Números 18:1-32
18 Tsaypitanami Aarónta TAYTA DIOS kayno nirqan: “Qampis, tsurikikunapis y Leví trïbu mayikikunapis *Sagrädu Tolducho imatapis lutanta rurarqa jutsayuqmi rikakärinkipaq. Cüra rurananpaq kaqkunata imatapis lutanta rurarmi itsanqa qam y tsurikikunala jutsayuq rikakärinkipaq.
2 “Leví trïbu mayikikunata wilanki qamta y tsurikikunata yanapashunaykipaq. Paykunami *Pactu Tolducho sirviptiki ima ruraykunatapis yanapashunkipaq.
3 Nishqaykita cumplirmi tsay tolduta täpanqa. Itsanqa *sagrädu manëjukunaman ama witipäkunqatsu ni patiucho kaykaq *altarpa nawpanmanpis ama yaykapäkunqatsu. Yaykurqa o witiparqa paykunapis qamkunapis wanunkipaqmi.
4 *Levitakunalami Tinkuna Tolducho ima ruraykunatapis ruräshishunki. Qamkuna rurashqaykiman jäpa runakunaqa ama jatikämunqatsu.
5 “Qamkunalami altarcho y tolducho ruraypaq kaqkunata rurapäkunki. Kay nishqäkunata cäsukuptikiqa Israel runakunata manami castigashaqnatsu.
6 Israel runakunapita Leví trïbu mayikikunata noqami akrashqä Tinkuna Tolducho ima ruraykunatapis ruräshishunaykipaq.
7 Qamta y tsurikikunata sirvimaq cüra kanaykipaq churashqa kaptïmi qamkunala altarcho y Lugar Santïsimucho ruraypaq kaqkunata rurapäkunki. Jäpa runa kaykar pipis tsayman yaykuq kaqmi itsanqa wanunqa”.
Cürakunapa derëchun ima kashqanpis
8 Tsaypitanami Aarónta TAYTA DIOS kayno nirqan: “Israel runakuna noqapaq apapäkamushqanta qammi cuidanki. Tsay apamushqan *sagrädu kaqkunata qamta y tsurikikunatami qoykushqä. Kay nishqäkunaqa imayyaqpis leymi qamkunapaq kanqa.
9 Israel runakuna sacrificiupaq apamur *altarcho mana rupatsishqankunaqa qamkunapaqmi kanqa. Tsaykunami kaykan tsaki mikuy ofrenda, purificatsina sacrificiu y consagratsina sacrificiu. Lapanpis tsay sagrädu kaqkuna qampaq y tsurikikunapaqmi kanqa.
10 Olqu kaqkunalami tsay sagrädu kaqkunata sagrädu particho mikupäkunki.
11 “Tsaynöpis nawpächo joqarkur wakman kayman kuyutsishqayki ofrendakuna qampaq, olqu tsurikikunapaq y warmi tsurikikunapaqmi kanqa. Tsay ofrendakunataqa *püru kaqkunalami mikupäkunqa. Kay nishqäkunaqa imayyaqpis leymi kanqa qamkunapaq y qamkunapita miraqkunapaq.
12 “Tsaynöpis punta poquqta cosechashqanpita alinnin kaq aceitita, vïnuta y trïguta noqapaq *primiciata apamushqankuna qampaqmi kanqa.
13 Lapan punta poquqkunata noqapaq apamushqankunapis qampaqmi kanqa. Itsanqa tsaykunata mikunqa püru kaq ayluykikunalami.
14 Israel runakuna imatapis noqapaq apamushqanqa* lapanpis qampaqmi kanqa.
15 “Israel runakunapa qechpa olqu wamrankuna y manta uywakunapa punta yuriq orqu wawankunapis noqapaq apamushqanqa qampaqmi kanqa. Tsayno kaptinpis qechpa wamranta y impüru uywakunapa punta yuriq wawanta entregashunaykipa trukanqa qellaytami apapäkamunqa.
16 Yurishqanpita juk killayuq kaykaptinmi apapäkamunqa pitsqa siclo qellayta. Tsay qellaytaqa pësanqa Tinkunantsi *Sagrädu Tolducho kaykaq pësakunawanmi. Tsay pësawan pësaptinqa kanqa juk siclo chunka juk grämu qellaymi.
17 “Wäkapa, uyshapa y cabrapa punta yuriq wawanpa chaninta apamunanpa trukanqa kikin uywata apamunqa. Tsaykuna noqapaq kaptin pishtarkur altar jananman yawarninta jichanki. Wirantapis altar janancho rupatsinki. Tsay rupatsishqaykipa ali asyayninta* mayarmi noqa TAYTA DIOS kushikushaqpaq.
