Números 14:1-45
14 Tsawraqa Israel runakuna tsay tsakay qaparayparaq warayta waqapäkurqan.
2 Tsaymi Moisésta y Aarónta qayapar kayno nipäkurqan: “¡Alimi kanman karqan Egiptulacho o kay chunyaq jirkalacho wanukuptintsi!
3 ¿Imapaqtaq kayman TAYTA DIOS pushamashqantsi? Guërracho wanurkatsimashpantsimi warmintsitapis y tsurintsikunatapis contrantsikuna apakärinqa. ¡Tsaypa trukanqa Egiptuman kutikuptintsi alimi kanman!”
4 Tsaymi juknin juknin kayno ninakurqan: “Egiptuman pushamänantsipaq juktana mandamaqnintsita churashun”.
5 Tsaymi Moisés y Aarónqa ima ruraytapis mana kamäpakur pasaypa lakikushpan lapan runakunapa nawpancho lätakuykurqan.
6 Nunpa tsurin Josué y Jefonipa tsurin Calebpis pasaypa lakikushpanmi röpanta rachirqan. (Paykuna karqan *Canaánman rikapakuq aywaqkunami.)
7 Nirkurnami Israel runakunata kayno nipäkurqan: “¡Rikapakamushqä nacionqa maypis täkuypaqmi kaykan!
8 TAYTA DIOSMI kuyamashpantsi tsay nacionman yaykatsimäshun. Tsaychöqa lëchipis abëjapa mishkinpis yakunöraqmi atska kaykan.
9 Itsanqa TAYTA DIOSPA contran ama sharkapäkuytsu* ni tsaycho taq runakunata ama mantsakäriytsu. Paykunataqa chuspitanölami lapirishunpaq. Tsaynöpis paykunataqa manami pipis yanapanqatsu. TAYTA DIOS noqantsiwan kaykaptinqa ama mantsakushuntsu”.
10 Tsayno nipäkuptinmi runakuna saqmayta munarqan. Tsay hörami lapan runakuna TAYTA DIOSPA chipchipyayninta Tinkuna Tolducho rikapäkurqan.
11 Tsawraqa Moisésta TAYTA DIOS kayno nirqan: “¡Imayyaqraq Israel runakuna rabyanätsimanqa! Milagrukunata rurashqäta rikaykarpis ¡imayyaqraq mana criyimanqatsu!
12 Kay runakunataqa pestiwanmi ushakätsishaq. Qampita miraqkunalami jatun nación rikakunanyaq mirapäkunqa”.
13 Tsayno niptinmi Moisés kayno nirqan: “Tayta, kikikimi munaynikiwan Egiptupita Israel runakunata jorqamushqanki. Paykunata ushakätsiptikiqa
14 Egipto runakuna Canaáncho taq runakunatachari wilapanqa. Cananeo runakunapis musyanmi noqakunawan kaykashqaykita. Tsaynöpis musyanmi yuriparkamar parlapämashqaykita, ichiraykaq pukutaycho nawpäkunata junaqpa aywashqaykita y ichiraykaq nina rupaykaqcho tsakaypa aywashqaykita.
15 Israel mayïkunata lapanta ushakätsiptikiqa maytsaychöpis runakuna jamurpäshushpayki kaynömi nipäkunqa:
16 ‘TAYTA DIOSQA tsay runakunata promitishqan nacionman chayatsiyta mana kamäpakurmi chunyaq jirkalacho ushakätsishqa’.
17 “Tsaymi TAYTA DIOS, qamta manakamü promitishqaykinöla munaynikiwan yanapamänaykipaq. Qamqa nishqanki
18 mana rabyakuq y kuyapäkuq kashqaykitami. Tsaynöpis nishqanki mana cäsukuqkuna perdonta manakushuptikiqa perdonanaykipaq kashqantami. Tsaynöpis nishqanki jutsa ruraqkunataqa kikintapis, tsurintapis, wilkantapis y wilkanpa tsurintapis castiganaykipaq kashqantami.*
19 Egiptupita kayyaq pushamänaykipaqpis pacienciayki kashqami. Kuyapäkuq kaykarqa jutsa rurashqanpita kay runakunata perdonaykulay”.*
Israel runakunata Tayta Dios castigashqan
Deuteronomio 1.34-40
20 Tsawraqa TAYTA DIOS kayno nirqan: “Manakamashqaykinölami perdonashaq.
21 Imayyaqpis kawaq Dios kar y intëru kay patsata munaynïcho tsarararmi kayno nï:
22 Egiptucho y chunyaq jirkacho milagrukunata rurashqäta rikaqkuna manami ni juklaylapis chayanqatsu unay ayluykikunata promitishqä nacionman. Paykunaqa yaparir yaparir kikin munashqanta ruratsimayta munashpanmi mana cäsukamashqatsu. Manami mayqanpis rabyanätsimaqkuna tsay nacionman chayanqatsu.
