Números 22:1-41
22 Tsaypitanami Israel runakuna Jericó tsimpan y Jordán mayu nawpan Moab pampaman chayapäkurqan.
2 Ziporpa tsurin Balacmi moabita runakunapa mandaqnin rey kaykarqan. Paymi rikarqan amorreo runakunata Israel runakuna imano ushakätsishqantapis.
3 Tsaynöpis Israel runakuna tsaytsika kashqanta rikarmi rey Balac y moabita runakuna fiyupa mantsakärirqan.
4 Tsaymi Madián nacioncho taq mayor runakunata kayno nirqan: “Qewata laqwaypa laqwar wäka ushashqannöchari tsaytsika Israel runakunaqa ushakätsimäshun”.
Tsaymi Ziporpa tsurin Balac
5 Beorpa tsurin Balaamta* qayatsirqan Israel runakunata maldicionananpaq. Balaam taykarqan Éufrates mayu nawpan Petor markacho.* Tsay markaqa kaykan amavita runakuna tashqanchömi. Balaam kaqman manaraq aywaptinmi kachakunata Balac yätsirqan chayaykur kayno ninanpaq: “Egiptupita tsaytsika runakuna yarqamurmi noqakuna tashqä kaqman juntaqpaq chayapäkamushqa.
6 Rey Balac musyanshi pipis bendicionta chaskinanpaq niptiki bendicionta chaskishqanta y maldicionashqa kananpaq niptiki maldicionädu kashqanta. Tsaymi ruwakuläshunki jukla aywaykur tsay runakunata maldicionapaykunaykipaq. Maldicionaptikiqa tsaytsika kaptinpis vincishpä nacionnïpita qarqapäkushaqmi”.
7 Tsayno yätsirkuptinmi maldicionapänanpaq qellayta apakurkur Moab y Madián mayor runakuna Balaam kaqman aywapäkurqan. Chayaykurmi Balac nishqannöla lapanta wilapäkurqan.
8 Wilaptinmi Balaam kayno nirqan: “Kanan tsakay kaylacho patsakäriy. Waranami wilashayki TAYTA DIOS imata nimashqantapis”.
Tsaymi Moab mayor runakuna tsaylacho patsakärirqan.
9 Tsay tsakaymi Tayta Dios yuriparkur Balaamta kayno tapurqan: “¿Pï runakunataq wayikicho patsaraykan?”
10 Tsaymi Balaam kayno nirqan: “Moab nacionpa mandaqnin rey Balac kachamushqan runakunami patsaraykan. Paykunami nimashqa
11 atska runakuna Egiptupita shamur intëru nacionninman juntaqpaq chayashqanta. Tsay runakunata vincir nacionninpita qarqunanpaqmi Balac munaykan maldicionanäta”.
12 Tsayno niptinmi Balaamta Tayta Dios kayno nirqan: “Tsay runakunawan ama aywaytsu ni nacionninman chayaq runakunata ama maldicionaytsu. Paykunataqa noqami bendicionta qoshqä”.
13 Tsaypitanami tutala sharkur Balaamqa Balac kachashqan runakunata kayno nirqan: “Markaykiman kutikäriy. TAYTA DIOS manami munantsu qamkunawan aywanäta”.
14 Tsayno niptinmi Moab mayor runakuna Balac kaqman kutiykur kayno nipäkurqan: “Balaamqa manami munantsu noqakunawan shamuyta”.
15 Tsaymi Balac kacharqan wakin mayor runakunata. Tsay runakunaqa punta aywaqkunapita mas atskaq y mas respitashqa runakunami karqan.
16 Paykunami Balaam kaqman chayaykur kayno nipäkurqan: “Ziporpa tsurin Balacmi ruwakushunki aywaykunaykipaq, tayta.
17 Chayaptikiqa ali pägashushpaykishi y imata manashqaykitapis kamaripäshunki. Juklashi aywaykuläshun tsay runakunata maldicionapänaykipaq”.
18 Tsayno niptinmi Balaam kayno nirqan: “Palaciun juntata qorita y qellayta Balac qoykamaptinpis TAYTA DIOSNÏ mana munashqantaqa manami parlashaqtsu.
19 Imano kaptinpis kanan tsakay kaycho patsakäriy. Mä imatashi TAYTA DIOS nimanqa”.
20 Tsay tsakaynami Balaamta yuriparkur Tayta Dios kayno nirqan: “Pushashunaykipaq tsay runakuna shamushqa kaptinqa paykunawan ayway. Itsanqa noqa nishqaläta ruranki”.
