Números 13:1-33
13 Tsaypitami Moisésta TAYTA DIOS kayno nirqan:
2 “Kananqa cada trïbupita juk mandaqta kachay *Canaánta rikapakamunanpaq. Tsay naciontami Israel runakunata qoykushaq”.
3 Tsaymi TAYTA DIOS nishqanno Parán chunyaq jirkapita runakunata Moisés kacharqan rikapakuq aywapäkunanpaq. Lapanpis tsay runakunaqa mandaqmi karqan.
4 Tsay aywaq runakunami karqan Rubén trïbupita Zacurpa tsurin Samúa,
5 Simeón trïbupita Horípa tsurin Safat,
6 Judá trïbupita Jefonipa tsurin Caleb,
7 Isacar trïbupita Josépa tsurin Igal,
8 Efraín trïbupita Nunpa tsurin Oseas,
9 Benjamín trïbupita Rafúpa tsurin Palti,
10 Zabulón trïbupita Sodipa tsurin Gadiel,
11 Josépa tsurin Manasés trïbupita Susipa tsurin Gadi,
12 Dan trïbupita Gemalipa tsurin Amiel,
13 Aser trïbupita Micaelpa tsurin Setur,
14 Neftalí trïbupita Vapsipa tsurin Nahbi y
15 Gad trïbupita Maquipa tsurin Geuel.
16 Tsay runakunatami Moisés kacharqan Canaánta rikapakamunanpaq. Nunpa tsurin Oseaspa jutintami Moisés trukatsirqan Josué* jutin kananpaq.
17 Canaánta rikapakamunanpaq kachashpanmi Moisés kayno nirqan: “*Neguevpa pasashpayki jalqakunacho kaykaq markakunaman chayapäkunki.
18 Tsay markakunata rikapakamur shumaq tantiyapäkamunki runakuna ali chölu kashqanta o mana väliq kashqanta, atskaq kashqanta o walkaqla kashqantapis.
19 Tsaynöpis rikapakamunki wayinkuna toldulapita kashqanta o perqapita kashqanta y markankuna murallashqa o muralläni kashqantapis. Tsaynöpis rikapakamunki chakrankuna imano kashqantapis.
20 Rikapakamunki chakran hondu alpa kashqanta o qara chakra kashqantapis, munti kashqanta o mana kashqantapis. Ama mantsakärinkitsu tsay nacionman yaykuyta. Tsay chakrakunacho ima wayushqantapis apapäkamunki”.
(Tsay witsanqa punta poquq üva palay tiempumi karqan.)
21 Moisés tsayno kachaptinmi intëru Canaánta rikapakamurqan Zin nishqan chunyaq jirkapita Hamatman yaykuna Rehob markayaq.
22 Neguevpa pasarkur chayarqan Hebrón markaman. Tsaychömi taykarqan Anacpita miraqkuna. Paykunami karqan Ahimán runakuna, Sesai runakuna y Talmai runakuna. Hebrón markata sharkatsishqanpita qanchis watataraqmi Egiptucho Zoán markata sharkatsipäkurqan.
23 Tsaypitanami Escol pampaman rikapakuqkuna chayaykur rämantinta juk sarta üvata muturir qeruwan wintuypa apapäkurqan. Tsaynölami hïgusta y granädatapis apapäkurqan.
24 Juk sarta üvata palashqanpitami tsay pampapa jutinta churaparqan Escol* jutin kananpaq.
25 Chusku chunka (40) junaq rikapakurkurmi
26 chunyaq tsaki Paráncho Cadesman kutipäkurqan. Tsaychömi karkaykarqan Moisés, Aarón y lapan Israel runakunapis. Chayaykurnami wilapäkurqan lapan rikashqankunata y imata mayashqankunatapis. Nirkurmi tsaypita apamushqankunata rikatsirqan.
27 Tsaynölami Moisésta kayno nipäkurqan: “Rikapakamuq kachamashqayki chakrakunaman aywapäkushqämi. Rasunpami lëchipis y abëjapa mishkinpis atska kaykan. Kay frütakunatami tsaypita apapäkamushqä.
28 Itsanqa tsay markacho taq runakuna tsaytsikami karkaykan. Markankunapis jatusaq y ali murallashqami kaykan. Tsaynöpis tsaychöqa Anacpita miraq jatusaq runakunami karkaykan.
29 Neguevchömi amalecita runakunapis tarkaykan. Jalqakunacho kaykaq markakunachöqa tarkaykan heteo runakuna, jebuseo runakuna y amorreo runakunami. Cananeo runakunanami tarkaykan lamar kuchun pampakunacho y Jordán mayu nawpan pampakunacho”.
30 Tsayno nipäkuptinmi runakuna Moiséspa contran parlapäkurqan. Tsaymi runakunata upälaykatsir Caleb kayno nirqan: “¡Tsayno kaptinpis tsay markakunata y chakrakunata qechunantsipaq aywapäkushun! ¡Noqantsiqa paykunata vincishunmi!”
31 Tsayno niptinpis rikapakamuq mayinkuna kayno nipäkurqan: “Tsay runakunata ¿imapaqtaq achäquita ashipäshun? ¡Paykunaqa noqantsipitapis mas atskaqmi karkaykan!”
32 Israel mayinkunata desanimatsirmi kayno nipäkurqan: “Rikapakamushqä markakunacho pasaypa wanutsinakuylami kaykan. Tsaynöpis tsay markakunacho taq runakuna jatusaqmi karkaykan.
33 Anacpita* miraq jatusaq runakunatapis rikapäkushqämi. Kikïkunapa yarpaynïpitaqa paykunapa nawpancho chuklusnölami kapäkushqä. Paykunapis chuklustanölami rikapäkamashqa”.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 13.16 Oseas ninanqa salvación ninanmi. Josué ninanqa Tayta Dios salvacionmi kaykan ninanmi.
^ Neguev Neguevqa Israel nacionpa sur kaq lädunchömi kaykan. Neguevcho kaykan Beerseba, Siclag, Gerar y Arad markakunami. Neguevcho shumaq mana tamyaptinmi aläpaqa mana murukärintsu. Tsaymi tsay partichöqa uyshata y cabrata ashmakular täkärin (Gén. 24.62; Núm. 13.17; Jos. 11.16).
^ 13.24 Escol ninanqa sarta ninanmi.
