Números 19:1-22
19 Tsaypitanami Moisésta y Aarónta TAYTA DIOS kayno nirqan:
2 “Israel mayikikunapaqmi kay ley kaykan: Manaraq aruq sänu puka wäkata Israel runakuna apamunqa.
3 Tsayta chaskirkur cüra Eleazar campamentupita juk läduman apaykatsir rikapaylapa pishtatsinqa.
4 Tsay wäkapa yawarninman dëdunta jatirkurmi cüra Eleazar Tinkuna Toldu kaqmanpa qanchis kuti tsaqtsupanqa.
5 Nirkurmi Eleazar rikaykaptin jinalancho tsay wäkapa qaranta, aytsanta, yawarninta y ashashninta rupatsinqa.
6 Tsay rupaykashqanmanmi cedru qeruta, juk räma *hisöputa y puka tëlata cüra Eleazar jitapanqa.
7 “Nirkurnami cüraqa armakurir y taqshakurir campamentuman kutinqa. Tsayno rurarpis patsa tsakashqanyaqmi *impüru kanqa.
8 Tsaynölami wäkata pishtarkur rupatsiq runapis taqshakunqa y armakunqa. Paypis patsa tsakashqanyaqmi impüru kanqa.
9 “Tsaypitanami püru kaykaq juk runana wäkata rupatsishqan uchpata shuntarkur limpiu partiman apaykur churanqa. Tsay uchpatami Israel runakuna yakuman winanqa purificakuna yaku kananpaq.* Tsay yakuqa purificatsina sacrificiumi kanqa.
10 Uchpata shuntaq runapis röpanta taqshakurir patsa tsakashqanyaqmi impüru kanqa. Tsay nishqäkunaqa imayyaqpis leymi kanqa qamkunapaq y qamkunacho taq jäpa runakunapaqpis.
11 “ ‘Pipis ayata yataq kaqqa qanchis junaqyaqmi impüru kanqa.
12 Yatashqanpita kimsa kaq junaqcho y qanchis junaqchöpis purificakuna yakuwan purificakunqa. Kimsa junaqcho ni qanchis junaqchöpis mana purificakurqa manami pürutsu kanqa.
13 Pipis ayata yataykur mana purificakurqa TAYTA DIOSPA *Sagrädu Tolduntami impüruyätsinqa. Purificakuna yakuwan mana tsaqtsupashqa karqa impürumi kanqa. Tsay runataqa Israel runakunapita qarqapäkunki.
14 “ ‘Pipis toldun rurincho wanuptinqa tolducho kaykaqpis y tolduman yaykuqpis impürumi rikakunqa qanchis junaqyaq.
15 Mana ali tsapashqa mankakunapis impürumi kanqa.
16 Tsaynölami tashqanpita juk läducho espädawan runa wanutsishqan ayata yatarpis, kikilan wanushqan runapa ayanta yatarpis, runapa tulunta yatarpis o aya pamparashqanta yatarpis impüru rikakunqa qanchis junaqyaq.
17 “ ‘Tsay runa purificakunanpaq puka wäkata rupatsishqanpa uchpanta mankaman winarkur chuya yakuta winanqa.
18 Nirkurqa püru kaykaq runa tsay yakuman hisöpu rämata jatirkur tsaqtsupanqa impüru runa tashqan tolduta, toldu rurincho lapan imaykankunata y lapan tsaycho taqkunatapis. Tsaynöla tsaqtsupanqa impüru runatapis tuluta yatashqa kaptinpis, runa wanutsishqan ayata yatashqa kaptinpis, kikilan wanushqa runapa ayanta yatashqa kaptinpis o aya pamparashqanta yatashqa kaptinpis.
19 Impüru runata tsayno tsaqtsupanqa kimsa kaq junaqcho y qanchis kaq junaqchöpis. Qanchis kaq junaqchönami impüru runa taqshakurir armakunqa. Patsa tsakarkuptinnami püru kanqa.
20 “ ‘Pipis impüru kashqanpita mana purificakurqa Sagrädu Toldutami impüruyätsinqa. Purificakuna yakuwan mana tsaqtsupashqa karqa impürulami kanqa. Tsay runataqa Israel runakunapita qarqapäkunki.
21 “ ‘Kay nishqäkunaqa imayyaqpis leymi kanqa qamkunapaq. Purificakuna yakuwan tsaqtsupaq runapis röpanta taqshakunqa. Purificakuna yakuta yataq kaqpis patsa tsakashqanyaqmi impüru kanqa.
22 Impüru runa imata yatashqanpis impürumi kanqa. Impüru runata yataykuq runapis patsa tsakashqanyaqmi impüru kanqa’ ”.
Ichic wilacuycuna
^ hisöpu Hisöpuqa muñä jachanömi kaykan. Israel runakuna impüru kashqanpita püru kananpaqmi hisöpu jachata yawarman ushmarkatsir tsaqtsupaq (Éxo. 12.22; Núm. 19.18; Sal. 51.7; Heb. 9.19).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ Sagrädu Toldu Liyinki Tinkuna Toldupita tantiyatsikuyta.