Balaampa bürrun nänicho angilta rikashqan
21 Tayta Dios tsayno niptinmi Balaamqa tutala sharkur bürrunta sillakurkur Moab mayor runakunawan aywarqan.
22 Ishkay ashmayninkunata pushakurkur bürrun muntashqa Balaam aywaykaptinmi Tayta Dios rabyashpan *angilninta kachamurqan nänicho tsapananpaq.
23 TAYTA DIOSPA angilnin espädan aptashqa nänicho ichiraykaqta rikaykurmi Balaampa bürrunqa juk lädupa jeqaykacharqan. Tsaymi näniman kutinanpaq wirurqan.
24 Aywaykashqan näniqa üva chakra chawpinpami pasarqan. Tsay näni ishkan lädupa perqashqa kaptinmi kichkinnincho TAYTA DIOSPA angilnin yapay ichikuykurqan.
25 Angilta rikaykurmi bürruqa perqaman laqakuykushpan Balaampa chankanta tinkuratsirqan. Tsaymi rabyashpan bürrunta yapay wirurqan.
26 Tsaypitanami TAYTA DIOSPA angilnin nawpariykur kichkinninman ichikuykuptin maypa pasananpaqpis mana karqantsu.
27 Angilta rikaykur bürru punukuykuptinmi Balaam pasaypa rabyashpan qeruwan wirurqan.
28 Tsaymi TAYTA DIOS rimatsiptin bürruqa Balaamta kayno nirqan: “Qamtaqa ¿imanashqätaq? Kananwanqa kimsa kutinami wiruykämanki”.
29 Tsayno niptinmi Balaam kayno nirqan: “Qamqa ¿imanirtaq mana cäsukamankitsu? Cuchillü kaptinqa maynami tuksiriyküman karqan”.
30 Tsawraqa bürru kayno nirqan: “Noqaqa kä muntashqa purinayki bürruykimi. Manami malamäñatsu kä”.
Tsayno niptin Balaam tantiyakushpan kayno nirqan: “Aw, rasun kaqtami niykämanki”.
31 Tsaypitanami angilta Balaam rikananpaq TAYTA DIOS kamakätsirqan. Pulan nänicho espädan aptashqa ichiraykaqta rikaykurmi Balaam mantsakushpan pampaman lätakuykurqan.
32 Tsaychömi TAYTA DIOSPA angilnin kayno nirqan: “¿Imanirtaq kimsa kuti bürruykita wirushqanki? Noqami nänicho tsapashqä mana ali yarpaywan aywaptiki.
33 Bürruykiqa rikamarmi juk lädupa jeqaykachashqa, ichikuykushqa y punukuykushqa. Tsayno mana ruraptinqa qamta wanutsiptï bürrulaykinami kawaykanman karqan”.
34 Tsayno niptinmi Balaam kayno nirqan: “Perdonaykalämay, Tayta. Manami musyashqätsu tsapamashqaykita. Aywanäta mana munaptikiqa kutikushaqmi, Tayta”.
35 Tsawraqa TAYTA DIOSPA angilnin kayno nirqan: “Tsay runakunawan ayway. Itsanqa noqa nishqalätami imatapis ninki”.
Tsaypita Balac kachamushqan runakunawan Balaam aywarqan.
Balaamta Balac chaskikushqan
36 Balaam aywaykashqanta musyarmi Balac taripaq aywarqan Arnón mayucho kaq juk markayaq. Tsay markaqa Moab nacionpa lindërunchömi kaykan.
37 Balaamwan tinkuykurmi Balac kayno nirqan: “Qayatsimuptï ¿imanirtaq mana munashqankitsu shamuyta? ¿Mana päganäpaq kashqantaku yarpashqanki?”
38 Tsayno niptinmi Balaam kayno nirqan: “Kaychönami kaykä. Itsanqa kikïpa yarpaynïpita manami imatapis parlashaqtsu, sinöqa Tayta Dios tantiyatsimashqalantami nishaq”.
39 Tsaypitami Balaamqa Balacwan aywarqan Quiriat-huzotman.
40 Tsaychömi wäkakunata, uyshakunata y cabrakunata pishtarkatsir sacrificiuta Balac rurarqan. Tsay aytsatami Balaamta y paywan kaykaq mayor runakunatapis qararqan.
41 Tsaypita jukaqnin tutanami Balaamta Balac pusharqan Bamot-baal jirkaman. Tsay jirkapitami Israel runakunapa campamentun rikakarqan.
Ichic wilacuycuna
^ 22.5 2Ped. 2.15-16; Jud. 11.
^ 22.5 Petor markaqa pachak kimsa chunka (130) lëwanömi Moab pampapita karqan.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
