaqa Isacar trïbu y Zabulón trïbu runakunami karqan. Tsaypita musyanaykipaq liyinki Núm. 2.3-9.
^ Sagrädu Toldu Liyinki Tinkuna Toldupita tantiyatsikuyta.
^ 10.18 Rubén trïbu runakunawan aywaq runakunaqa Simeón trïbu y Gad trïbu runakunami karqan. Tsayta musyanaykipaq liyinki Núm. 2.10-16.
^ 10.22 Efraín trïbu runakunawan aywaq runakunaqa Manasés trïbu y Benjamín trïbu runakunami karqan. Tsaypita musyanaykipaq liyinki Núm. 2.18-24.
^ 10.25 Dan trïbu runakunawan aywaq runakunaqa Aser trïbu y Neftalí trïbu runakunami karqan. Tsaypita musyanaykipaq liyinki Núm. 2.25-31.
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