18 Tsay uywakunapa aytsanpis qampaqmi kanqa. Nawpächo joqarkur wakman kayman kuyutsishqayki uywapa alawqa kaq chankan y pëchunpis qampaqmi kanqa.
19 Israel runakuna noqapaq lapan apamushqanpis qampaq, olqu tsurikikunapaq y warmi tsurikikunapaqmi kanqa. Kay nishqäkunaqa imayyaqpis leymi kanqa qampaq y qampita miraqkunapaqpis. Qampaq y qampita miraqkunapaqmi imayyaqpis tsayno kananpaq promitiykä”.
Levitakunapa derëchun ima kashqanpis
20 Tsaypitanami Aarónta TAYTA DIOS kayno nirqan: “Israel runakuna aywaykashqan nacionman chayaykur chakrata chaskiptin qampis y tsurikikunapis manami chaskipäkunkipaqtsu. Chakrata chaskipäkunaykipa trukanqa noqami qamkunapa herenciayki kashaq.
21 Leví trïbu mayikikunapaqnami Israel runakuna apamushqan *diezmukuna kanqa. Tsay diezmukuna paykunapaq kanqa Tinkuna Tolducho sirvipäkamaptinmi.*
22 “Leví trïbupita mana kaykar Tinkuna Tolduman pipis witiq kaqqa wanunqami.
23 Tsayno kaptinmi *levitakunala Tinkuna Tolducho rurananpaq kaqkunata rurapäkunqa. Tsaycho imatapis lutanta rurarqa jutsayuqmi kanqa. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.
“Israel nacioncho levitakunapa chakrankuna manami kanqatsu.
24 Tsayno mana kanqatsu Israel runakuna noqapaq apamushqan diezmukuna paykunapaq kaptinmi”.
25 Tsaypitanami Moisésta TAYTA DIOS kayno nirqan:
26 “Levitakunata kayno ninki: ‘Israel mayikikuna apamushqan diezmuqa qamkunapa herenciaykimi kanqa. Apamushqan diezmupita qamkunapis diezmuta jorqurkur TAYTA DIOSPAQ apapäkamunki.
27 Tsay diezmutami TAYTA DIOS chaskinqa Israel mayikikuna trïgunpita o vïnunpita diezmuta apamuptin chaskishqannöla.
28 Tsaymi Israel mayikikuna apamushqan diezmuta chaskir qamkunapis tsaypita diezmuta TAYTA DIOSPAQ apamur cüra Aarónta entregapäkunki.
29 Imata chaskirpis alinnin kaqtaqa imaypis TAYTA DIOSPAQ apapäkamunki’.
30 “Levitakunata mastapis kayno ninki: ‘Alinnin kaqta apamuptikiqa Israel mayikikuna trïgunpita o vïnunpita apamushqanta diezmuta chaskishqannölami TAYTA DIOS chaskinqa.
31 Putsuq kaqtaqa lapan ayluykikunawan maychöpis mikupäkunki. Tsayqa päguyki kanqa Tinkuna Tolducho ruraypaq kaqkunata rurashqaykipitami.
32 Alinnin kaqta TAYTA DIOSPAQ apamurqa putsuq kaqta mikurpis manami jutsayuqtsu kankipaq. Israel mayikikuna apamushqan diezmukunata lapanta tsarikurkurqa mana *sagrädutanömi rikarkaykanki. Tsayno rurarqa TAYTA DIOSPA castïgunwanmi wanupäkunkipaq’ ”.
Ichic wilacuycuna
^ Sagrädu Toldu Liyinki Tinkuna Toldupita tantiyatsikuyta.
^ Pactu Toldu Pactu Tolduqa Tayta Dioswan Tinkuna Toldumi karqan. Tsayno jutin karqan Israel runakunawan pactuta rurar paykunawan imaypis kananpaq Tayta Dios promitishqa kaptinmi. Tsay tolducho Tayta Dios kaptinmi Pactu Toldu kashqanta y Tayta Dioswan Tinkuna Toldu kashqanta nipäkurqan (Éxo. 38.21; Núm. 1.50; 2Crón. 24.6; Hech. 7.44; Apoc. 15.5). Tsaynöla Tinkuna Toldupita tantiyatsikuyta liyinki.
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 18.14 Lev. 27.28.
^ Sagrädu Toldu Liyinki Tinkuna Toldupita tantiyatsikuyta.
^ 18.17 Wakin runakunaqa mushkuyninta nipäkun.
^ diezmu Diezmuqa cada chunkapita jukta Tayta Diospaq rakishqanmi kaykan. Tsaytaqa rakin qellaypita, uywakunapita y mikuykunapitami (Gén. 14.17-20; Deut. 14.22; Mat. 23.23).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