23 -*
24 Sirvimaqnï Calebmi itsanqa nishqäkunata cäsukaman. Tsaymi rikapakamushqan nacionman payta yaykatsishaq. Paypita miraqkunapis tsaychömi tanqapaq.*
25 Amalecita runakuna y cananeo runakuna tashqan pampapaqa ama aywapäkuytsu. Tsaypa trukanqa wara junaq chunyaq jirkaman kutipäkuy Puka Lamarpa aywaq nänipa”.
26 Tsaypitanami Moisésta y Aarónta TAYTA DIOS kayno nirqan:
27 “Mayashqämi Israel runakuna conträ rimashqankunata. ¡Imayyaqraq kay runakunata awantashaq!
28 Kayno nishqäta paykunata wilay: ‘Noqa TAYTA DIOSMI jurar kayno nï: Yarpashqaykinölami lapaykita ushakätsishayki.
29 Conträ rimashqanpitami ishkay chunka (20) watayuqpita janaman lapan censakuqkuna kay chunyaq jirkacho wanupäkunqa.*
30 Jefonipa tsurin Calebwan Nunpa tsurin Josuélami promitishqä nacionman yaykunqa. Tsaypita kaqqa manami mayqanikipis yaykunkipaqtsu.
31 Tsurikikunatami itsanqa chikishuqniki runakuna apakunanpaq kashqanta yarpapäkuptikipis yaykatsishaq. Manakaqman churapäkushqayki nacionchömi tsurikikuna tanqapaq.
32 “ ‘Qamkunaqa kay chunyaq jirkachömi wanur ushakankipaq.
33 Wanur ushakashqaykiyaqmi wamraykikuna chusku chunka (40) wata* uywankunawan chunyaq jirkapa puripäkunqa. Tsayno nakapäkunqa qamkuna roqu rinri kashqaykipitami.
34 Chusku chunka junaq *Canaánta rikapakamushqaykinömi chusku chunka wata nakashpayki puripäkunkipaq. Tsaynöpami cada junaqpita juk wata chunyaq jirkacho kapäkunkipaq. Tsayraqmi musyapäkunkipaq imano castigakuq kashqätapis.
35 Noqa TAYTA DIOS karmi nishqäta cumplishaq. Tsaymi conträ sharkuq y mana cäsukamaq runakunata castigar kay chunyaq jirkalacho ushakätsishaq’ ”.
36 Runakunata qelanätsishqanpitami Moisés kachashqan chunka rikapakuqkunata
37 pesti qeshyawan TAYTA DIOS wanutsirqan.
38 Josuéwan Caleblami kawaykar quëdarqan.
Amalecita y cananeo runakuna Israel runakunata vincishqan
Deuteronomio 1.41-46
39 TAYTA DIOS nishqanta Moisés wilaptinmi Israel runakuna fiyupa lakikärirqan.
40 Tsaymi tsaka tsakala sharkurkur jalqakunaman aywananpaq kayno nipäkurqan: “TAYTA DIOS promitimashqantsi nacionman yaykuyta mana munarqa jutsayuqmi kaykantsi. Kanan tsayman jukla aywapäkushun”.
41 Tsayno niptinmi Moisés kayno nirqan: “¡Manakaqlapaqmi yarparkaykanki tsayman aywayta! Chunyaq tsaki jirkaman kutinantsipaq TAYTA DIOS niykämaptintsiqa ¿imanirtaq cäsukärinkitsu?
42 Promitimashqantsi nacionman ama aywapäkuytsu. Mana cäsukuypa aywapäkuptikiqa TAYTA DIOS manami yanapashunkipaqtsu. Chikishuqnikikunapis vincirmi wanutsipäkushunkipaq.
43 Amalecita y cananeo runakunaqa ushakätsishunaykipaqmi shuyarpaykäshunki. Mana cäsukuq kashqaykipitami TAYTA DIOS mana tsapäshunkipaqnatsu”.
44 Moisés tsayno niykaptinpis Israel runakunaqa ali chölu tukurmi jalqakunaman aywapäkurqan. Tsayno aywapäkurqan campamentucho Moisés quëdaptinpis y *Pactu Babulta mana aparpis.
45 Israel runakuna aywaykaptinmi jalqakunacho taq amalecita y cananeo runakuna yarqamushpan Israel runakunata atacarqan. Tsaycho vincishpanmi Horma witsanyaq qatikacharqan.
Ichic wilacuycuna
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 14.18 Éxo. 20.5-6; 34.6-7; Deut. 5.9-10; 7.9-10.
^ 14.13-19 Éxo. 32.11-14.
^ 14.24 Jos. 14.9-12.
^ 14.32-33 Hech. 7.36.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
